ថ្លែងក្នុងឱកាសបើកសន្និសីទកំពូលសារព័ត៌មានអាស៊ីលើកទី១៦ ឆ្នាំ២០១៩ នៅខេត្តសៀមរាប កាលពីព្រឹកថ្ងៃទី១២ ខែមិថុនា ឆ្នាំ២០១៩នេះ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា ដើម្បីឲ្យបដិវត្តឧស្សាហកម្មជំនាន់ទី៤ ដែលជាចរន្តនៃការរីកលូតលាស់ផ្នែកវិទ្យាសាស្ត្រ ការធ្វើទំនើបកម្មបច្ចេកវិទ្យា ដើម្បីអភិវឌ្ឍទីផ្សារប្រព័ន្ធផ្សព្វផ្សាយឌីជីថល ការបង្កើនទំនុកចិត្តលើប្រព័ន្ធផ្សព្វផ្សាយព័ត៌មាន និងផ្តល់អត្ថប្រយោជន៍ដល់ការអភិវឌ្ឍសង្គម សេដ្ឋកិច្ច ការទំនាក់ទំនង និងសន្តិសុខ នៅក្នុងតំបន់ និងនៅលើសកលលោក ខ្ញុំសូមផ្តល់គំនិតផ្តួចផ្តើមនូវចំណុចអាទិភាពមួយចំនួនដល់អង្គសន្និសីទដូចខាងក្រោម៖
១. ជំរុញកិច្ចសហប្រតិបត្តិការក្នុងតំបន់ និងសកលលោក ដើម្បីផ្លាស់ប្តូរព័ត៌មាន បទពិសោធន៍ ការអភិវឌ្ឍបច្ចេកវិទ្យា និងការកសាងហេដ្ឋារចនាសម្ព័ន្ធជារូបវ័ន្ត ដើម្បីទាញយកអត្ថប្រយោជន៍ពីបដិវត្តន៍ឧស្សាហកម្មជំនាន់ទី៤ និងការបង្កើតឡើងនូវកាលានុវត្តភាពនៃបច្ចេកវិទ្យាឌីជីថល។
២. បង្កើនកិច្ចសហប្រតិបត្តិការប្រយុទ្ធប្រឆាំងទប់ស្កាត់ព័ត៌មានក្លែងបន្លំ និងឧក្រិដ្ឋកម្មព័ត៌មានវិទ្យា តាមប្រព័ន្ធផ្សព្វផ្សាយព័ត៌មាន ដោយផ្សព្វផ្សាយព័ត៌មានពិត ដើម្បីបន្សាបព័ត៌មានក្លែងបន្លំ។
៣. ពង្រឹងការអនុវត្តច្បាប់ ក្រមសីលធម៌វិជ្ជាជីវៈ ជៀសវាងការផ្សាយព័ត៌មានក្លែងបន្លំ គុំនំគុំគួន ការជេរប្រមាថ ការញុះញង់បញ្ឆេះកំហឹងដោយការស្អប់ខ្ពើម រើសអើង បង្កឲ្យមានអរិភាព បង្កជម្លោះ ជាតិសាសន៍ សាសនា ឬបំផ្លើសព័ត៌មានខុសពីការពិត ធ្វើឲ្យសភាពការណ៍មានភាពតានតឹង។
៤. ពង្រឹងកិច្ចសហប្រតិបត្តិការឲ្យបានជិតស្និទ្ធ ដើម្បីដោះស្រាយទំនាស់នៃការផ្សាយព័ត៌មាន ដែលបង្កឲ្យកើតមានអរិភាព និងផលប៉ះពាល់ផ្សេងៗ នៃការប្រើប្រាស់បច្ចេកវិទ្យាឌីជីថល។
៥. យកចិត្តទុកដាក់បង្កើនសមត្ថភាពយល់ដឹងទាំងផ្នែកបច្ចេកទេស និងវិជ្ជាជីវៈ ដើម្បីដើរទាន់តម្រូវការទីផ្សារ ការវិវត្តនៃបច្ចេកវិទ្យាប្រព័ន្ធផ្សព្វផ្សាយ និងការវិវត្តសភាពការណ៍សកលលោក។
