កាលព្រឹកថ្ងៃទី១៩ ខែមិថុនា ឆ្នាំ២០១៩នេះ នៅសាលប្រជុំរដ្ឋបាលស្រុកស្រីស្នំ មានរៀបចំពិធីប្រកាសចូលកាន់តំណែងក្រុមប្រឹក្សាស្រុកស្រីស្នំ អាណត្តិទី៣ ក្រោមអធិបតីភាពឯកឧត្ដម ទៀ សីហា អភិបាលខេត្តសៀមរាប និងមានការអញ្ជើញចូលរួមពីសំណាក់លោក លោកស្រី ជាប្រធាន និងសមាជិកក្រុមប្រឹក្សាស្រុក គណៈអភិបាលស្រុក និង មន្ត្រី អាជ្ញាធរក្នុងស្រុកស្រីស្នំជាច្រើនរូប ។
ថ្លែងក្នុងឱកាសនោះ ឯកឧត្តម ទៀ សីហា បានមានប្រសាសន៍ថា ក្រុមប្រឹក្សាស្រុកស្រីស្នំ ដែលបានជាប់ឆ្នោត តាមរយៈការបោះឆ្នោតជ្រើសក្រុមប្រឹក្សាក្រុងស្រុកអាណត្តិទី៣ កាលពីថ្ងៃទី២៦ ខែឧសភា ឆ្នាំ២០១៩កន្លងមកនេះ គឺជាតំណាង របស់ប្រជាពលរដ្ឋស្រុកស្រីស្នំទាំងមូល។ លើសពីនេះ ក្រុមប្រឹក្សាថ្នាក់ក្រោមជាតិ ក៏ជាផ្នែកមួយនៃអំណាចនីតិប្រតិបត្តិ និងមានស្វ័យភាពក្នុងដែនកំណត់នៃច្បាប់ លិខិតបទដ្ឋានជាធរមាន ក្នុងការគ្រប់គ្រងចាត់ចែងកិច្ចការមូលដ្ឋានរបស់ខ្លួន ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ក្នុងដែនសមត្ថកិច្ចរបស់ខ្លួន ហើយក្នុងការអនុវត្តការងារ សមាជិកក្រុមប្រឹក្សាត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព ដោយយុត្តិធម៌ និង ដោយមិនត្រូវប្រកាន់និន្នាការនយោបាយ ទោះបីលោក លោកស្រីមកពីគណបក្សនយោបាយផ្សេងៗគ្នាក៏ដោយ។
ព័ត៌មានជាតិ ថ្មីៗ
ឯកឧត្តមអភិបាលខេត្ត បានគូសបញ្ជាក់ផងដែរថា ចាប់តាំងពីការបោះឆ្នោតឆ្នាំ២០០៩មក រាជរដ្ឋាភិបាលកម្ពុជាបានខិតខំជំរុញកំណែទម្រង់វិមជ្ឈការ និងវិសហមជ្ឈការឱ្យឈានចូលដំណាក់កាលកាន់តែស៊ីជម្រៅថែមទៀត ក្នុងនោះមានកិច្ចការសំខាន់ៗចំនួន ៤ គឺទីមួយ ការបង្កើតការផ្ទេរមុខងារ និងធនធានទៅឱ្យរដ្ឋបាលថ្នាក់ក្រោមជាតិ ទី ពីរ ការផ្ទេរមន្ត្រីបុគ្គលិកក្រសួងមហាផ្ទៃប្រមាណជាង ៦ពាន់នាក់ មកជាមន្ត្រីបុគ្គលិករបស់រដ្ឋបាលថ្នាក់ក្រោមជាតិ ទីបី កែសម្រួលរចនាសម្ព័ន្ធ និងប្រព័ន្ធគ្រប់គ្រងរដ្ឋបាលនៅថ្នាក់ក្រុង-ស្រុក និងទីបួន ការបង្កើនការផ្ទេរធនធានហិរញ្ញវត្ថុសម្រាប់អភិវឌ្ឍមូលដ្ឋានដល់រដ្ឋបាលឃុំ-សង្កាត់។
ឆ្លៀងក្នុងឱកាសនោះ ឯកឧត្តមអភិបាលខេត្ត ក៏បានកោតសរសើរអំពីកិច្ចសហការល្អរវាងគណៈអភិបាលស្រុកស្រីស្នំ និងក្រុមប្រឹក្សាស្រុកស្រីស្នំអាណត្តិទី២ ព្រមទាំងមន្ត្រីរាជការគ្រប់លំដាប់ថ្នាក់ កងកម្លាំងមានសមត្ថកិច្ច ក្នុងការអភិវឌ្ឍមូលដ្ឋាន ជួយសង្គ្រោះប្រជាពលរដ្ឋពីគ្រោះធម្មជាតិនានា ការថែរក្សាការពារសន្តិសុខ សណ្ដាប់ធ្នាប់ និងសុវត្ថិភាពជូនប្រជាពលរដ្ឋនៅទូទាំងស្រុក។
សូមបញ្ជាក់ដែរថា សមាជិកក្រុមប្រឹក្សាស្រុកស្រីស្នំ សម្រាប់អាណត្តិទី៣នេះ មានសមាសភាពចំនួន១៥រូប ក្នុងនោះ១៤រូបមកពីគណបក្សប្រជាជនកម្ពុជា និង១រូបទៀតមកពីគណបក្សខ្មែររួបរួមជាតិ និងមានលោក តូច ស៊ីម មកពីគណបក្សប្រជាជនកម្ពុជា ជាប្រធានក្រុមប្រឹក្សាស្រុក ៕
រូបភាព ៖ លោក ខេង ឧត្តម និងលោក អ៊ុន ណារាជ្រ
អត្ថបទ៖ លោក សេង ផល្លី
