លោក ថា ដាលុច មេបញ្ជាការរង កងរាជអាវុធហត្ថខេត្តសៀមរាបទទួលបន្ទុកការងារយុត្តិធម៌ បានឲ្យដឹងថា ជនជាតិចិនចំនួន១៣នាក់ ក្នុងនោះមានស្រី២នាក់ ត្រូវបានកម្លាំងកងរាជអាវុធហត្ថខេត្តសៀមរាប ធ្វើការចាប់ខ្លួនពាក់ព័ន្ធនឹងការបើកល្បែងស៊ីសងតាមអ៊ីនធឺណេតខុសច្បាប់ ត្រូវបានកំលាំងជំនាញបានកសាងសំណុំរឿង ហើយបញ្ជូនខ្លួនជនសង្ស័យ និងវត្ថុតាងទៅសាលាដំបូងខេត្តសៀមរាប នៅព្រឹកថ្ងៃទី១៥ ខែមិថុនា ឆ្នាំ២០១៩នេះ ។
លោក ថា ដាលុច បន្តថា ជនជាតិចិនចំនួន១៣នាក់នេះ ត្រូវបានឃាត់ខ្លួន ដោយកម្លាំងកងរាជអាវុធហត្ថខេត្តសៀមរាប កាលពីវេលាម៉ោង១៥ និង០០នាទី ថ្ងៃទី១៣ ខែមិថុនា ឆ្នាំ២០១៩ នៅចំណុចភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប ។ ក្រោយសាកសួររួចមក ជនសង្ស័យខាងលើបានសារភាពថា ពួកគេពិតជាបានប្រព្រឹត្តិករណីនេះពិតប្រាកដមែន ដោយពួកគេជាបុគ្គលិកបំរើការងារឲ្យល្បែងស៊ីសងតាមប្រព័ន្ធអ៊ិនធឺណិត ។
សូមបញ្ជាក់ថា នៅក្នុងប្រតិបត្តិការនេះ កម្លាំងកងរាជអាវុធហត្ថ ក៏បានដកហូតកុំព្យូទ័រយួរដៃ ០៦គ្រឿង ទូរស័ព្ទដៃ ២៩គ្រឿង ឆ្នាំងសាកកុំព្យូទ័រ និងឆ្នាំងសាកទូរស័ព្ទ និងវត្ថុតាងមួយចំនួនទៀត ៕
អត្ថបទ និង រូបភាព ៖ ជា ស្រស់, ខេង ឧត្តម
កែសម្រួល ៖ អ៊ុន ណារាជ្យ
