មត្ថកិច្ចនគរបាលស្រុកវ៉ារិន បានឲ្យដឹងថា មនុស្ស០៣នាក់ត្រូវសមត្ថកិច្ចនគរបាលប៉ុស្តិ៍រដ្ឋបាលឃុំស្រែណូយឃាត់ខ្លួន ដោយជាប់សង្ស័យពាក់ព័ន្ធករណីឆបោក គឺទម្លាក់មាសកាឡៃដូរយកខ្សែកមាសពីជនរងគ្រោះ រួមមាន ៖១. ឈ្មោះ ជួង សុភាព ហៅ ទូច ភេទប្រុស អាយុ៤៣ឆ្នាំ , ២. ឈ្មោះ ឌីន ចាន់ថុល ហៅម៉ូវ ភេទស្រី អាយុ៣៩ឆ្នាំ ត្រូវជាប្រពន្ធរបស់ឈ្មោះ ជួង សុភាព ជាប់ពាក់ព័ន្ធករណីឆបោក គឺទម្លាក់មាសកាឡៃដូរយកខ្សែកមាសពីជនរងគ្រោះ និង ៣. ឈ្មោះ អ៊ុយ ណាត ភេទប្រុស អាយុ ៥០ឆ្នាំ មុខរបរមិនពិតប្រាកដ ពាក់ព័ន្ធបទសមគំនិតអំពើឆបោក ដែលអ្នកទាំង៣នាក់នេះ មានទីលំនៅបច្ចុប្បន្ន ស្នាក់នៅភូមិជ្រឹងខាងលិច សង្កាត់កូនក្រៀល ក្រុងសំរោង ខេត្តឧត្តរមានជ័យ ។
សមត្ថកិច្ចនគរបាលស្រុកវ៉ារិន បានឲ្យដឹងទៀតថា ករណីនេះគឺ កាលពីវេលាម៉ោង៩និង៤០នាទីព្រឹក ថ្ងៃទី១៦ ខែមិថុនា ឆ្នាំ២០១៩នេះ ជនរងគ្រោះឈ្មោះ អួន សាលួត ភេទស្រី អាយុ៤០ឆ្នាំ ទីលំនៅភូមិទទួលរមៀត ឃុំវ៉ារិន ស្រុកវ៉ារិន និងកូនស្រីឈ្មោះ សូរិយា ចាន់ដា ភេទស្រី អាយុ១៨ឆ្នាំ បានជិះម៉ូតូឌុបគ្នា២នាក់ម្ដាយនិងកូន មកដល់ចំណុចខាងលិចភូមិឫស្សីតូច ឃុំស្វាយស ស្រុកវ៉ារិន ត្រូវជនសង្ស័យមានគ្នាចំនួន០៣នាក់ ធ្វើសកម្មភាពដោយទម្លាក់មាសកាឡៃឆបោកយកខ្សែកមាសពីជនរងគ្រោះ ទម្ងន់មួយតំឡឹងប្រាំហ៊ុន រួចជិះម៉ូតូគេចខ្លួនមកទិសខាងកើត លុះបានចម្ងាយប្រហែល២០០ ម៉ែត្រ ជនរងគ្រោះដឹងខ្លួនថាចាញ់បោកគេ ក៏បានមកប្ដឹងនគរបាលប៉ុស្តិ៍រដ្ឋបាលឃុំស្វាយស ហើយត្រូវបានកម្លាំងជំនាញសហការជាមួយកម្លាំងប៉ុស្តិ៍ផ្សេងៗក្នុងភូមិសាស្ត្រស្រុកវ៉ារិន ជួយស្វែងរក និង បានធ្វើការឃាត់ខ្លួនជនសង្ស័យទាំង០៣នាក់ នៅចំណុចក្បែរខ្លោងទ្វារវត្តល្វា ឃុំស្រែណូយ ដោយដកហូតបានខ្សែកមាសរបស់ជនរងគ្រោះមកវិញ និងមធ្យោបាយរបស់ជនសង្ស័យ មានម៉ូតូចំនួន០២គ្រឿង ។
ក្រោយពេលឃាត់ខ្លួន បានរាយការណ៍ទៅការិយាល័យជំនាញរៀបចំកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្ត និង កំពុងកសាងសំណុំរឿងបញ្ជូនខ្លួនទៅសាលាដំបូងខេត្ត ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
