ឯកឧត្តម មាស សុភណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន មានប្រសាសន៍ថា ក្រោយពីដំណើរការអស់រយៈពេល៤ថ្ងៃ នៃសន្និសីទកំពូលសារព័ត៌មានអាស៊ី លើកទី១៦ ដែលកម្ពុជាធ្វើជាម្ចាស់ផ្ទះ ប្រារព្ធធ្វើឡើងនៅខេត្តសៀមរាប ពីថ្ងៃទី១០ ដល់ថ្ងៃទី១៣ ខែមិថុនា ឆ្នាំ២០១៩នេះ អង្គសន្នីសីទបានបិទបញ្ចប់ការងាររបស់ខ្លួន នៅរសៀលថ្ងៃទី១៣ ខែមិថុនា ឆ្នាំ២០១៩ ក្រោមអធិបតីភាព ឯកឧត្តម ខៀវ កាញារីទ្ឋ រដ្ឋមន្ត្រីក្រសួងព័ត៌មាន ព្រមទាំងមានការផ្តល់រង្វាន់ជ័យលាភី ដល់ស្ថាប័នសារព័ត៌មានជាតិ និងអន្តរជាតិ ដែលមានស្នាដៃលេចធ្លោលើវិស័យព័ត៌មាន នៅពេលបានលើកមកក្នុងបទបង្ហាញជាបន្តបន្ទាប់។
ឯកឧត្តម មាស សុភណ្ឌ មានប្រសាសន៍ទៀតថា អង្គសន្និសីទកំពូលសារព័ត៌មានអាស៊ីលើកទី១៦ នេះ បានចេញសេចក្តីថ្លែងការណ៍រួមចំនួន៦ចំណុច ដោយរួមគ្នាប្រឆាំងព័ត៌មានក្លែងបន្លំ ក្នុងយុគសម័យឌីជីថល សំដៅបង្កើនគុណភាព ប្រសិទ្ធភាព ក្នុងវិស័យព័ត៌មាន ពិសេសផ្តល់ទំនុកចិត្តដល់អ្នកស្តាប់ អ្នកមើល និងអ្នកអាន រួមមាន៖
១. នាថ្ងៃទី១២ ខែមិថុនា ឆ្នាំ ២០១៩ រដ្ឋមន្ត្រីព័ត៌មានមកពីប្រទេសបង់ក្លាដេស កម្ពុជា មីយ៉ាន់ម៉ា និងហ្វីលីពីន រួមទាំងប្រធានគណៈកម្មាធិការទំនាក់ទំនង និងព័ត៌មាននៃប្រទេសកូរ៉េ និងអនុរដ្ឋមន្ត្រីព័ត៌មាននៃប្រទេសសាម៉ាវ បានចូលរួមកិច្ចប្រជុំថ្នាក់រដ្ឋមន្ត្រីអាស៊ី-ប៉ាស៊ីហ្វិកនៅប្រទេសកម្ពុជា ក្នុងគោលបំណងរួមគ្នាដោះស្រាយនូវបញ្ហាសំខាន់ៗរបស់ប្រព័ន្ធផ្សព្វផ្សាយ ជាពិសេសពិភាក្សាពីមធ្យោបាយក្នុងការប្រយុទ្ធប្រឆាំងនឹងការរីករាលដាលនៃព័ត៌មានក្លែងក្លាយដែលបានផ្សព្វផ្សាយលើប្រព័ន្ធផ្សព្វផ្សាយនានា និងផលប៉ះពាល់អវិជ្ជមានដល់សង្គម។
២. រដ្ឋមន្ត្រី និងមន្ត្រីជាន់ខ្ពស់បានព្រមព្រៀងគ្នាដាក់ឲ្យដំណើរការ “គំនិតផ្តួចផ្តើមប្រឆាំងព័ត៌មានក្លែងក្លាយអង្គរ” (Angkor Fake News Initiative) ដែលជាគម្រោងស្រាវជ្រាវរយៈពេលមួយឆ្នាំលើការប្រយុទ្ធប្រឆាំងព័ត៌មានក្លែងក្លាយ និងផលប៉ះពាល់អវិជ្ជមានដល់សង្គម ហើយវិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ី-ប៉ាស៊ីហ្វិក (AIBD) និងអង្គការយូណេស្កូ នឹងសហការក្នុងភាពជាដៃគូជាមួយសមាជិក និងដៃគូរបស់វិទ្យាស្ថាន ABD ដទៃទៀត នឹងដឹកនាំកិច្ចខិតខំប្រឹងប្រែងនេះ ដែលលទ្ធផលនៃការស្រាវជ្រាវ និងអនុសាសន៍នានា នឹងជួយបង្កើតយន្តការច្បាប់មួយនៅក្នុងបណ្តាប្រទេសជាសមាជិក និងប្រទេសដទៃទៀត ដើម្បីជាវិធានការក្នុងការប្រយុទ្ធប្រឆាំងនឹងការគំរាមកំហែងនៃព័ត៌មានក្លែងក្លាយ ដែលឥឡូវនេះកំពុងរីករាលដាលនៅគ្រប់ទីកន្លែងលើពិភពលោក។
