លោកស្រី ម៉ននី រង្សី អភិបាលនៃគណៈអភិបាលស្រុកក្រឡាញ់ បានមានប្រសាសន៍ឱ្យដឹងកាលពីពេលថ្មីៗនេះថា៖ រដ្ឋបាលស្រុកក្រឡាញ់បានសាងសង់អគារការិយាល័យច្រកចេញចូលតែមួយ រួចរាល់ជាស្ថាពរហើយៗ នឹងគ្រោងបើកឲ្យដំណើរដើម្បីបំរើសេវាសាធារណៈជូនប្រជាពលរដ្ឋក្នុងមូលដ្ឋានស្រុកក្រឡាញ់ នៅក្នុងដំណាច់ ឆ្នាំ២០១៩ ឆាប់ៗខាងមុខនេះ ខណៈពេលនេះ យើងនៅមិនទាន់ទទួលបានសម្ភារៈគ្រប់គ្រាន់សម្រាប់ការិយាល័យ ហើយ មន្ត្រី បុគ្គលិកជួរមុខនិងជួរក្រោយកំពុងទទួលការបណ្តុះបណ្តាលនៅឡើយ។
លោកស្រី ម៉ននី រង្សី បន្តថា បើតាមច្បាប់តម្រូវគឺការិយាល័យច្រកចេញចូលតែមួយនៅតាមបណ្តាក្រុងស្រុក តម្រូវឱ្យមានមន្ត្រីគ្រប់ផ្នែក ទាំងផ្នែកជួរមុខ និងជួរក្រោយហើយមន្ត្រីជួរមុខមានភារៈកិច្ច បំរើសេវានិត្យនុកូលកម្ម និងអត្រានុកូលដ្ឋាន បំរើដោយមន្ត្រី៣រូប មានតួនាទី ជាបេឡាធិការ អ្នកទទួលពាក្យ និងអ្នកផ្តល់ព័ត៌មាន ។ ចំណែកមន្ត្រីផ្នែកជួរក្រោយ តាមច្បាប់ត្រូវមានមន្ត្រី១០រូប មានតួនាទីភារៈកិច្ចលើ១០ជំនាញ តែសម្រាប់ស្រុកក្រឡាញ់មានមន្ត្រីចំនួនតែ៧នាក់ ដើម្បីបំរើសេវាដោយសារស្រុកខ្វះខាតមន្ត្រីជំនាញ ។ ចំពោះសេវាទាំង១០មុខនៅផ្នែកជួរក្រោយ ដែលទទួលបានប្រតិភូកម្មពីរាជរដ្ឋាភិបាលរួមមាន៖សុខាភិបាល អប់រំ ភូមិបាល កសិកម្ម វប្បធម៌ ឧស្សាហកម្ម រ៉ែនិងថាមពល ទេសចរណ៍ និងពាណិជ្ជកម្ម ។
លោកស្រី ម៉ននី រង្សី បន្តទៀតថា សេវានិត្យានុកូលកម្ម និងអត្រានុកូលដ្ឋានមិនត្រូវឱ្យប្រជាពលរដ្ឋបង់ថ្លៃសេវានោះទេ ដោយឡែកសេវាផ្សេងៗគឺប្រជាពលរដ្ឋបង់ថ្លៃសេវាទៅតាមតារាងកំណត់នៃថ្លៃបង់សេវាត្រឹមត្រូវតាមប្រកាសរបស់អន្តរក្រសួងពាក់ព័ន្ឋនិងក្រសួងមហាផ្ទៃ ដែលតារាងនោះមានបិទជាសាធារណៈនៅលើបញ្ជរព័ត៌មាន។ ចំពោះការិយាល័យច្រកចេញចូលតែមួយ គឺជាកន្លែងផ្តល់សេវារដ្ឋបាល ដែលប្រជាពលរដ្ឋត្រូវការចាំបាច់អោយបានទាន់ពេលវេលា មានតម្លាភាព និងតាមនីតិវិធីសាមញ្ញជាកន្លែងប្រមូលផ្តុំសេវាកម្ម និងនីតិវិធីរដ្ឋបាលមួយចំនួន ដែលអតិថិជនមកទទួលទម្រង់បែបបបទ និងទទួលព័ត៌មានគ្រប់គ្រាន់ ច្បាស់លាស់ស្តីពីការផ្តល់សេវាសាធារណៈផ្សេងៗ និងការបង់កំរៃសេវាកម្មកន្លែងផ្តល់លទ្ធផលសំរេចជាផ្លូវការលើសេចក្តីស្នើសុំដល់អតិថិជនវិញ។
