បន្ទាប់ពីបានបញ្ចប់ដោយជោគជ័យនៃដំណើរការ អង្គសន្និសីទកំពូលប្រពន្ធ័ផ្សព្វផ្សាយ អាស៊ី AMS លើក ទី១៦ នៅលើទឹកដីអង្គរនៃខេត្តសៀមរាបរួចមក នៅរសៀលថ្ងៃទី១៤ ខែមិថុនា ឆ្នាំ២០១៩ គណះប្រតិភូសារ ព័ត៌មាន អន្តរជាតិមកពី ទូទាំងពិភពលោក ជាច្រើនរយនាក់ រួមជាមួយ ឯកឧត្តម យូប៉េ ញីន (U Pe Myint) រដ្ឋមន្ត្រី ព័ត៌មាន នៃសហភាព មីយ៉ាន់ម៉ា ឯកឧត្តម ហាសាន់ ម៉ាហាម៉ាត់ (Hasan Mahmud) រដ្ឋមន្ត្រីព័ត៌មាន នៃប្រទេស បង់ក្លាដេស និង ឯកឧត្តម លេលៃឡេពូល រីមម៉ូនី អាហ្វី (Lealailepule Rimoni Aiafí) អនុរដ្ឋមន្ត្រី ព័ត៌មាននៃប្រទេសសារម៉ៅ ដែលបានមកចូលរួមក្នុងអង្គសន្និសីទបានអញ្ជើញទៅទស្សនាសារមន្ទីរសន្តិភាព សកម្មភាពកំចាត់មីនខេត្តសៀមរាប។ ។
ឯកឧត្តម កឹម គុណវឌ្ឍ ឯកឧត្តម ទន់ សារ៉ាត រដ្ឋលេខាធិការ ឯកឧត្តម ហាស់ សំអាត អនុរដ្ឋលេខាធិការ ក្រសួងព័ត៌មាន បានអញ្ជើញជូនដំណើរ គណះប្រតិភូសារ ព័ត៌មាន អន្តរជាតិ រួមជាមួយ រដ្ឋមន្ត្រី អនុរដ្ឋមន្ត្រី ព័ត៌មាន ទៅទស្សនាសារ មន្ទីរសន្តិភាពសកម្មភាពកំចាត់មីន មានទីតាំងស្ថិតនៅក្នុងបរិវេណនៃទីបញ្ជាការស៊ីម៉ាក់ភូមិភាគ២ ខេត្តសៀមរាប ដែលមានផ្ទៃ ដី ទំហំ ១២ ហិកតា ។ ទីបញ្ជាការនេះ រួមមានអង្គភាពចំនួន៣ សំខាន់ៗ របស់ ស៊ីម៉ាក់គឺ កងឯកភាព កំចាត់មីនទី៤ មជ្ឈមណ្ឌល សុនខជាតិ និង សារមន្ទីរសន្តិភាពសកម្មភាព កំចាត់មីន។
តាមការបញ្ជាក់របស់អ្នកគ្រប់គ្រងសារមន្ទីរសន្តិភាពសកម្មភាពកំចាត់មីនខេត្តសៀមរាប បានអោយដឹងថា សារមន្ទីរសន្តិភាពសកម្មភាពកំចាត់មីន មានចំណុចជាច្រើនដែលត្រូវទស្សនាដូចជារឿងរ៉ាវនៃប្រវត្តិ និងនិយមន័យនៃអនុសញ្ញាអូតាវ៉ា ដែលប្រទេសកម្ពុជា គឺជារដ្ឋសមាជិក, ការបង្ហាញពីរបៀបបោសសម្អាតមីន នៅក្នុងចម្ការមីន សិប្ប និមិត្តតូចមួយ. សាលពិព័រណ៌ធំ ដែលនៅក្នុងសាលនេះ មានវិចិត្រសាល ជា ច្រើនបន្ទប់ដូចជា៖:
១. បន្ទប់ប្រវត្តិសាស្ត្រសង្គ្រាមនៅប្រទេសកម្ពុជា
២. បន្ទប់តាំងបង្ហាញគ្រាប់មីនប្រឆាំងមនុស្សគ្រប់ប្រភេទនិងគ្រាប់មីនតោន
៣. បន្ទប់បង្ហាញពីគ្រាប់បែកចង្កោមគ្រប់ប្រភេទ
