នៅព្រឹកថ្ងៃទី១៩ ខែ មិថុនា ឆ្នាំ២០១៩នេះ នៅស្រុកអង្គរជុំ ខេត្តសៀមរាប មានធ្វើពិធីប្រកាសចូលកាន់តំណែង ក្រុមប្រឹក្សា ស្រុកអង្គរជុំ ក្រោមអធិបតីភាពឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប ដោយ មានការចូលរួម ពីសំណាក់អស់លោក លោកស្រីថ្នាក់ដឹកនាំមន្ទីរ នាយករងរដ្ឋបាលខេត្ត អាជ្ញាធរស្រុក ឃុំ មន្ត្រីការិយាល័យជុំវិញស្រុក កងកម្លាំងប្រដាប់អាវុធ តំណាងគណបក្សនយោបាយក្នុងក្រុមប្រឹក្សា និង អង្គការដៃគូផងដែរ ។
ក្នុងកិច្ចស្វាគមន៍របស់លោក លុក ផុស អភិបាលស្រុកអង្គរជុំ បានធ្វើសេចក្តីរាយការណ៍ អំពីសមទ្ធិផលដែលស្រុកសម្រេច បានក្នុងរយៈពេល៥ឆ្នាំកន្លងមក លើកិច្ចអភិវឌ្ឍន៍ហេដ្ឋារចនាសម្ព័ន្ធ រូបវ័ន្តនិងអរូបវន្ត័ នៅក្នុងស្រុកអង្គរជុំ នៃអាណត្តិទី២ របស់ក្រុមប្រឹក្សាស្រុក ។
បន្តមកលោក ឈឿត ចំរើន នាយករងទីចាត់ការធនធានមនុស្សនៃរដ្ឋបាលសាលាខេត្តសៀមរាប បានអាននូវអនុក្រឹត្យ សម្រេចតែងតាំងលោក ខូយ រ៉ាត់ ជាប្រធានក្រុមប្រឹក្សាស្រុកអង្គរជុំ អាណត្តិទី៣ ដើម្បីបន្តដឹកនាំធ្វើឲ្យរចនាសម្ព័ន្ធរដ្ឋបាលថ្នាក់ក្រោមជាតិ ធ្វើការកែទម្រង់ជាបន្តបន្ទាប់។ ក្នុងនោះត្រូវបានប្រកាស ទទួលស្គាល់សមាជិកក្រុមប្រឹក្សាស្រុកអង្គរជុំ ចំនួន១៩រូប មានស្រី០៣រូប មកពីគណបក្សប្រជាជនកម្ពុជាចំនួន ១៧រូប គណបក្សហ្វុនស៊ិនប៊ិច ចំនួន ១ រូប គណបក្សរួបរួមជាតិ ០១រូប ។
បន្ទាប់ពីគណៈអធិបតីធ្វើការប្រគល់នូវអនុក្រិត្យជូនដល់ប្រធាន និង ការធ្វើចំណាប់អារម្មណ៍ប្តេជ្ញាចិត្តរបស់លោក ខូយ រ៉ាត់ ជាប្រធានក្រុមប្រឹក្សាស្រុកអង្គរជុំ អាណត្តិទី៣ មានសង្ឃឹមជឿជាក់យ៉ាងមុតមាំ ចំពោះការផ្តល់នូវឱវាទ ទស្សនៈវិស័យ និង អនុសាសន៍ប្រកបដោយគតិបណ្ឌិត ជួយគាំទ្រសកម្មភាពទាំងឡាយ របស់ក្រុមប្រឹក្សា គណៈអភិបាលស្រុក ដើម្បីឲ្យការអនុវត្តប្រព័ន្ធរដ្ឋបាលឯកភាព កាន់តែមានប្រសិទ្ធភាពខ្ពស់ ។
មានប្រសាសន៍សំណេះសំណាលនោះដែរ ឯកឧត្តម អ៊ឹង ហឿន បានគូសបញ្ជាក់ថា ក្នុងនាមជាសមាជិក ក្រុមប្រឹក្សា ដែលជាប់ឆ្នោតនេះ អស់លោក លោកស្រី ដែលមានសមាសភាពមកពីគណបក្សនយោបាយផ្សេងៗ ក៏ពិតមែន តែតាមគោលការណ៍ ច្បាប់ ក្រុមប្រឹក្សា គឺជាតំណាងប្រជាពលរដ្ឋទាំងមូល ត្រូវខិតខំបម្រើផលប្រយោជន៍ សេចក្តីតម្រូវការ របស់បងប្អូនប្រជាពលរដ្ឋ ដោយ មិនប្រកាន់ពីនិន្នាការនយោបាយណាមួយឡើយ ។ ឯកឧត្តមប្រធានក្រុមប្រឹក្សាខេត្ត ក៏ បានធ្វើការកោតសរសើរ និង វាយតម្លៃខ្ពស់ ចំពោះសមទ្ធិផល ដែលស្រុកអង្គរជុំ សម្រេចបានរយៈពេល៥ឆ្នាំមក ក្នុង អាណត្តិទី២ នៃក្រុមប្រឹក្សាស្រុក ពិតជាការចូលរួមចំណែក ក្នុងការពង្រឹងសន្តិភាព សិ្ថរភាពនយោបាយសង្គម បានធ្វើឲ្យ កម្ពុជាទទួលបានការគាំទ្រ ពីសំណាក់មជ្ឈដ្ឋានជាតិ អន្តរជាតិ ដៃគូ អភិវឌ្ឍន៍ ក៏ដូចអ្នកវិយោគនានា ដែលធ្វើឲ្យប្រជាពល រដ្ឋបានបោះជំហាន ទៅមុខបន្តទៀត ។
ក្នុងនោះឯកឧត្តម អ៊ឹង ហឿន ក៏បានផ្តាំផ្ញើដល់លោក លោកស្រី ប្រធាន និង សមាជិកក្រុមប្រឹក្សាស្រុកអង្គរជុំ ត្រូវខិតខំប្រឹងប្រែងអនុវត្តបន្តការងារស្នូលរបស់ខ្លួន ដោយមានការឯកភាពផ្ទៃក្នុង សាមគ្គី ភាពល្អ ព្រមទាំងចេះបែងចែកនូវតួនាទីជូនដល់សមាជិកក្រុមប្រឹក្សារបស់ខ្លួន ដោយមិនបក្ខពួក ស្របពេលដែលរាជរដ្ឋាភិបាល នីតិកាលទី៦ នៃរដ្ឋសភា ដែលបានកំពុងបន្តជម្រុញការអនុវត្ត កម្មវិធីកម្រែទម្រង់ វិមជ្ឈការ និង វិសហមជ្ឈការ ឲ្យកាន់តែស៊ីជម្រៅថែមទៀត ។ ក្នុងការអនុវត្តការងារ សមាជិកក្រុមប្រឹក្សាត្រូវខិតខំបម្រើផលប្រយោជន៍ និង សេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព យុត្តិធម៌ មិនត្រូវប្រកាន់និន្នាការនយោបាយនោះឡើយ ក្នុងការឆ្លើយតបទៅនឹងតម្រូវការ ជាក់ស្តែងរបស់ប្រជាពលរដ្ឋក្នុងមូលដ្ឋាន ។
ឯកឧត្តម អ៊ឹង ហឿន ក៏លើកពីយន្តការមួយចំនួនដែលជាមូលដ្ឋានគ្រឹះ ក្នុងការអនុវត្តការងាររបស់សមាជិកក្រុមប្រឹក្សា អំពីគោលការច្បាប់ អង្គការវិន័យ ក្រមសីលធម៌ ក្នុងនោះដោយសង្កត់ធ្ងន់លើការងារសន្តិសុខ សណ្តាប់ធ្នាប់ និង ការអនុវត្តគោលនយោបាយភូមិឃុំមានសុវត្តិភាព ពិសេស ការបង្ក្រាប់រាល់បទល្មើសព្រៃឈើ ការកាប់ទន្ទ្រានព្រៃយកដីធ្វើជាកម្មសិទ្ធ កុងត្រូលជជុះ និង ការជួញដូរគ្រឿងញៀនខុសច្បាប់ ដែលធ្វើឲ្យប៉ះពាល់យ៉ាងខ្លាំងដល់សន្តិសុខសង្គម ព្រមទាំងគ្រប់គ្រងឲ្យខាងតែបានចំពោះប្រជាពលរដ្ឋចំណាកស្រុក និង ចំណូល ក្នុងការធានានូវសុវត្ថិភាព និង សន្តិសុខបានល្អ ។ ឯកឧត្តមមានសង្ឃឹម យ៉ាង ម៉ុតមាំថាក្រុមប្រឹក្សា គណៈអភិបាល មន្ត្រីអ្នកមុខអ្នកការ និងប្រជាពលរដ្ឋទាំងអស់ក្នុងស្រុកអង្គរជុំ និងខិតខំបំពេញការងាររួមគ្នា ដើម្បីសម្រេចបាននូវសមទ្ធិផលថ្មី ថែមទៀត ក្នុងរយៈពេល៥ឆ្នាំខាងមុខនេះ ៕
អត្តបទនិងរូបថត៖ម៉ី សុខារិទ្ធ ភ្នាក់ងារខេត្តសៀមរាប
