លទ្ធភាពនៃការធ្វើសុខដុមនីយកម្មស្តង់ដារ និង បទបញ្ញត្តិបច្ចេកទេស សម្រាប់ប្រទេសអាស៊ាន ដោយប្រើប្រាស់ស្តង់ដារក្រមម្ហូបអាហារអន្តរជាតិ ដែលហៅកាត់ថា កូដិច ( CODEX ) ជាគោល ត្រូវបានលើកយកមកពិភាក្សានៅក្នុងកិច្ចប្រជុំរបស់ក្រុមការងារអ្នកបច្ចេកទេសម្ហូបអាហារ កូដិច អាស៊ាន ( ATFC ) លើកទី១៩ នៅខេត្តសៀមរាប !
កូដិច ( CODEX ) គឺជាក្រមម្ហូបអាហារជាអន្តរជាតិ ដែលរៀបរាប់អំពីអាហារមានសុវត្ថិភាព អាហារល្អសម្រាប់មនុស្សគ្រប់គ្នានៅគ្រប់ទីកន្លែង ។ កិច្ចប្រជុំក្រុមការងារ កូដិច អាស៊ាន ដែលហៅកាត់ថា ( ATFC ) លើកទី១៩ ត្រូវបានប្រារព្ធឡើងចាប់ពីថ្ងៃទី១៩ ដល់ថ្ងៃទី២១ ខែមិថុនា ឆ្នាំ២០១៩នៅក្រុងសៀមរាប ។ ក្នុងចំណោមបណ្តាប្រទេសជាសមាជិកអាស៊ានចំនួន១០ មានវត្តមានប្រទេសចំនួន០៨បានចូលរួម រួមទាំងមានវត្តមានផងដែរ តំណាងក្រសួងពាក់ព័ន្ធមួយចំនួនទៀតរបស់កម្ពុជា ដូចជា ក្រសួងពាណិជ្ជកម្ម ក្រសួងកសិកម្មរុក្ខាប្រមាញ់និងនេសាទ ក្រសួងសុខាភិបាល និង ក្រសួងឧស្សាហកម្មនិងសិប្បកម្ម ។ កម្ពុជា ដែលមានអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម ជាចំណុចទំនាក់ទំនងកូដិចជាតិ បានធ្វើជាម្ចាស់ផ្ទះប្តូរវេន ក្នុងការដឹកនាំកិច្ចប្រជុំក្រុមការងារកូដិចអាស៊ាន លើកទី១៩ នេះ ។
ឯកឧត្តម ផាន អូន អគ្គនាយករង អគ្គនាយកដ្ឋានកាំកុងត្រូលនៃក្រសួងពាណិជ្ជកម្មកម្ពុជា ថ្លែងបើកកិច្ចប្រជុំនោះ ដោយបង្ហាញឲ្យដឹងថា ៖ ចាប់តាំងពីការចាប់កំណើតរបស់ខ្លួននៅក្នុងឆ្នាំ១៩៦៣ គម្រោងកូដិច ( CODEX )បានវិវត្តខ្លួនដោយឈរលើយន្តការតម្លាភាព និងមានលក្ខណៈរាប់បញ្ចូលគ្រប់ទិដ្ឋភាព ក្នុងការដោះស្រាយនូវរាល់បញ្ហាចំពោះមុខ ។ នីតិវិធីអនាម័យ និង ភូតគាមអនាម័យ ដែលស្របទៅតាមបែបបទស្តង់ដារពិភពលោក ត្រូវបានចាត់ទុកថា ជាការចាំបាច់ ដើម្បីការបារសុខុមាលភាពមនុស្ស សត្វ និង រុក្ខជាតិ ។ បញ្ហាសុខភាពសាធារណៈ ដែលទាក់ទិនទៅនឹងសុវត្ថិភាពម្ហូបអាហារ ជាញឹកញាប់ធ្វើឲ្យ កូដិច ក្លាយជាចំណុចកណ្តាលនៃកិច្ចពិភាក្សាអន្តរជាតិ ។