៦. ប្រព័ន្ធផ្សព្វផ្សាយប្រពៃណី ត្រូវមានភាពវ័យឆ្លាត និងចេះបត់បែនទៅតាមស្ថានភាពជាក់ស្តែង និងការវិវត្តបច្ចេកវិទ្យាទំនើប ដើម្បីប្រឈមនឹងការប្រកួតប្រជែងទីផ្សារក្នុងយុគសម័យឌីជីថល។
៧. កសាងគោលនយោបាយក្របខ័ណ្ឌយុទ្ធសាស្ត្រ បទប្បញ្ញត្តិច្បាប់សម្រាប់ប្រព័ន្ធផ្សព្វផ្សាយព័ត៌មាន និងបទប្បញ្ញត្តិស្តង់ដាសុវត្ថិភាពឌីជីថល ដែលជាកត្តាចាំបាច់ក្នុងការគ្រប់គ្រងសុវត្ថិភាពទិន្នន័យ ការធ្វើពាណិជ្ជកម្ម ការទូទាត់តាមប្រព័ន្ធអេឡិកត្រូនិក និងសន្តិសុខតាមប្រព័ន្ធអ៊ីនធឺណិត ដើម្បីប្រឆាំងនឹងព័ត៌មានក្លែងបន្លំ និងឧក្រិដ្ឋកម្មព័ត៌មានវិទ្យា។
សម្ដេចតេជោ ហ៊ុន សែន បានមានប្រសាសន៍ថា ខ្ញុំសង្ឃឹមថា សន្និសីទនេះ នឹងពិភាក្សាយ៉ាងផុសផុលអំពីកាលានុវត្តភាពនៃបច្ចេកវិទ្យាឌីជីថល បញ្ហាប្រឈមនានា កិច្ចសហប្រតិបត្តិការជាដៃគូ ការប្រយុទ្ធប្រឆាំងទៅនឹងព័ត៌មានក្លែងបន្លំ ព្រមទាំងវិធីសាស្ត្រសម្រាប់ដោះស្រាយបញ្ហាដែលកើតចេញពីបដិវត្តន៍ឧស្សាហកម្មជំនាន់ទី៤ ក្នុងស្មារតីរួមចំណែកអភិវឌ្ឍសង្គម សេដ្ឋកិច្ច នៅក្នុងតំបន់ និងសកលលោក ប្រកបដោយចីរភាព និងសុខសន្តិភាពយូរអង្វែង។
គួររំលឹកថា នៅព្រឹកថ្ងៃទី១២ ខែមិថុនា ឆ្នាំ២០១៩នេះ សន្និសីទកំពូលសារព័ត៌មានអាស៊ីលើកទី១៦ ឆ្នាំ២០១៩ ដែលបានប្រារព្ធធ្វើឡើងនៅខេត្តសៀមរាប បានប្រកាសបើកជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានការចូលរួមពីសំណាក់ ឯកឧត្ដម លោកជំទាវ លោក លោកស្រី ជាសមាជិកព្រឹទ្ធសភា រដ្ឋសភា ឥស្សរជនជាន់ខ្ពស់រាជរដ្ឋាភិបាល សមាជិករាជរដ្ឋាភិបាល ថ្នាក់ដឹកនាំនិងតំណាងក្រសួងស្ថាប័នរដ្ឋ ឯកអគ្គរដ្ឋទូត អគ្គរាជទូតបរទេសចំនួន១១ប្រចាំនៅកម្ពុជា រដ្ឋមន្ត្រី អនុរដ្ឋមន្ត្រីក្រសួងព័ត៌មាននៃប្រទេសក្នុងតំបន់ចំនួន៦ ប្រធាននិងសមាជិកក្រុមប្រឹក្សាខេត្តសៀមរាប អភិបាលនិងអភិបាលរងខេត្តសៀមរាប មេបញ្ជាការ មេបញ្ជាការរង ស្នងការ ស្នងការរង និងថ្នាក់ដឹកនាំមន្ទីរ អង្គភាពនានាក្នុងខេត្តសៀមរាប ថ្នាក់ដឹកនាំមន្ទីរព័ត៌មានរាជធានី ខេត្តទាំង២៥ គណៈប្រតិភូជាអន្តរជាតិ អ្នកសារព័ត៌មានជាតិ និងអន្តរជាតិ ចូលរួមប្រមាណ៥០០នាក់ មកពីបណ្ដាប្រទេសចំនួន៤២ នៅក្នុងតំបន់អាស៊ី-ប៉ាស៊ីហ្វិក ៕
អត្ថបទ ៖ លោក លីវ សាន្ត
រូបថត ៖ លោក យូ វង្ស
