ក្នុងឱកាសព្រះរាជពិធីចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា គម្រប់ខួប៨៣ យាងចូល៨៤ព្រះវស្សា នាព្រឹកថ្ងៃទី១៨ ខែមិថុនា ឆ្នាំ២០១៩នេះ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និង ជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំសហការី រៀបចំពិធីសូត្រមន្តចម្រើនព្រះបរិត្ត និងប្រគេនចង្ហាន់ព្រះសង្ឃចំននួន៧អង្គ និង ចែកអំណោយមនុស្សធម៌ ដល់បងប្អូនប្រជាពលរដ្ឋ ងាយរងគ្រោះ រួមមាន ចាស់ ជរាគ្មានទីពឹង , ជនពិការ , កុមារកំព្រា , អ្នកផ្ទុកមេរោគអេដស៍ , ស្ត្រីមេមាយ និងជនក្រីក្រមានកូនច្រើន ចំនួន៨៤គ្រួសារ មកពីឃុំទាំង៤ នៃស្រុកអង្គរធំ នៅទីស្នាក់ការអនុសាខាកាកបាទក្រហមកម្ពុជាស្រុកអង្គរធំ ដែលក្នុងមួយគ្រួសារទទួលបានឃីត១ កញ្ចប់ , មី១កេស , ត្រីខ ១យួរ , អង្ករ ៣០គីឡូក្រាម , មុងសុវត្ថិភាព ១ និងថវិកាចំនួន២ម៉ឺនរៀល ។
ក្នុងឱកាសដ៏មហានក្ខត្តឫក្សឧត្តុង្គឧត្តមនេះ លោកជំទាវ ទាង អេង ទៀ សីហា បានមានប្រសាសន៍ថា យើងទាំងអស់គ្នាជាកូនចៅ ចៅទួតរបស់ព្រះអង្គ សូមសម្ដែងនូវការគោរព និងចងចាំគ្មានថ្ងៃបំភ្លេចបាន នូវស្នាព្រះហត្ថព្រះរាជសកម្មភាពសម្ដេចម៉ែ សម្ដេចយាយជាអម្ចាស់ ក្នុងព្រះរាជបេសកកម្មបម្រើប្រទេសជាតិមាតុភូមិ ក្នុងវិស័យមនុស្សធម៌ និង សូមបួងសួងថ្វាយព្រះពរជ័យមហាប្រសើរ ថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត សូមព្រះអង្គមានព្រះរាជសុខភាពល្អបរិបូរណ៍ ព្រះកាយពលមាំមួន ព្រះជន្មយឺតយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់របស់ប្រជារាស្ត្រជាកូន ចៅ ចៅទួតរបស់ព្រះអង្គតរៀងទៅ ។
ក្នុងឱកាសនេះដែរ លោកជំទាវ ទាង អេង ទៀ សីហា បានពាំនាំមកនូវការផ្តាំផ្ញើសួរសុខទុក្ខ ពីសំណាក់សម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុនសែន ប្រធានកាកបាទក្រហមកម្ពុជា និង ឯកឧត្ដម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ហើយការចែកអំណោយមនុស្សធម៌នាពេលនេះ គឺក្រោមការយកចិត្តទុកដាក់ពីសំណាក់សម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុន សែន ប្រធាន កាកបាទក្រហមកម្ពុជា ដែលតែងតែគិតពីសុខទុក្ខ និងការលំបាករបស់បងប្អូនប្រជាពលរដ្ឋទាំងអស់នៅទូទាំងប្រទេស ជាពិសេស បងប្អូនជាជនក្រីក្រ ជនងាយរងគ្រោះ ជនចាស់ជរា អ្នកផ្ទុកមេរោគអេដស៍ និងទុរគតជននានា ដូច្នេះសូមលើកទឹកចិត្តដល់បងប្អូនប្រជាពលរដ្ឋឲ្យខិតខំថែទាំសុខភាព និង ប្រកបរបរចិញ្ចឹមជីវិតតាមលទ្ធភាពដែលអាចធ្វើទៅបាន ។
លោកជំទាវ ទាង អេង ទៀ សីហា មានប្រសាសន៍ទៀតថា បច្ចុប្បន្នការប្រែប្រួលអាកាសធាតុ គឺតែងតែមានកើតឡើងជាយថាហេតុនៅគ្រប់ទីកន្លែង មិនថាឡើយនៅក្នុងប្រទេសកម្ពុជាយើងនោះឡើយ គឺនៅលើពិភពលោកទាំងមូល តែងតែមានទទួលរងផលប៉ះពាល់ ហើយវាធ្ងន់ធ្ងរជាងនៅប្រទេសយើងទៀតផង ដូច្នេះក្នុងនាមសម្តេច កិត្តិព្រឹទ្ធបណ្ឌិត ប៉ុន រ៉ានី ហ៊ុនសែន និងក្នុងនាមឯកឧត្តម ទៀ សីហា សូមបងប្អូនត្រូវមានការប្រុងប្រយ័ត្ននៅគ្រប់វិនាទី ថ្វីត្បិតតែយើងមិនអាចទប់ស្កាត់បាន ចំពោះបញ្ហារន្ទះបាញ់ ប៉ុន្តែយើងត្រូវមានវិធីសាស្ត្រ ធ្វើយ៉ាងណាការពារកុំឲ្យមានគ្រោះថ្នាក់ដល់មនុស្ស សត្វពាហនៈ ការខូចខាតទ្រព្យសម្បត្តិ យើងអាចជួយគ្នា និង ព្យា យាមតស៊ូ ក្នុងការទ្រទ្រង់ជីវភាពក្រុមគ្រួសារ ។
ជាមួយគ្នានេះដែរ លោកជំទាវ បានក្រើនរំលឹកដល់បងប្អូនជាស្ត្រី ត្រូវយកចិត្តទុក ដាក់ខ្ពស់ចំពោះសុខភាពមាតា និងទារក នៅពេលកូនៗរបស់ខ្លួន មានជំងឺ ត្រួវនាំទៅពិនិត្យព្យាបាលនៅតាមមណ្ឌលសុខភាពដែលនៅជិតមូលដ្ឋានខ្លួន និង ត្រូវមានការប្រុងប្រយ័ត្នខ្ពស់ ជាពិសេសសិស្សានុសិស្សទាំងអស់ ត្រូវជៀសឲ្យឆ្ងាយពីគ្រឿង ញៀន ដែលធ្វើឲ្យខូចនូវសុខភាព សតិបញ្ញាស្មារតី រងគ្រោះដល់ក្រុមគ្រួសារ និង សង្គមជាតិ ព្រមទាំងខូចនូវអនាគតរបស់ខ្លួនទៀតផង ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
