មន្ត្រីនៃអាជ្ញាធរជាតិអប្សរា បានធ្វើការអំពាវនាវមួយស្នើសុំដល់ប្រជាជនកុំកាប់ដើមឈើក្នុងតំបន់អង្គរ ដោយគ្មានការអនុញ្ញាត និងស្នើស។ឱ្យអាជ្ញាធរមូលដ្ឋាន ជួយអប់រំប្រជាជន និងទប់ស្កាត់បទល្មើសព្រៃឈើ កុំឱ្យមានករណីនេះកើតមានជាបន្តទៀត ។
ការអំពាវនាវនេះ បានធ្វើឡើង ខណៈពេលដែលលោក ឃុន រ៉ើន ប្រជាជនរស់នៅភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប បានកាប់លះមែកអំពិលមួយដើមដែលមានអាយុកាលជាងរយឆ្នាំមកហើយ កាលពីថ្ងៃទី១៥ ខែមិថុនា ឆ្នាំ២០១៩ កន្លងទៅនេះ ហើយបន្ទាប់ពីបានទទួលបានព័ត៌មាននេះ នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា សហការជាមួយអាជ្ញាធរមូលដ្ឋាន បានចុះទៅហាមឃាត់ និងធ្វើកិច្ចសន្យាហាមប៉ះពាល់ដើមអំពិលជាបន្តទៀត ដូច្នេះរាល់ការកាប់លះមែកឈើក្នុងតំបន់អង្គរ ត្រូវសុំច្បាប់អនុញ្ញាតពីអាជ្ញាធរពាក់ព័ន្ធជាមុន ។
មន្ត្រីនៃអាជ្ញាធរជាតិអប្សរា បានឲ្យដឹងថា ជាភ័ព្វសំណាងដែលប្រជាជនបានរស់នៅក្បែរដើមឈើដែលមានអាយុកាលរាប់រយឆ្នាំ ប៉ុន្តែផ្ទុយទៅវិញ សព្វថ្ងៃព្រៃឈើជាច្រើនកន្លែងផ្សេងគ្នា កំពុងរងនូវការកាប់បំផ្លាញពីជនខិលខូចមួយចំនួនដែលមិនបានយល់ពីតម្លៃ និងមានតួនាទីសំខាន់សម្រាប់បរិស្ថាន ហើយហេតុការណ៍នេះអាជ្ញាធរជាតិអប្សរាតែងតែព្យាយាមទប់ស្កាត់នូវសកម្មភាពនានាដែល គំរាមកំហែងដល់ព្រៃឈើ ព្រោះថា ក្រៅពីប្រាង្គប្រាសាទបុរាណជាច្រើន រមណីយដ្ឋានអង្គរក៏មានព្រៃឈើធម្មជាតិដែលមានអាយុកាលរាប់រយឆ្នាំ ហើយព្រៃឈើទាំងនោះ ផ្តល់ជាម្លប់ ជាជម្រកសត្វព្រៃ និងផ្តល់ជាអនុផលព្រៃឈើយ៉ាងច្រើន ដល់សហគមន៍រស់នៅជុំវិញរៀងរាល់ថ្ងៃ ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
