កាំភ្លើងខូចគុណភាព ប្រមាណ២ម៉ឺនដើម ត្រូវបានមជ្ឈមណ្ឌលសកម្មភាពកំចាត់មីនកម្ពុជាហៅកាត់ថាស៊ីម៉ាក់ (CMAC) កែឆ្នៃធ្វើជារូបសំណាក និងវត្ថុផ្សេងៗ ដូចរូបសត្វដំរី ដើមឈើ រថក្រោះ ផែនទី នាឡិកា កៅអី ជាដើម ដើម្បីឱ្យយុវជនជំនាន់ក្រោយ បានសិក្សាស្វែងយល់ពីអតីតកាលរបស់ប្រទេសកម្ពុជា ដែលបានជួបសោកនាកម្មនៅក្នុងសម័យសង្គ្រាមកន្លងមក។
ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានប្រាប់អ្នកសារព័ត៌មាន ក្នុងពេលប្រតិភូម នៃកិច្ចប្រជុំសន្នីសិទកំពូលអាស៊ីលើកទី១៦ ទៅធ្វើទស្សនៈកិច្ចនៅសារៈមន្ទីរសន្ដិភាពសកម្មភាពកំចាត់មីន កន្លងទៅនេះថា ការរចនាកាំភ្លើងខូចគុណភាពនេះ បានធ្វើឡើងប្រហែល៣សប្ដាយ៍មកហើយ។ ការកែច្នៃសំណាកកាំភ្លើង ទាំងនេះ ដូចជាសត្វដំរីសន្ដិភាព រថពាសដែក ជាដើមឈើ រូបផែនទី និងរូបនាឡិកាជាដើម ក្នុងគោលបំណងចង់បង្ហាញពីការប្រើប្រាស់អាវុធទាំងអស់នោះ មកជាគំនិតសន្ដិភាពនិយមវិញ។ ទាំងនោះគឺជាភស្ដុតាង សម្រាប់ទុកអប់រំទៅដល់ក្មេងៗ និងយុវជនជំនាន់ក្រោយឱ្យយល់ពីប្រវត្តិរបស់ពួកវា ថាតើអាវុធដ៏កាចសាហាវ និងច្រើនសន្ធឹកសន្ធាប់ទាំងនេះ គេយកមកធ្វើអ្វី ប៉ុន្ដែបើយកកាំភ្លើងទាំងនោះទៅកម្ទេចចោលអស់ នោះវានឹងបាត់បង់នូវវត្ថុតាង ដែលបង្ហាញអំពីសោកនាដកម្មដ៏ឈឺចាប់ នៃសង្គ្រាមនៅកម្ពុជា។
តាមការឲ្យដឹងពីមន្ដ្រីបម្រើការនៅក្នុងសារមន្ទីរសន្ដិភាពសកម្មភាពកំចាត់មីន ខេត្ដសៀមរាបបាននិយាយថា ស៊ីម៉ាក់មានកិច្ចព្រមព្រៀងជាមួយអគ្គស្នងការនគរបាលជាតិ ពីការទទួលយកកាំភ្លើង និងអាវុធយុទ្ធភណ្ឌចាស់ៗ មកកែច្នៃ ដើម្បីជាប្រយោជន៍ជាតិ ហើយស៊ីម៉ាក់ ក៏បានទទួលកាំភ្លើង និងអាវុធចាស់ៗ អស់គុណភាពពីអគ្គស្នងការនគរបាលជាតិ ជាង ១ ម៉ឺនដើម ដើម្បីយកមកកែច្នៃជារូបសត្វ និងវត្ថុផ្សេងៗជាដើម។ ការតម្លើង និងរចនារូបទាំងអស់នេះ គឺក្រុមការងារស៊ីម៉ាក់ ជាអ្នកធ្វើដោយផ្ទាល់តែម្ដង»៕
អត្ថបទ និងរូបភាព៖ ភ្នាក់ងារសារព័ត៌មានកម្ពុជា
កែសម្រួលអត្ថបទ៖ លោក សេង ផល្លី
