មានមតិសំណេះសំណាលជាមួយអាជ្ញាធរមូលដ្ឋាន សមាជិក សមាជិកាក្រុមការងារថ្នាក់ជាតិចុះមូលដ្ឋានស្រុកក្រឡាញ់ នៅព្រឹកថ្ងៃទី១៤ ខែមិថុនា ឆ្នាំ២០១៩នេះ ឯកឧត្តម ជា ចន្ទ័បរិបូរណ៍ រដ្ឋលេខាធិការក្រសួងព័ត៌មាន និងជាប្រធានក្រុមការងារថ្នាក់ជាតិចុះជួយស្រុកក្រឡាញ់ ខេត្តសៀមរាប បានក្រើនរំលឹកដល់អាជ្ញាធរភូមិឃុំ មន្ត្រីតាមបណ្តាការិយាល័យក្នុងស្រុក និងសមាជិក សមាជិកាក្រុមការងារថ្នាក់ជាតិចុះជួយស្រុកក្រឡាញ់ទាំងអស់ ត្រូវបន្តបម្រើសេវាសាធារណៈដែលជាតម្រូវការចាំបាច់ជូនប្រជាពលរដ្ឋឱ្យកាន់តែល្អប្រសើរថែមទៀត ដោយប្រកាន់ខ្ជាប់តែអំពើល្អ និងត្រូវអនុវត្តការងារទៅតាមតួនាទីភារកិច្ចរបស់ខ្លួន ចៀសវាងនូវបាតុភាពស៊ីសំណូកសូកប៉ាន់ លើការផ្តល់សេវាសាធារណៈផ្សេងៗ ។
ឯកឧត្តម ជា ចន្ទ័បរិបូរណ៍ មានប្រសាសន៍ទៀតថា គោលបំណងសំខាន់នៃកិច្ចប្រជុំនេះ គឺដើម្បីស្តាប់មតិយោបល់ ក្តីកង្វល់ និង បញ្ហាប្រឈមរបស់អាជ្ញាធរមូលដ្ឋាន និងក្រុមការងារទាំងអស់ ក្នុងការអនុវត្តការងារក្នុងអាណត្តិទី១កន្លងមក ជាពិសេសដើម្បីពង្រឹងយន្តការបន្តការគាំទ្រនូវការអនុវត្តន៍កម្មវិធីគោលនយោបាយ និងយុទ្ឋសាស្ត្រចតុកោណដំណាក់កាលទី៤ របស់រាជរដ្ឋាភិបាលសម្រាប់គោលដៅស្រុកនេះថា តើការអនុវត្តកន្លងមកសម្រេចបានអ្វីខ្លះ និងនៅខ្វះខាតចំណុចអ្វីខ្លះ ដែលត្រូវកែសម្រួល ត្រូវរួមគ្នាបំពេញបន្ថែម ដែលនេះជាជំនួបប្រជុំលើកដំបូងសម្រាប់អាណត្តិទី២នៃក្រុមការងារថ្នាក់ជាតិនិងថ្នាក់ខេត្តចុះជួយស្រុកក្រឡាញ់ ។
ឯកឧត្តម ជា ចន្ទ័បរិបូរណ៍ បានមានប្រសាសន៍បន្ថែមទៀតថា អាជ្ញាធរមូលដ្ឋានគ្រប់លំដាប់ថ្នាក់ និងសមាជិកក្រុមការងារទាំងអស់ ត្រូវចងចាំថា ការបំពេញតួនាទីភារៈកិច្ចក្នុងការងារ បើមានចំណុចល្អគឺមិនសូវទទួលបានការកោតសរសើរនោះទេ តែបើភ្លាត់ឱ្យមានលេចចេញចំណុចមិនល្អនោះ អ្វីៗដែលខំធ្វើកន្លងមកវាក្លាយទៅជាអសារឥតការ ដូចពាក្យចាស់ថា ធ្វើគុណមួយសំពៅទោសតូចមួយចូលទៅរលាយគុណអស់ ដូច្នេះ សូមប្រយ័ត្នជនឆ្លៀតឱកាសមកបំផ្លាញកិច្ចការងារយើង ព្រោះគោលដៅបន្តរបស់យើង គឺការពារសមិទ្ឋផលដែលបាននឹងកំពុងអនុវត្តឱ្យបានខ្ជាប់ខ្ជួន ដោយឈរលើការពង្រឹងគោលជំហរសតិអារម្មណ៍ រក្សាសាមគ្គីផ្ទៃក្នុង ស្គាល់ច្បាស់ពីតួនាទីភារកិច្ចរបស់ខ្លួន និងរួមគ្នាទប់ស្កាត់នូវបាតុភាពអសកម្មដែលនាំឱ្យបែកបាក់សាមគ្គីផ្ទៃក្នុង ជាពិសេស ធ្វើយ៉ាងណាពង្រឹងឱ្យកាន់តែមានប្រសិទ្ឋភាពថែមទៀតលើការបំរើសេវាសាធារណៈដែលជាកញ្ចប់សេវាតំរូវការចាំចាប់របស់ប្រជាពលរដ្ឋ ។
ឯកឧត្តម ជា ចន្ទ័បរិបូរណ៍ បានសំណូមពរដល់រដ្ឋបាលស្រុក និងកងកម្លាំងមានសមត្ថកិច្ចក្នុងមូលដ្ឋានស្រុកក្រឡាញ់ត្រូវរួមគ្នាបំផុសដល់សិស្សានុសិស្ស និងប្រជាពលរដ្ឋ ឱ្យស្រឡាញ់បរិស្ថាន អនាម័យសាធារណៈ ជាពិសេសគួរនាំគ្នាសំអាតអនាម័យបរិស្ថាននៅទីប្រជុំជនស្រុក ឱ្យបានជាប្រចាំ និង ត្រូវពង្រឹងផងដែរ ទៅលើសណ្តាប់ធ្នាប់សាធារណៈ រួមគ្នាបំផុសបន្ថែមទៀតឱ្យប្រជាពលរដ្ឋ និងអ្នកបើកបរគោរពច្បាប់ចរាចរណ៍ផ្លូវគោក ព្រមទាំងសហការគ្នា ទប់ស្កាត់ឱ្យបានជាប្រចាំ ដោយអនុវត្ដតាមគោលនយោបាយភូមិឃុំមានសុវត្ថិភាពទាំង៩ចំណុច ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