៤. បន្ទប់តាំងបង្ហាញគ្រាប់យុទ្ធភ័ណ្ឌមិនទាន់ផ្ទុះគ្រប់ប្រភេទ
៥. បន្ទប់បង្ហាញពីសាវតារបស់ស៊ីម៉ាក់
៦. បន្ទប់បង្ហាញពីគ្រាប់បែកទម្លាក់ពីយន្តហោះគ្រប់ប្រភេទ
៧. បន្ទប់បង្ហាញពីម៉ាស៊ីនរាវមីនគ្រប់ប្រភេទ
៨. បន្ទប់បង្ហាញពីការអប់រំផ្សព្វផ្សាយ ពីគ្រោះថ្នាក់ដោយសារគ្រាប់មីន និងគ្រាប់ យុទ្ធភ័ណ្ឌមិនទាន់ផ្ទុះគ្រប់ប្រភេទ
៩. បន្ទប់បង្ហាញពីការកសាងសន្តិភាព និង ការអភិវឌ្ឍន៏ តាមរយះការបោស សម្អាតគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះគ្រប់ប្រភេទ ។
ផ្នែកខាងក្រៅនៃសាលធំមានផ្នែកជាច្រើន ដែលត្រូវទស្សនាដូចជា: ប្រវត្តិជនរងគ្រោះ និងជនពិការដោយសារគ្រាប់មីន និងគ្រាប់យុទ្ធភ័ណ្ឌមិនទាន់ ផ្ទុះ. ផែនទីបង្ហាញពីទីតាំងរង ផលប៉ះពាល់ដោយសារគ្រាប់មីន គ្រាប់បែក ចង្កោម គ្រាប់ទម្លាក់ពីយន្តហោះ និងទីតាំងប្រតិបត្តិការរបស់ស៊ីម៉ាក់ នៅក្នុង ប្រទេស កម្ពុជា. ដំរីសន្តិភាព (ធ្វើពីគ្រាប់មីននិងគ្រាប់យុទ្ធភ័ណ្ឌមិនទាន់ផ្ទុះ) សព្វាវុធចាស់ៗបន្សល់ពីសង្គ្រាមរ៉ាំរ៉ៃជាច្រើនទសវត្សរ៏នៅប្រទេសកម្ពុជា . ទីតាំង បង្ហាញពីរបៀបកប់មីនក្នុងសម័យសង្គ្រាម. ទីតាំងបង្ហាញពីគ្រឿងយន្ត កសិកម្ម និងបណ្តាគ្រឿងយន្ត ដ៏ទៃទៀតដែលរង ការខូចខាត ដោយសារផ្ទុះគ្រាប់ មីនតោន ឧបករណ៏វាយកំទេចគ្រាប់មីន. ទីតាំងធ្វើសកម្មភាពបង្ហាញពីរបៀប បោសសម្អាត គ្រាប់មីន និងគ្រាប់ យុទ្ធភ័ណ្ឌ មិនទាន់ផ្ទុះ (ធ្វើសកម្មភាពបង្ហាញ ដោយកណ្តុរហិតមីន មនុស្ស និងសុនខហិតមីន) ។
ចម្ការមីនសិប្បនិមិត្ត ដែលមានវិសាលភាពលើផ្ទៃដីទំហំ ១ ហិកតា។ ទីតាំងនេះមានចំនុចជាច្រើនដែលត្រូវទស្សនាដូចជា ភូមិឋានចាស់ៗ បោះបង់ ចោល ដោយសាររងផលប៉ះពាល់ពីគ្រាប់មីន និង គ្រាប់យុទ្ធភ័ណ្ឌមិនទាន់ផ្ទុះ ទីតាំងបង្ហាញពីគ្រាប់បែកចង្កោម និងគ្រាប់បែកទម្លាក់ពីយន្តហោះ មកលើផ្ទៃដី ទីតាំងបង្ហាញពីយុទ្ធសាស្ត្រសង្គ្រាម និងយុទ្ធសាស្ត្រទ័ពព្រៃ របស់ខ្មែរក្រហម ក្នុងការសម្លាប់សត្រូវ (របៀបដាក់មីន បង្កៃ របៀបដាក់គ្រាប់បង្កៃ លាយជាមួយ គ្រាប់មីន ជាដើម ។ ទីតាំងបង្ហាញពីក្រុមបោសសម្អាត គ្រាប់យុទ្ធភ័ណ្ឌ មិន ទាន់ផ្ទុះ គ្រប់ប្រភេទ នៅ ក្នុងទឹក។ ទីតាំងបង្ហាញពីបន្ទាយទាហ៊ាន ចាស់ និង យុទ្ធសាស្ត្រ ការពារខ្លួន និងវាយលុក។ ទីតាំងបង្ហាញពីភូមិឋាន មានការ អភិវឌ្ឍន៏ ក្រោយពេលបោសសម្អាតគ្រាប់ មីន និង គ្រាប់យុទ្ធភ័ណ្ឌមិន ទាន់ផ្ទុះ រួចរាល់។ ទីតាំងបង្ហាញពីផ្នូរ កប់សពសុនខ ហិតមីន ។
ដោយសារសារមន្ទីរសន្តិភាពសកម្មភាពកំចាត់មីនមានចំណុចនិងទីតាំងជាច្រើនត្រូវទស្សនា ព្រមទាំងមានវិសាលភាព ធំទូលាយ។ ដូច្នេះភ្ញៀវដែលមក ទស្សនាត្រូវចំណាយពេលយ៉ាងតិច ១ ម៉ោង ដើម្បីដឹងពីរឿងរ៉ាវទាំងអស់ នៅក្នុង សារមន្ទីរនេះ។ សម្រាប់មគ្គុទេសរបស់សារមន្ទីរ មានអតីតភាពជាកងទ័ព និង បានបម្រើការងារ នៅ ស្ថាប័នស៊ីម៉ាក់អស់រយះពេលច្រើនជាង ២០ ឆ្នាំ ដោយ មានជំនាញផ្សេងៗ គ្នាដូចជា គ្រូបង្រៀន ក្នុងវិស័យបោសសម្អាតគ្រាប់មីន អ្នកជំនាញគ្រឿងផ្ទុះ អ្នកបោសសម្អាតមីនជាដើម។
សារមន្ទីរសន្តិភាពនិងបើកឲ្យចូលមើលទស្សនាដោយសេរីមិនគិតថ្លៃបើក រៀងរាល់ថ្ងៃ ចាប់ពីម៉ោង ៧:៣០ នាទី ព្រឹក ដល់ម៉ោង ៥:០០ ល្ងាច។
នៅមុនដំណើរការនៃអង្គសន្និសីទកំពូល ឯកឧត្តមរដ្ឋមន្ត្រី ខៀវ កាញារីទ្ធ បានបញ្ជាក់ហើយថា ការនាំភ្ញៀវ ជាអ្នកសារព័ត៌មានបរទេស មកទស្សនាសារមន្ទីរមីននេះ ដើម្បីអ្នកទាំងអស់នោះបានដឹង ពីការលំបាករបស់កម្ពុជា ហើយ ស្វែងយល់បន្ថែមពីប្រវត្តិសង្គ្រាម និងការអភិវឌ្ឍរីកចំរើន បានដឹងពីតម្លៃ ឬ ទំងន់ នៃសង្គ្រាម និងការអភិវឌ្ឍប្រទេសកម្ពុជា ក្រោយពីសង្គ្រាមរហូតដល់ មានការ អភិវឌ្ឍរីកចំរើនដូចសព្វថ្ងៃនេះ។
នៅក្នុងឱកាសនោះ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជា អគ្គនាយក មជ្ឍមណ្ឌលសក្មភាពកំចាត់មីនកម្ពុជា បានថ្លែងការអរគុណចំពោះ ឯ ឧ រដ្ឋមន្ត្រី ខៀវ កាញារីទ្ធ ដែលបានយកចិត្តទុកដាក់ខ្ពស់ និងរៀបចំអោយ មានកម្មវិធីទស្សនកិច្ច នៅសារមន្ទីរសន្តិភាពសម្មភាពមីន របស់អង្គការស៊ីម៉ាក់ ខេត្តសៀមរាប ជូនគណះប្រតិភូសារព័ត៌មានអន្តរជាតិ ដែលបានមកទស្សនា នា ពេលខាងមុខនេះ ដើម្បីសិក្សាស្វែងយល់ បន្ថែមពីប្រវត្តិសង្គ្រាម និងការ អភិវឌ្ឍន៏ រីកចំរើននៅកម្ពុជា ៕
