លោកស្រីឧត្តមសេនីយ៍ត្រី ដួង ថាវរី ស្នងការរងទទួលផែនការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋានខេត្តសៀមរាប បានឲ្យដឹងថា ជនសង្ស័យម្នាក់ពាក់ព័ន្ធករណីអូសទាញពេស្យាចារកុមារ និងករណីជ្រើសរើសដោយមិនស្របច្បាប់សម្រាប់កេងប្រវ័ញ្ចន៍ លើក្មេងចំនួន៥នាក់ ត្រូវបានកម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋានខេត្ត បានបញ្ជូនខ្លួន ទៅកាន់តុលាការខេត្តហើយកាលពីថ្ងៃទី១១ ខែមិថុនា ឆ្នាំ២០១៩ម្សិលមិញនេះ ។
លោកស្រីឧត្តមសេនីយ៍ត្រី បន្តថា ជនសង្ស័យដែលកម្លាំងសមត្ថកិច្ចចាប់ខ្លួនមានឈ្មោះ ពេត ម៉ៅ ភេទស្រី អាយុ២៣ឆ្នាំ ស្នាក់នៅភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប ។ ហើយការឃាត់ខ្លួននេះ ធ្វើឡើងតាមបញ្ជាលោក កើត វណ្ណារ៉េត ព្រះរាជអាជ្ញាអមសាលាដំបូង ខេត្តសៀមរាប កាលពីពីល្ងាច ថ្ងៃទី១០ ខែមិថុនា ឆ្នាំ២០១៩ ។
លោកស្រីបន្តទៀតថា ក្នុងប្រតិបត្តិការណ៍នេះ កម្លាំងសមត្ថកិច្ច បានជយយសង្គ្រោះក្មេងស្រីក្មេងស្រី ចំនួន៥នាក់
ដែលក្មេងស្រីទាំង០៥នាក់នេះ ត្រូវបានជនសង្ស័យ ឲ្យដើរសុំទាននៅផ្សារចាស់ តំបន់ផប់ស្ទ្រីត ចាប់ពីម៉ោងប្រហែល ១៩យប់ រហូតដល់ម៉ោង៣ទៀបភ្លឺ ទើបហៅក្មេងស្រីទាំងអស់ទៅជួបជុំគ្នា នៅស្ពានឈើមុខសណ្ឋាគារតាព្រហ្ម ហើយតម្រូវឲ្យក្មេងទាំងអស់បង់ប្រាក់ឲ្យខ្លួន ម្នាក់ ១០,០០០រៀល ទៅ ២០,០ ០០រៀល ក្នុង១យប់។ ហើយបើក្មេងទាំងអស់នោះមិនស្តាប់ ជនសង្ស័យគំរាមវាយធ្វើបាប ព្រមទាំងបង្ខំឲ្យក្មេងជក់គ្រឿងញៀន ហើយបើមានភ្ញៀវបរទេសណា ត្រូវការយកក្មេងទៅដេកជាមួយ ហើយជនសង្ស័យ ជាអ្នកជំរុញឲ្យទៅជាមួយជនបរទេសហើយបកប្រែភាសាឲ្យក្មេងៗ រួចដកយកភាគរយដែលជនបរទេសឲ្យលុយទៅក្មេងៗថែមទៀត។
សូមបញ្ជាក់ថា បច្ចុប្បន្ន ស្ត្រីជាជនសង្ស័យខាងលើ ត្រូវបានកម្លាំងនគរបាលជំនាញនៃស្នងការដ្ឋានខេត្តសៀមរាប កសាងសំណុំរឿងបញ្ជូនទៅតុលាការ នៅថ្ងៃទី១១ខែមិថុនាឆ្នាំ២០១៩នេះហើយ ដើម្បីចាត់ការតាមផ្លូវច្បាប់ ចំណែកឯក្មេងរងគ្រោះត្រូវបានបញ្ជូនទៅមណ្ឌលអប់រំ៕
អត្ថបទ និង រូបភាព ៖ ជា ស្រស់
កែសម្រួល ៖ អ៊ុន ណារាជ្យ