របៀបវារៈ ដែលក្រុមការងារកូដិចអាស៊ាន ( ATFC ) បើកកិច្ចប្រជុំលើកទី១៩នេះ រួមមាន៧ចំណុចសំខាន់ៗ ដែលពាក់ព័ន្ធទៅនឹងរបាយការណ៍វឌ្ឍនភាពរបស់កិច្ចប្រជុំកូដិចអន្តរជាតិ លើការពិភាក្សាគោលជំហររួមរបស់អាស៊ាន ដែលមាននៅក្នុងសេចក្តីព្រៀងនិងសំណើរថ្មី ក្នុងកិច្ចការកូដិច ។ កិច្ចប្រជុំ ក៏ត្រូវបានពិភាក្សាផងដែរ នូវបញ្ហាមួយចំនួនទៀត ដែលនឹងលើកឡើងដោយប្រទេសជាសមាជិក ដូចជាការពិភាក្សាលើសេចក្តីព្រៀងស្តង់ដារម្ហូបអាហារមួយចំនួនពាក់ព័ន្ធទៅនឹងកត្តាគុណភាព សមាសភាពផ្សំ សារធាតុចម្លង សារធាតុបន្ថែមក្នុងម្ហូបអាហារ សំណល់ថ្នាំព្យាបាលសត្វ ការដាក់ស្លាកសញ្ញា ការពិនិត្យលើសំណើរថ្មីដែលស្នើដោយសមាជិកកូដិចអាស៊ាន ក្នុងការរៀបចំធ្វើស្តង់ដារម្ហូបអាហារមួយចំនួន បន្តពិនិត្យលើនីតិវិធីរៀបចំគោលជំហររួមរបស់អាស៊ាន ក្នុងការឆ្លើយតបទៅនឹងកិច្ចការកូដិចអន្តរជាតិ ។
កូដិច ( CODEX ) គឺជាក្រុមជំនាញម្ហូបអាហារអន្តរជាតិ បង្កើតឡើងនៅក្នុងឆ្នាំ១៩៦៣ មានឈ្មោះថា គណកម្មាធិការកុដិច ( Codex Alimentarius ) ដោយមានការចូលរួមពីអង្គការស្បៀងនិងកសិកម្មសហប្រជាជាតិ ( FAO ) និងអង្គការសុខភាពពិភពលោក ( WHO ) មកដល់ពេលនេះមានសមាជិកសារុប ១៨៨ប្រទេស ដែលក្នុងនោះប្រទេសកម្ពុជាបានចូលជាសមាជិកក្នុងឆ្នាំ១៩៧៤ ។ ដោយឡែក ក្នុងក្របខ័ណ្ឌអាស៊ាន ក្រុមការងារ ដូដិច បង្កើតឡើងក្នុងឆ្នាំ២០០១ ក្នុងបំណងដើរតួជាវេទិការមួយ ពិភាក្សាអំពីលទ្ធភាពក្នុងការធ្វើសុខុដុមនីយកម្មស្តង់ដារ និង បទបញ្ញត្តិបច្ចេកទេស សម្រាប់បណ្តាប្រទេសអាស៊ាន ដោយប្រើប្រាស់ស្តង់ កូដិច សម្រាប់ម្ហូបអាហារ ជាគោល ។
យ៉ាងណាក៏ដោយ នៅកម្ពុជាបច្ចប្បន្ននេះ បញ្ហាសុវត្ថិភាពចំណីអាហារ វាគឺជាបញ្ហាប្រឈមមួយ កំពុងបានក្លាយជាប្រធានបទក៏ក្តៅគគុក ។ ការបរិគោគចំណីអាហារ បន្លែ ផ្លែឈើ ត្រីសាច់ ដែលមិនមានការប្រុងប្រយ័ត្ននោះ សារធាតុគីមីនឹងត្រូវបានចូលលុកលុយបំផ្លាញសុខភាពមនុស្សយ៉ាងធ្ងន់ធ្ងរ ។ នៅក្នុងបទសម្ភាសន៍ក្រៅកិច្ចប្រជុំនោះ ស្តីអំពីការទប់ស្កាត់ កុំឲ្យប្រជាពលរដ្ឋកម្ពុជា ក្លាយខ្លួនជាជនរងគ្រោះ ដោយសារតែការបរិគោគចំណីអាហារមិនមានសុវត្ថិភាព ឯកឧត្តម ផាន អូន អគ្គនាយករង អគ្គនាយកដ្ឋានកាំកុងត្រូលនៃក្រសួងពាណិជ្ជកម្មកម្ពុជា បានបង្ហាញអំពីយន្តការនិងសកម្មភាពរបស់នាយកដ្ឋានកាំកុងត្រូល យ៉ាងដូច្នេះថា ៖ —— ( បទសម្ភាសន៍ ក្នុងវីដេអូ) —— ៕
អត្ថបទ និងរូបភាព៖ លោក ងិន គឹមឡេង លោក យូ វង្ស លោក ស៊ាន សុផាត
