ក្រោយពីគណៈកម្មការរដ្ឋបាល បានបញ្ចប់នីតិវិធីការចុះបញ្ជីលក្ខណៈ ជាប្រព័ន្ធរួចមក ហើយក្បាលដីដែលបានបំពេញនូវលក្ខខ័ណ្ឌគ្រប់គ្រាន់តាមនីតិវិធី និង អាចចេញប័ណ្ណកម្មសិទ្ធិសរុបទាំងអស់ចំនួន ១.១៩៣ ក្បាលដី ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ត្រូវបានលោក ង៉ាន់ ភិរុណ អភិបាលរងខេត្ត និង ជាតំណាង ឯកឧត្ដម ទៀ សីហា អភិបាលខេត្តសៀមរាប បានចែកជូនវិញ្ញាបនបត្រសម្គាល់ម្ចាស់អចលនវត្ថុ នៅព្រឹកថ្ងៃទី១៤ ខែមិថុនា ឆ្នាំ២០១៩នេះ ។
លោក ហ៊ី សាយ ប្រធានមន្ទីររៀបចំដែនដី នគរូបណីយកម្ម សំណង់ និងសូរិយោដីខេត្តសៀមរាប បានឲ្យដឹងថា យោងតាមលទ្ធផលនៃការចុះបញ្ជីដីធ្លីលក្ខណៈជាប្រព័ន្ធនៅភូមិចុងកៅស៊ូ មានចំនួន ១.២៩៦ ក្បាលដី ប៉ុន្តែក្នុងនោះមានក្បាលដីចំនួន១.១៩៣ ប៉ុណ្ណោះ ដែលទទួលបានប័ណ្ណកម្មសិទ្ធិនៅពេលនេះ ហើយចំណែកនៅក្បាលដីដែលនៅសេសសល់មិនទាន់បានចេញប័ណ្ណសម្គាល់អចលនទ្រព្យជូននោះ ដោយសារគណៈកម្មការរដ្ឋបាល កំពុងពិនិត្យនិងដោះស្រាយបញ្ហាពាក់ព័ន្ធមួយចំនួន ហើយនឹងឈានទៅចេញប័ណ្ណជូនប្រជាពលរដ្ឋនាពេលឆាប់ៗខាងមុខ ហើយការចេញប័ណ្ណកម្មសិទ្ធិជូនប្រជាពលរដ្ឋ គឺជាការទិសដៅរបស់រាជរដ្ឋាភិបាលក្នុងការលើកកម្ពស់ជីវភាពប្រជាពលរដ្ឋ និងកាត់បន្ថយទំនាស់ដីធ្លី ។
លោក ង៉ាន់ ភិរុណ អភិបាលរងខេត្តសៀមរាប មានប្រសាសន៍ថា កន្លងមក នៅក្នុងដំណើរការចុះបញ្ជីដីធ្លីនៅក្នុងខេត្តសៀមរាប បានជួបប្រទះនឹងឧបស័គ្គ និងការស្មុគស្មាញមួយចំនួន ប៉ុន្តែរដ្ឋបាលខេត្ត បានខិតខំស្វែងរកបញ្ហាប្រឈម និងដោះស្រាយបញ្ហានេះបានយ៉ាងល្អប្រសើរ ហើយបងប្អូនប្រជាពលរដ្ឋដែលជាម្ចាស់ក្បាលដី នៅមិនទាន់ទទួលបានប័ណ្ណកម្មសិទ្ធិ ដោយសារបញ្ហាជាដីទំនាស់ ជាដីជាប់បុរាណដ្ឋាន ជាប់មាត់ប្រឡាយ ជាដើម ខណៈខាងអាជ្ញាធរកំពុងខិតខំដោះស្រាយបញ្ហាទាំងនេះ ជូនប្រជាពលរដ្ឋជាបណ្តើរៗហើយដែរ ។
លោក ង៉ាន់ ភិរុណ មានប្រសាសន៍ទៀតថា ជាបទពិសោធន៍ ដើម្បីសម្រេចបានដល់ការចេញវិញ្ញាបនប័ត្រសម្គាល់ម្ចាស់អចលនវត្ថុនិមួយៗ គឺមានការងារច្រើនណាស់ ដែលទាមទារនូវការខិតខំប្រឹងប្រែងរបស់មន្ត្រីជំនាញ និងការចូលរួមពីសំណាក់ប្រជាពលរដ្ឋដែលជាម្ចាស់ដី ឬនិង អ្នកកាន់កាប់ដីទាំងអស់ ទាំងដីរដ្ឋ និងដីឯកជន ដូច្នេះតាមរយៈនេះដែរ សូមថ្លែងអំណរគុណដល់បងប្អូនប្រជាពលរដ្ឋជាម្ចាស់ក្បាលដីទាំងអស់ ដែលបានចូលរួមរុះរើរបងបើកផ្លូវ ធ្វើឲ្យការធ្វើដំណើរ និងការប្រកបអាជីវកម្មរបស់បងប្អូនជួបប្រទះតែសុវត្ថិភាព និងចូលរួមធ្វើឲ្យទីក្រុងរបស់យើង មានបណ្តាញផ្លូវកាន់ តែធំទូលាយ ព្រមទាំងធ្វើឲ្យមានសុវត្ថិភាព និងសោភ័ណភាពពីមួយថ្ងៃទៅមួយថ្ងៃអត់ឈប់ឈរ។
លោក ង៉ាន់ ភិរុណ មានប្រសាសន៍បន្ថែមទៀតថា អាជ្ញាធរខេត្ត បានយកចិត្តទុកដាក់លើការងាររដ្ឋបាលដីធ្លី ដែលជាគន្លឹះដ៏សំខាន់សម្រាប់ឈានទៅរកភាពជោគជ័យ ក្នុងការផ្តល់នូវកម្មសិទ្ធិ និងសិទ្ធិផ្សេងៗទៀតទាំងអស់ ឲ្យបានច្បាស់លាស់ ហើយធ្វើការផ្ទេរសិទ្ធិលើទ្រព្យទាំងនោះជាផ្លូវការ ទប់ស្កាត់ និងដោះស្រាយវិវាទដីធ្លី សំដៅពង្រឹងសុវត្ថិភាពនៃការកាន់កាប់ដីធ្លី ធានាបាននូវទំនុកចិត្ត និងប្រសិទ្ធិភាពនៃទីផ្សារដីធ្លី ព្រមទាំងការគ្រប់គ្រងដីរដ្ឋ ស្របតាមយុទ្ធសាស្ត្រចតុកោណរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា តាមរយៈការដាក់ចេញនូវចក្ខុវិស័យវែងឆ្ងាយដ៏ត្រឹមត្រូវ សម្រាប់ការអភិវឌ្ឍប្រទេសជាតិ រួមជាមួយនឹងគោលនយោបាយ និងយុទ្ធសាស្ត្រ ប្រកបដោយភាពសក្តិសិទ្ធិ ប្រាកដនិយម និងភាពម៉ឹងម៉ាត់ ក្នុងនោះការចុះបញ្ជីដីធ្លីគោរពបាន នូវគោលការណ៍អភិបាលកិច្ចល្អ តម្លាភាព វិមជ្ឈការ និងវិសហមជ្ឈការ និងសមធម៌ ដើម្បីបង្កើតបានជាវប្បធម៌នៃការចុះបញ្ជីដីធ្លី និងបង្កើនភាពជឿជាក់លើប្រព័ន្ធចុះបញ្ជីដីធ្លី ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