លើសពីនេះ ការិយាល័យច្រកចេញចូលតែមួយ ជាកន្លែងប្រមូលផ្តុំសេវា សាធារណៈដែលមានគុណភាព ឆ្លើយតបទៅនឹងតម្រូវការរបស់ប្រជាពលរដ្ឋ មិនមានលក្ខណៈការិយាធិបតេយ្យ បំរើសេវាមានប្រសិទ្ធភាព ងាយស្រួល រហ័សទាន់ចិត្ត អាចជឿទុកចិត្តបានតាមរយៈការអនុវត្តឧបករណ៍រួមគ្នាមួយគឺ ការិយាល័យច្រកចេញចូលតែមួយ ។លោកស្រីអភិបាលស្រុករំពឹងទុកថា៖តាមរយៈសេវាកម្មនៅការិយាល័យច្រកចេញចូលតែមួយនេះ នឹងជួយកាត់បន្ថយថវិកាចំណាយ និងកាត់បន្ថយពេលវេលារបស់ប្រជាពលរដ្ឋ កាត់បន្ថយនូវការិយាធិបត្តេយ្យ និងអំពើពុករលួយផ្សេងៗ ខណៈដែលកាលពីមុនប្រជាពលរដ្ឋចង់ស្នើសុំសេវាកម្មអ្វីមួយមានការពាក់ព័ន្ធ គឺពួកគាត់ត្រូវទៅ ទំនាក់ទំនង ផ្ទាល់ជាមួយសមត្ថកិច្ចជាច្រើនកន្លែង។ ប៉ុន្តែក្រោយបើកដំណើរការការិយាល័យនៅស្រុកនេះ ពេលនោះពួកគាត់ នឹងគ្រាន់តែមកស្នើសុំសេវាកម្មទាំងនេះ ដោយគ្រាន់រង់ចាំតែពេលវេលាដែលមន្ត្រីកំណត់នៅការិយាល័យច្រកចេញចូលតែមួយជាការស្រេច ។
សូមជំរាបថា បន្ទាប់ពីការអនុវត្តន៍សាកល្បងនូវការិយាល័យ ច្រកចេញចូលតែមួយក្នុងឆ្នាំ២០១៥ ក្រោមការសម្របសម្រួលរបស់ គណៈកម្មាធិការជាតិ សម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និងមានការចូលរួមពីដៃគូអភិវឌ្ឍន៍នានា ក្រសួងមហាផ្ទៃបានសហការជាមួយ ក្រសួងស្ថាប័នពាក់ព័ន្ធនានា បង្កើតបានជាបន្តបន្ទាប់ នូវការិយាល័យច្រកចេញចូលតែមួយ និងការិយាល័យប្រជាពលរដ្ឋនៅថ្នាក់រដ្ឋបាលក្រុង ស្រុក ខណ្ឌ គោលដៅ ដើម្បីប្រមូលផ្តុំការផ្តល់សេវារដ្ឋបាលនៅកន្លែងតែមួយ តាមរយៈការធ្វើប្រតិភូកម្មមុខងារ ក្នុងការផ្តល់សេវារដ្ឋបាល ។សម្រាប់ខេត្តសៀមរាបនាបច្ចុប្បន្ននេះមានការិយាល័យច្រកចេញចូលតែមួយចំនួន៣ហើយ គឺមាននៅក្រុងសៀមរាប , ស្រុកពួក និងស្រុកជីក្រែង។ដោយឡែកការិយាល័យច្រកចេញចូលតែមួយ គ្រោងនឹងបើកនៅស្រុកចំនួន២ទៀត គឺ ស្រុកក្រឡាញ់និងស្រុកសូទ្រនិគម និងជំហានជាបន្តបន្ទាប់គ្រោងនឹងបង្កើតនៅស្រុកមួយចំនួនទៀតសម្រាប់ខេត្តសៀមរាប ៕
អត្ថបទ និង រូបភាព ៖ យូវ វង្ស
កែសម្រួល ៖ អ៊ុន ណារាជ្យ
