បន្ទាប់ពីធ្វើការបូកសរុបសន្លឹកឆ្នោតជាផ្លូវការ នៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី ៣ ក្នុងខេត្តសៀមរាបរួចរាល់មក ជាលទ្ធផលក្នុងការបោះឆ្នោតជ្រើសរើសក្រុមប្រឹក្សាខេត្ត គណបក្សប្រជាជនកម្ពុជាទទួលបាន ២៦អាសនៈ និងគណបក្សខ្មែររួបរួមជាតិទទួលបាន ១អាសនៈ នៃអាសនៈសរុបចំនួន២៧។ ដោយឡែក ការបោះឆ្នោតជ្រើសរើសក្រុមប្រឹក្សាក្រុងស្រុក អាណត្តិទី៣ ក្នុងខេត្តសៀមរាបវិញ គណបក្សប្រជាជនកម្ពុជាទទួលបានអាសនៈ២០៥ និង១១អាសនៈទៀតបានទៅគណបក្សខ្មែររួបរួមជាតិ និងគណបក្សហ្វ៊ុនស៊ិនប៉ិច នៃអាសនៈសរុប២១៦។
នេះបើយោងតាមរបាយការណ៍ របស់គណៈកម្មការរៀបចំការបោះឆ្នោតខេត្តសៀមរាប នៅថ្ងៃទី១៩ ខែមិថុនា ឆ្នាំ២០១៩ នៅក្នុងសន្និបាតបូកសរុបការងារបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុកខណ្ឌអាណត្តិទី ៣ឆ្នាំ ២០១៩ និងការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០១៩។
លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប បានមានប្រសាសន៍ថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី ៣ ក្នុងខេត្តសៀមរាប កាលពីថ្ងៃទី២៦ ខែឧសភា ឆ្នាំ២០១៩ កន្លងទៅនេះ មានបេក្ខជនឈរឈ្មោះចំនួន ១៦២៥នាក់ ក្នុងនោះស្រី៥១៩នាក់ មកពីគណបក្សនយោបាយចំនួន ០៦គណបក្ស រួមមាន គណបក្សប្រជាជន គណបក្សយុវជនកម្ពុជា គណបក្សខ្មែររួបរួមជាតិ គណបក្សឆន្ទៈខ្មែរ គណបក្សសញ្ជាតិកម្ពុជា គណបក្សហ្វ៊ុនស៊ិនប៉ិច និងមានអ្នកចូលរួមសង្កេតការចំនួន៣៨នាក់ មកពី សហភាពសហព័ន្ធយុវជនកម្ពុជា សមាគមគ្រឹះស្ថានឧត្តមសិក្សាកម្ពុជា និងសហព័ន្ធនិស្សិតបញ្ញវ័ន្តប្រជាធិបតេយ្យកម្ពុជា។ ក្នុងនោះដែរ គណៈកម្មការរៀបចំការបោះឆ្នោតខេត្តសៀមរាប ពុំទទួលបានពាក្យបណ្ដឹង ឬការតវ៉ាពីភាគីណាមួយឡើយ ដែលការបោះឆ្នោតនេះបានបង្ហាញឲ្យឃើញពីការរីកចម្រើននៃលទ្ធិប្រជាធិបតេយ្យ សេរីពហុបក្ស និងប្រកបដោយ តម្លាភាព យុតិ្តធម៌ គ្មានការគំរាមគំហែង គ្មានការគៀបសង្កត់ និងគ្មានអំពើរហិង្សា។
លោក ពៅ ពិសិដ្ឋ តំណាងឯកឧត្តមអភិបាលខេត្ត និងជាអភិបាលរងខេត្តសៀមរាប បានមានប្រសាសន៍ថា ចាប់តាំងពីការបោះឆ្នោតជាតិឆ្នាំ១៩៩៣ មកទល់នឹងការបោះឆ្នោតជ្រើសរើសក្រុមប្រឹក្សា អាណត្តិទី៣នេះ កម្ពុជាបានធ្វើការបោះឆ្នោតដោយផ្ទាល់ និងមិនផ្ទាល់ ស្របតាមគោលការលទ្ធិប្រជាធិបតេយ្យ សេរីពហុបក្ស ស្របតាមរដ្ឋធម្មនុញ្ញចំនួន ១៦លើករួចមកហើយ។
លោក ពៅ ពិសិដ្ឋ បានគូសបញ្ជាក់ថា ផ្អែកតាមបទពិសោធន៍ជាអន្តរជាតិ គ្មានប្រទេសណាមួយរៀបចំចាត់ចែងការបោះឆ្នោតល្អឥតខ្ចោះនោះឡើយ។ ដោយឡែក តាមរយៈការបោះឆ្នោតទាំង១៦លើកនោះ មជ្ឈជាតិ និងអន្តរជាតិបានវាយតម្លៃខ្ពស់មកលើប្រទេសកម្ពុជាថាមានលទ្ធិប្រជាធិបតេយ្យ សេរីពហុបក្ស និងបើកចំហកាន់តែប្រសើរ ដល់ភ្នាក់ងារគណបក្សនយោបាយ អ្នកអង្កេតការណ៍ជាតិ-អន្តរជាតិនានា ចូលរួមប្រកបដោយសន្តិសុខ និងសុវត្ថិភាព រីឯសមិទ្ធផលសម្រាប់ប្រជាជនកម្ពុជាវិញគឺទទួលបាននូវ សន្តិភាព លទ្ធិប្រជាធិបតេយ្យ និងការអភិវឌ្ឍសង្គម ជាបន្តបន្ទាប់។
លោកអភិបាលរងខេត្តសៀមរាប បានអះអាងថា ក្នុងដំណើរការការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២០ខាងមុខ រដ្ឋបាលខេត្តសៀមរាប ប្ដេជ្ញាថានឹងជម្រុញឲ្យប្រជាពលរដ្ឋមិនទាន់ចុះឈ្មោះ និងអ្នកទើបគ្រប់អាយុចុះឈ្មោះបោះឆ្នោត ទៅចុះឈ្មោះបោះឆ្នោតឲ្យបានជាអតិបរមា តាមរយៈការណែនាំ និងជម្រុញអាជ្ញាធរមូលដ្ឋានគ្រប់ជាន់ថ្នាក់ចុះស្រង់ស្ថិតិ និងផ្សព្វផ្សាយវេលាចុះឈ្មោះបោះឆ្នោតឲ្យបានទូលំទូលាយ។
គួរបញ្ជាក់ថា តាមរបាយការណ៍ប៉ាន់ស្មាន របស់លេខាធិការដ្ឋានរៀបចំការបោះឆ្នោតខេត្តសៀមរាប កាលពីខែមីនា ឆ្នាំ២០១៩ ប្រជាជនក្នុងខេត្តសៀមរាបសរុបមានចំនួន ១,០៧៧,៧៦១នាក់ ប្រជាពលរដ្ឋអាយុ១៨ឆ្នាំឡើងមានចំនួន៧១០,០២៨នាក់ និងមិនទាន់ចុះឈ្មោះបោះឆ្នោត ៦៥,៦៣០នាក់។
រូបភាព និងអត្ថបទ៖ លោក សេង ផល្លី
