កាលពីរសៀលថ្ងៃទី១៧ ខែមិថុនា ឆ្នាំ២០១៩ម្សិលមិញនេះ នៅសាលប្រជុំរដ្ឋបាលស្រុកជីក្រែង មានរៀបចំពិធីប្រកាសចូលកាន់តំណែងក្រុមប្រឹក្សាស្រុកជីក្រែង អាណត្តិទី៣ ក្រោមអធិបតីភាពឯកឧត្ដម ទៀ សីហា អភិបាលខេត្តសផមរាប ដោយមានការអញ្ជើញចូលរួមពីសំណាក់លោក លោកស្រី ជាប្រធាននិងសមាជិកក្រុមប្រឹក្សាស្រុក , គណៈអភិបាលស្រុក និង មន្ត្រីអ្នកមុខអ្នកការក្នុងស្រុកជីក្រែងជាច្រើនរូប ។
មានប្រសាសន៍ក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បានបញ្ជាក់ថា ទោះបីក្រុមប្រឹក្សាថ្នាក់ក្រោមជាតិត្រូវបានជ្រើសរើសតាមរយៈនៃការបោះឆ្នោតដោយផ្ទាល់ ឬមិនផ្ទាល់ក្តី ក្រុមប្រឹក្សាថ្នាក់ក្រោមជាតិ គឺជាផ្នែកមួយនៃអំណាចនីតិប្រតិបត្តិ និងមានស្វ័យភាពក្នុងដែនកំណត់នៃច្បាប់ លិខិតបទដ្ឋានជាធរមាន ក្នុងការគ្រប់គ្រងចាត់ចែងកិច្ចការមូលដ្ឋានរបស់ខ្លួន ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ក្នុងដែនសមត្ថកិច្ចរបស់ខ្លួន ហើយក្នុងការអនុវត្តការងារ សមាជិកក្រុមប្រឹក្សាត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព ដោយយុត្តិធម៌ និង ដោយមិនត្រូវប្រកាន់និន្នាការនយោបាយនោះឡើយ ។
ព័ត៌មានជាតិ ថ្មីៗ
ឯកឧត្តម ទៀ សីហា មានប្រសាសន៍ទៀតថា ផ្អែកតាមរបាយការណ៍របស់រដ្ឋបាលស្រុកជីក្រែង បានបង្ហាញឲ្យឃើញថា ក្រុមប្រឹក្សាក្រុងអាណត្តិទី២ គណៈអភិបាលស្រុកជីក្រែង មន្ត្រីរាជការគ្រប់លំដាប់ថ្នាក់ កងកម្លាំងមានសមត្ថកិច្ច រួមទាំងប្រជាការពារ និង ប្រជាពលរដ្ឋទូទាំងស្រុកជីក្រែង បានរួមសាមគ្គីសហការគ្នា ខិតខំប្រឹងប្រែងយ៉ាងសកម្មក្នុងការកសាងនិងអភិវឌ្ឍក្រុង ឲ្យមានការរីកចម្រើនលើគ្រប់វិស័យ រួមមានការផ្តល់សេវាសាធារណៈ ការអភិវឌ្ឍមូលដ្ឋាន ការជួយសង្គ្រោះប្រជាពលរដ្ឋពីគ្រោះធម្មជាតិនានា ការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពជូនប្រជាពលរដ្ឋ ដូច្នេះតាមរយៈនេះ ឯកឧត្ដមមានសង្ឃឹមជឿជាក់ លើកិច្ចសហការដឹកនាំអនុវត្តបានល្អ ដោយក្រុមប្រឹក្សានិងអភិបាលស្រុកជីក្រែង ដែលជាការចាប់ផ្តើមបោះជំហ៊ានថ្មី ឆ្ពោះទៅរកការអភិវឌ្ឍខេត្តទេសចរណ៍បន្តទៀត សំខាន់គឺការដោះស្រាយបញ្ហាប្រឈមនានា ដែលនៅសេសសល់ពីមុនមក ។
ក្នុងឱកាសនោះដែរ ឯកឧត្តម ទៀ សីហា ក៏បានលើកឡើងពីយន្តការមួយចំនួនដែលជាមូលដ្ឋានគ្រឹះ ក្នុងការអនុវត្តការងាររបស់សមាជិកក្រុមប្រឹក្សា អំពីគោលការច្បាប់ អង្គការវិន័យ ក្រមសីលធម៌ ក្នុងនោះ ដោយសង្កត់ធ្ងន់លើការងារសន្តិសុខ សណ្តាប់ធ្នាប់ និង ការអនុវត្តគោលនយោបាយភូមិឃុំមានសុវត្តិភាព សំខាន់លើការបង្ក្រាប់រាល់បទល្មើសព្រៃឈើ បទល្មើសនេសាទ បំបាត់កុងត្រូលជជុះ និង ការកាប់ទន្ទ្រានព្រៃលិចទឹកយកដីធ្វើកម្មសិទ្ធិផ្ទាល់ខ្លួន ដែលធ្វើឲ្យប៉ះពាល់តំបន់ធម្មជាតិ និង ជម្រកត្រីពងកូនស្វែងរកចំណីនៅរដូវទឹកឡើង ហើយឯកឧត្តមមានសង្ឃឹម យ៉ាងម៉ុតមាំថាក្រុមប្រឹក្សា គណៈអភិបាល មន្ត្រីអ្នកមុខអ្នកការ និង ប្រជាពលរដ្ឋទាំងអស់ក្នុងស្រុកជីក្រែង និង ខិតខំបំពេញការងារ រួមគ្នា ដើម្បីសម្រេចបាននូវសមទ្ធិផលថ្មី ថែមទៀត ក្នុងរយៈពេល៥ឆ្នាំខាងមុខនេះ ។
សូមបញ្ជាក់ដែរថា សមាជិកក្រុមប្រឹក្សាស្រុកជីក្រែង សម្រាប់អាណត្តិទី៣នេះ មានសមាសភាពចំនួន២១រូប ដែលមានលោក យន់ ស៊ីភន ប្រធានក្រុមប្រឹក្សាស្រុក ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
