អាគារសិក្សាថ្មីមួយខ្នង មាន២បន្ទប់ ស្ថិតក្នុងសាលាបឋមសិក្សាប្រដាក់ ភូមិប្រដាក់ ឃុំព្រៃជ្រូក ស្រុកពួក ខេត្តសៀមរាប ត្រូវបានដាក់សម្ពោធឲ្យប្រើប្រាស់ជាផ្លូវការនៅថ្ងៃទី១១ ខែមិថុនា ឆ្នាំ២០១៩ ដែលជាការឧបត្ថម្ភរបស់ក្រុមហ៊ុន អិលជី ឌីសភ្លេ (LG Display) តាមរយៈអង្គការ ឡុតទុស វើល (Lotus world) ខេត្តសៀមរាប។
តាមរយៈរបាយការណ៍នាយកសាលាបឋមសិក្សាប្រដាក់ បានបង្ហាញថា សាលាបឋមសិក្សានេះ មានសិស្សសរុបចំនួន៣៨៤នាក់ ក្នុងស្រីចំនួន ១៩៣នាក់ គ្រូសរុបចំនួន១៣នាក់ និងមានអាគារសិក្សាចំនួន១ខ្នង ៦បន្ទប់ប៉ុណ្ណោះ ក្នុងនោះ សាលាបានដកពីរបន្ទប់ ដើម្បីធ្វើជាការិយាល័យ។
តាមរយៈរបាយការណ៍ដដែលនេះ បានបញ្ជាក់ថា នៅក្នុងរដូវប្រាំងឆ្នាំ២០១៩នេះ សាលាបានរៀបចំជារោងដោល ជូនសិស្សានុសិស្ស ដើម្បីកាត់បន្ថយកំដៅក្នុងពេលសិក្សា ប៉ុន្តែពេលខ្លះ សិស្សានុសិស្ស ជួបការលំបាកខ្លាំងនៅពេលមានភ្លៀងធ្លាក់ ដោយរោងដោលនោះ ពុំមានជញ្ជាំងបាំងឡើយ។
ព័ត៌មានជាតិ ថ្មីៗ
លោក ខ្វន់ ដុងសប់ តំណាងក្រុមហ៊ុន និង ជាប្រធានសហជីព ក្រុមហ៊ុន អិលជី ឌីសភ្លេ (LG Display) បានលើកឡើងថា ក្រុមបុគ្គលិកស្ម័គ្រចិត្តរបស់ក្រុមហ៊ុនយើង បានប្រើរយៈពេលប្រមាណមួយខែ ពោលគឺនៅខែឧសភា ឆ្នាំ២០១៩ និងបានខិតខំប្រឹងប្រែងអស់ពីកម្លាំងកាយចិត្ត ដើម្បីសាងសង់អាគារសិក្សាថ្មីមួយខ្នង និងក្លោងទ្វារចំនួនមួយ ជូនដល់កុមារតូចៗ ក៏ដូចជាប្រជាពលរដ្ឋនៅក្នុងសហគមន៍នេះ។ លើសពីនោះ ក្រុមបុគ្គលិកស្ម័គ្រចិត្តទាំងអស់នេះ ក៏បានជួយលាបថ្នាំលើអាគារសិក្សាដែលមានស្រាប់ចំនួន២ខ្នងផងដែរ។
ព្រះភិក្ខុនី សាន់ មូន ប្រធានអង្គការ ឡុតទុស វើល (Lotus world) ខេត្តសៀមរាប បានមានសង្ឃដីកាថ្លែងអំណរគុណដល់ ក្រុមហ៊ុន និង ប្រធានសហជីព ក្រុមហ៊ុន អិលជី ឌីសភ្លេ (LG Display) ដែលតែងតែជួយឧបត្ថម្ភគាំទ្រដល់វិស័យអប់រំនៅក្នុងខេត្តសៀមរាប ព្រះអង្គក៏បានអំពាវនាវដល់ក្រុមហ៊ុន រួមនិងបុគ្គលិកទាំងអស់បន្តជួយបន្ថែមទៀតដល់វិស័យអប់រំក្នុងខេត្តសៀមរាប ក៏ដូចជានៅទូទាំងប្រទេសកម្ពុជា។
គួរបញ្ជាក់ថា នេះគឺជាសាលាទី៩ហើយក្នុងខេត្តសៀមរាប ដែលក្រុមហ៊ុន និង ប្រធានសហជីព ក្រុមហ៊ុន អិលជី ឌីសភ្លេ (LG Display) បានជួយសាងសង់ គិតតាំងពីឆ្នាំ២០១៥។
រូបភាព ៖ លោក ហាំ ម៉េងហួត
អត្ថបទ ៖ សេង ផល្លី
