មន្ត្រីជាន់ខ្ពស់ក្រសួងការពារជាតិកម្ពុជា បង្ហាញថា បើទោះជាដំណាក់កាលខ្លះមានភាពរអាក់រអួលក៏ដោយ ក៏ប៉ុន្តែកិច្ចទំនាក់ទំនងរវាងប្រទេសកម្ពុជាជាមួយប្រទេសថៃ មានលក្ខណៈជាពិសេស ដែលធ្វើឲ្យកិច្ចសហប្រតិបត្តិការទ្វេភាគី មានដំណើរទៅមុខជារៀងរហូតមក !
កាលពីថ្ងៃទី១២ ខែមិថុនា ឆ្នាំ២០១៩ នាយឧត្តមសេនីយ៍ ណឹប សុវត្តិ ទីប្រឹក្សាពិសេស និងជាអគ្គនាយកនៃអគ្គនាយកដ្ឋាន នយោបាយនិងកិច្ចការបរទេសក្រសួងការពារជាតិកម្ពុជា ថ្លែងនៅក្នុងបទឧទ្ទេសនាម ស្តីពីកិច្ចសហប្រតិបត្តិការ កម្ពុជា-ថៃ ក្នុងទសវត្សខាងមុខ ក្រោមវត្តមានរបស់សិក្ខាកាមប្រមាណជាង២០០នាក់ មកពីមហាវិទ្យាល័យវិទ្យាល័យការពារជាតិថៃ ដោយបង្ហាញថា ៖ បើទោះជាមានដំណាក់កាលខ្លះ មានភាពរអាក់រអួលក៏ដោយ ក៏ប៉ុន្តែកិច្ចទំនាក់ទំនងរវាងប្រទេសកម្ពុជាជាមួយប្រទេសថៃ មានលក្ខណៈជាពិសេស ហើយប្រការដែលធ្វើឲ្យកិច្ចសហប្រតិបត្តិការនោះ មានដំណើរការទៅមុខជារៀងរហូតមក គឺអាស្រ័យទៅលើតួនាទីនៃថ្នាក់ដឹកនាំកំពូលនៃប្រទេសទាំងពីរ ជាកត្តាសំខាន់ ។
ឯកឧត្តមបញ្ជាក់បន្ថែមថា ក្នុងចំណុចនេះក៏អាចសង្កេតឃើញបានដែរថា បើទោះជាព្រះរាជាណាចក្រថៃ មានការផ្លាស់ប្តូរ និង កែសម្រួលអ្នកដឹកនាំជាច្រើនយ៉ាងណាក្តី ក៏ប៉ុន្តែព្រះរាជាណាចក្រកម្ពុជា នៅតែរក្សានិរន្តរភាពនៃការទំនាក់ទំនងកិច្ចសហប្រតិបត្តិការល្អដោយឥតប្រែប្រួល ។ ដោយសារទស្សនៈរបស់ថ្នាក់ដឹកនាំរបស់កម្ពុជា មានភាពច្បាស់លាស់យ៉ាងដូច្នេះ បានធ្វើឲ្យរាល់សភាពការណ៍ដែលកើតឡើងក្នុងក្របខ័ណ្ឌណាក្តី គឺទទួលបាននូវដំណោះស្រាយយ៉ាងល្អប្រសើរ ដែលប្រការទាំងនេះ ឆ្លុះបញ្ចាំងទៅលើព្រឹត្តិការណ៍ដែលកើតមានជាហូរហែរកន្លងមក ។
នាយឧត្តមសេនីយ៍ ណឹប សុវត្ថិ បន្ថែមថា ៖ ក៏ជាបញ្ហាសំខាន់ផងដែរ គឺកត្តាតួអង្គដែលត្រូវបានអនុវត្តជាក់ស្តែងរវាងកងទ័ពនៃប្រទេសទាំងពីរ(កម្ពុជានិងថៃ) ជានិច្ចកាលពង្រឹងបាននូវកិច្ចសហប្រតិបត្តិការទ្វេភាគី ក្នុងក្របខ័ណ្ឌជាច្រើនដែលរួមមាន ការបណ្តុះបណ្តាលធនធានមនុស្ស ការផ្លាស់ប្តូរទស្សនកិច្ចទៅវិញទៅមក ការជួយចែករំលែកឲ្យគ្នាក្នុងការហ្វឹកហ្វឺនជាដើមនោះ ។
គួរបញ្ជាក់ដែរថា មហាវិទ្យាល័យការពារជាតិថៃ ក្រោមការដឹកនាំដោយសាស្ត្រចារ្យចំនួន៣០រូប សិក្ខាកាមប្រមាណជាង២០០នាក់ដែលជាមន្ត្រីជាន់ខ្ពស់មកពីស្ថាប័នយោធា នគរបាល និង ស្ថាប័នស៊ីវិលផងដែរ មានវត្តមាននៅខេត្តសៀមរាប ចាប់ពីថ្ងៃទី១០ ដល់ថ្ងៃទី១៤ ខែមិថុនា ឆ្នាំ២០១៩ ដើម្បីសិក្សាស្វែងយល់អំពីប្រទេសកម្ពុជាលើវិស័យជាច្រើនដូចជា ប្រវត្តិសាស្ត្រ សង្គម វប្បធម៌ ប្រពៃណី និង បរិស្ថាន ព្រមទាំងមានគម្រោងធ្វើទស្សនកិច្ចនៅរមណីយដ្ឋានប្រវត្តិសាស្ត្រអង្គរផងដែរ ៕
អត្ថបទនិងរូបភាព៖ ងឹន គីមឡេង
