នៅរសៀលថ្ងៃទី១៧ ខែមិថុនា ឆ្នាំ២០១៩នេះ លោក លី សំរឹទ្ធ អភិបាលរងខេត្តសៀមរាប ទទួលបន្ទុកគម្រោងថ្នាក់ខេត្ត ដោយមានការចូលរួម ពិសំណាក់ លោក ហេង សុផាត ប្រធានគម្រោងថ្នាក់ជាតិ លោក Erik John តំណាងធនាគាពិភពលោក និងក្រុមការងារថ្នាក់ជាតិ ក្រុមការងារថ្នាក់ខេត្ត អ្នកសម្របសម្រួលគម្រោង អភិបាលរងស្រុក មេឃុំដូនកែវ និងបងប្អូនប្រជាពលរដ្ឋ បានចូលរួមក្នុងពិធីបើកការដ្ឋាន សាងសង់ផ្លូវមួយខ្សែរ នៅក្នុងឃុំដូនកែវ ស្រុកពួក ខេត្តសៀមរាប ក្រោមកម្មវិធីរបស់គម្រោងលើកកម្ពស់ជីវភាពប្រជាជនក្រីក្រ ។
លោក លី សំរឹទ្ធ អភិបាលរងខេត្តសៀមរាប បានឲ្យដឹងថា ផ្លូវដែលចាប់ផ្ដើមសាងសង់នេះ ជាប្រភេទផ្លូវដី ស ក្រាលគ្រួសក្រហម មានប្រវែង ១៥០០ម៉ែត្រ ទទឹង ៤ម៉ែត្រ កម្រាស់ ០,១៥ម៉ែត្រ និងសាងសង់លូជ្រុងមានទ្វារទឹកមួយកន្លែងនេះ ហើយផ្លូវនេះត្រូវបានតភ្ជាប់ពីភូមិរហាល ទៅភូមិតាស្នេហ៍ ដែលមានអ្នកទទួលផលសរុបចំនួន ១៨០គ្រួសារ ស្មើនឹង ៨៧៧នាក់ ដែលមានប្រជាពលរដ្ឋក្រ១ និងក្រ២ ចំនួន ៥៩គ្រួសារ ហើយផ្លូវនេះដែរ ពីមុនគឺមានការលំបាកខ្លាំង ដោយសារតែពេលមានសភាពតូច និងពេលមានភ្លៀងម្ដងៗ គឺមានសភាពរអិល ដែរធ្វើឲ្យមានការលំបាកក្នុងការធ្វើដំណើរដល់បងប្អូនប្រជាពលរដ្ឋ ។
ព័ត៌មានជាតិ ថ្មីៗ
លោក លី សំរឹទ្ធ បន្តថា ដោយមើលឃើញពីការលំបាកនេះ ទើបអាជ្ញាធរខេត្ត និងក្រុមការងារគម្រោង បានជម្រុញឲ្យក្រុមហ៊ុនយកចិត្តទុកដាក់ ធ្វើការស្ថាបនាផ្លូវដីសក្រាលគ្រួសក្រហមនេះ ដើម្បីធានាក្នុងការបម្រើដល់ការដឹកជញ្ជូនកសិផលរបស់ប្រជាកសិករ ទៅកាន់ទីផ្សារ ព្រមទាំងកាត់បន្ថយការលំបាករបស់ប្រជាពលរដ្ឋ ។ ម្យ៉ាងទៀតសូមឲ្យអាជ្ញាធរ ក៏ដូចជាងប្អូនប្រជាពលរដ្ឋនៅក្នុងមូលដ្ឋាន ត្រូវយកចិត្តទុកដាក់ ក៏ដូចជាថែទាំផ្លូវនេះ និងធ្វើដងផ្លូវនេះប្រកបទៅដោយពណ៌បៃតង គឺត្រូវរួមគ្នាធ្វើការដាំស្មៅសងខាងផ្លូវ និងដើមឈើ ឲ្យមានសោភណ្ឌភាពស្រស់បំពង នឹងប្រើប្រាសបានយូរអង្វែងផងដែរ ៕
អត្តបទនិងរូបភាព៖រដ្ឋបាលខេត្តសៀមរាប