៣. រដ្ឋមន្ត្រី និងមន្ត្រីជាន់ខ្ពស់ក៏បានសម្រេចចិត្តយកសន្និសីទកំពូលសារព័ត៌មានអាស៊ីដែលជាព្រឹត្តិការប្រចាំឆ្នាំ ជាវេទិកាអចិន្ត្រៃយ៍សម្រាប់រដ្ឋមន្ត្រី និងភាគីពាក់ព័ន្ធនៅក្នុងតំបន់អាស៊ី-ប៉ាស៊ីហ្វិក ធ្វើការពិនិត្យ និងពិភាក្សាលើបញ្ហាសំខាន់ៗ ក្នុងប្រព័ន្ធផ្សព្វផ្សាយរួមមាន បញ្ហាប្រឈម និងកាលានុវត្តភាព នៃប្រព័ន្ធផ្សព្វផ្សាយក្នុងយុគសម័យបដិវត្តន៍ឧស្សាហកម្មជំនាន់ទី៤។
៤. រដ្ឋមន្ត្រី និងមន្ត្រីជាន់ខ្ពស់បានព្រមព្រៀងគ្នារៀបចំកិច្ចប្រជុំពិសេស នៃរដ្ឋមន្ត្រីថ្នាក់ព័ត៌មានអាស៊ី-ប៉ាស៊ីហ្វិក និង មានការចូលរួមពីបណ្តាដៃគូសំខាន់ៗនៃវិទ្យាស្ថាន AIBD នៅប្រទេសសាម៉ាវ ក្នុងខែកញ្ញា ឆ្នាំ២០១៩ ខាងមុខនេះ ហើយរដ្ឋមន្ត្រី និងមន្ត្រីជាន់ខ្ពស់ក៏បានឯកភាពគ្នាជាឯកច្ឆ័ន្ទថាអាស៊ី-ប៉ាស៊ីហ្វិក ត្រូវការផែនទីបង្ហាញផ្លូវ (Road Map) ដើម្បីទប់ទល់នឹងព័ត៌មានក្លែងក្លាយ យើងទាំងអស់គ្នាគួររួបរួមគ្នាក្នុងបុព្វហេតុនេះ ដើម្បីការពារ និងរក្សាសង្គមមួយប្រកបដោយវិបុលសុខ និងបរិយាបន្ន ហើយវិទ្យាស្ថាន AIBD នឹងបញ្ជូនសំណើទៅប្រទេសសាម៉ាវក្នុងរយៈពេល១៥ថ្ងៃដើម្បីធានាការសម្រេចបាននូវកិច្ចប្រជុំនេះ។
៥. ក្រៅពីវិធានការប្រយុទ្ធប្រឆាំងនឹងព័ត៌មានក្លែងក្លាយ រដ្ឋមន្ត្រី និងមន្ត្រីជាន់ខ្ពស់ ក៏បានយល់ព្រមពិភាក្សានៅក្នុងកិច្ចប្រជុំថ្នាក់រដ្ឋមន្ត្រីថា តើគួរជួយសហគមន៍ដែលមិនទាន់ទទួលអត្ថប្រយោជន៍ ពីការធ្វើឌីជីថលភាវូបនីយកម្មដោយរបៀបណា ហើយជាការចាំបាច់ក្នុងត្រួតពិនិត្យឡើងវិញ ពីតួនាទីប្រព័ន្ធផ្សព្វផ្សាយរដ្ឋក្នុងការគាំទ្រ និងផ្តល់នូវជំនួយដល់ក្រុមដែលជួបការលំបាកនៅក្នុងសង្គម។
៦. រដ្ឋមន្ត្រី និងមន្ត្រីជាន់ខ្ពស់រីករាយចំពោះកិច្ចសហការ និងការគាំទ្ររបស់លោកអ្នក ។
សូមបញ្ជាក់ថា កាលពីព្រឹកថ្ងៃទី១២ ខែមិថុនា ឆ្នាំ២០១៩នេះ សន្និសីទកំពូលសារព័ត៌មានអាស៊ីលើកទី១៦ ឆ្នាំ២០១៩ ដែលបានប្រារព្ធធ្វើឡើងនៅខេត្តសៀមរាប បានប្រកាសបើកជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានការចូលរួមពីសំណាក់ ឯកឧត្ដម លោកជំទាវ លោក លោកស្រី ជាសមាជិកព្រឹទ្ធសភា រដ្ឋសភា ឥស្សរជនជាន់ខ្ពស់រាជរដ្ឋាភិបាល សមាជិករាជរដ្ឋាភិបាល ថ្នាក់ដឹកនាំនិងតំណាងក្រសួងស្ថាប័នរដ្ឋ ឯកអគ្គរដ្ឋទូត អគ្គរាជទូតបរទេសចំនួន១១ប្រចាំនៅកម្ពុជា រដ្ឋមន្ត្រី អនុរដ្ឋមន្ត្រីក្រសួងព័ត៌មាននៃប្រទេសក្នុងតំបន់ចំនួន៦ ប្រធាននិងសមាជិកក្រុមប្រឹក្សាខេត្តសៀមរាប អភិបាលនិងអភិបាលរងខេត្តសៀមរាប មេបញ្ជាការ មេបញ្ជាការរង ស្នងការ ស្នងការរង និងថ្នាក់ដឹកនាំមន្ទីរ អង្គភាពនានាក្នុងខេត្តសៀមរាប ថ្នាក់ដឹកនាំមន្ទីរព័ត៌មានរាជធានី ខេត្តទាំង២៥ គណៈប្រតិភូជាអន្តរជាតិ អ្នកសារព័ត៌មានជាតិ និងអន្តរជាតិ ចូលរួមប្រមាណ៥០០នាក់ មកពីបណ្ដាប្រទេសចំនួន៤២ នៅក្នុងតំបន់អាស៊ី-ប៉ាស៊ីហ្វិក ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត