កាលពីរសៀលថ្ងៃទី១៧ ខែមិថុនា ឆ្នាំ២០១៩ម្សិលមិញនេះ នៅវត្តបាគង ស្ថិតក្នុងភូមិឳឡោក ឃុំបាគង ស្រុកប្រាសាទបាគង មានរៀបចំប្រារព្ធពិធីប្រកាសព្រះរាជក្រឹត្យ ប្រកាសនីយបត្រតែងតាំងគោរមងារ និងស្រោចសុគន្ឋវារី ប្រគេនព្រះយសធម្ម អ៊ូ សូត្រ រាជាគណៈថ្នាក់កិត្តិយស និង ជាព្រះគ្រូបាសាទាភិរ័ក្ខព្រះអនុគណស្រុកប្រាសាទបាគង ក្រោមព្រះអធិបតីភាពសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា និង លោក ពៅ ពិសិដ្ឋ អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលខេត្តសៀមរាប ដោយមានការនិមន្ត និង អញ្ជើញចូលរួមពីសំណាក់មន្ត្រីសង្ឃខេត្ត ស្រុក ក្រុង និង លោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត អភិបាលស្រុកនិងមន្ត្រីរាជការក្នុងស្រុក លោកគ្រូ អ្នកគ្រូ សិស្សានុសិស្ស និង ប្រជាពុទ្ធបរិស័ទក្នុងស្រុកប្រាសាទបាគងយ៉ាងច្រើនកុះករ ។
សូមបញ្ជាក់ថា ព្រះគ្រូបាសាទាភិរ័ក្ខ អ៊ូ សូត្រ ត្រូវបានប្រកាសព្រះរាជក្រឹត្យ ទទួលងារជាព្រះរាជាគណៈថ្នាក់កិត្តិយស ជាទីប្រឹក្សាសម្តេចព្រះមហាសង្ឃរាជ ទេព វង្ស , ប្រកាសនីយបត្រជាព្រះអនុគណស្រុកប្រាសាទបាគង ជាព្រះគ្រូធម្មាចារ្យប្រធានមណ្ឌលវិបស្សនាធុរៈប្រចាំខេត្តសៀមរាប និង ជាចៅអធិការវត្តបាគង។
ព្រះតេជគុណ អ៊ូ សូត្រ ប្រសូត្រនៅឆ្នាំ១៩៣៣ នៅភូមិឳឡោក ឃុំបាគង ស្រុកប្រាសាទបាគង ខេត្តសៀមរាប បានបួសនៅវត្តដំណាក់ឆ្នាំ១៩៨៣ និងក្រោយមកនិមន្តមកវត្តបាគង ហើយព្រះអង្គឡើងជាចៅអធិការនៅឆ្នាំ១៩៩៣ និងទទួលជាឧបជ្ឈាយ៍ស្រុកនៅឆ្នាំ១៩៩៨ និងជាអនុគណស្រុកស្តីទីចាប់ពីឆ្នាំ២០១៦មក ។
លោក ពៅ ពិសិដ្ឋ អភិបាលរងខេត្តសៀមរាប បានមានប្រសាសន៍ ថា នៅកម្ពុជាវិស័យអាណាចក្រនិងពុទ្ឋចក្រ តែងតែដើរទន្ទឹមគ្នាពុំអាចខ្វះមួយណាបានឡើយ ក្នុងការចូលរួមជួយស្តារនិងអភិវឌ្ឍន៍សង្គមជាតិឱ្យរីកចម្រើន ខណៈវិស័យព្រះពុទ្ធសាសនាបានចែងក្នុងរដ្ឋធម្មនុញ្ញថា ព្រះពុទ្ឋសាសនាជាសាសនារបស់រដ្ឋ ហើយក្រោយថ្ងៃរំដោះ៧មករា ឆ្នាំ១៩៧៩ វិស័យពុទ្ឋចក្រនៅកម្ពុជា មានការអភិវឌ្ឍរីកលូតលាស់គួរឱ្យកត់សំគាល់ ដូច្នេះ វិស័យព្រះពុទ្ឋសាសនានៅកម្ពុជា អាចរីកចម្រើនទៅបាន គឺអាស្រ័យដោយប្រទេសជាតិមានសុខសន្តិភាព ហើយដោយសារកត្តាសុខសន្តិភាពនេះហើយ បានធ្វើឲ្យប្រជាពុទ្ឋបរិស័ទ មានឱកាសប្រកបកិច្ចការរកស៊ីជួញដូរ ដោយមិនមានការភ័យខ្លាច ដែលញ៉ាំងឱ្យកម្រិតសេដ្ឋកិច្ចនិងជីវភាពក្នុងគ្រួសារចេះតែរីកលូតលាស់ ហើយពួកគាត់រីករាយនិងជ្រះថ្លាក្នុងការមកធ្វើបុណ្យទានផ្សេងៗ មានសុខសន្តិភាពទើបយើងមានឱកាសបានបំពេញបុណ្យតាមទៅកាលវេលា តាមគន្លងប្រពៃណីពីជីដូនជីតាបានពេញលេញដោយគ្មានក្តីបារម្ភ ។
លោក ពៅពិសិដ្ឋ ក៏បានថ្លែងនូវការកោតសរសើរ ចំពោះការខិតខំប្រឹងប្រែងរបស់អាជ្ញាធរមូលដ្ឋាន ព្រះសង្ឃនិងប្រជាពុទ្ឋបរិស័ទនៅក្នុងស្រុកប្រាសាទបាគង ជាពិសេសវត្តបាគងនេះតែម្តង ក្រោមការដឹកនាំរបស់ព្រះគ្រូ បាសាទភិរ័ក្ខ អ៊ូ សូត្រ ព្រះអនុគណស្រុកនិងជាព្រះចៅអធិការវត្តបាគង បានធ្វើឱ្យអារាមមួយនេះទទួលបាននូវការអភិវឌ្ឍ បានកសាងនិងជួសជុលនូវសមិទ្ឋផលនានាជាច្រើន ដូចជា ព្រះវិហារ កុដិ សាលាឆាន់ មណ្ឌលវិបស្សនាសមាធិ អនុវិទ្យា ល័យ បាគង សាលាបឋមសិក្សានានាក្នុងភូមិ កសាងផ្លូវក្រាលគ្រួសក្រហមនិងជាពិសេសផ្តល់អំណោយសប្បុរសធម៌ជួយដល់សាខាកាកបាទក្រហមខេត្តផងដែរ ។
សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស មានថេរៈដិកាថា សមិទ្ឋផលរីកចម្រើនក្នុងវត្តបាគង នេះ បានបង្ហាញឱ្យឃើញពីការយកចិត្តទុកដាក់របស់អាជ្ញាធរមូលដ្ឋានគ្រប់ជាន់ថ្នាក់ រួមសហការគ្នាបានល្អជាមួយប្រជាពុទ្ឋបរិស័ទក្នុងមូលដ្ឋាន និងព្រះសង្ឃក្នុងវត្ត នាំគ្នាអភិវឌ្ឍអារាមនេះបានរីកចម្រើន លេចចេញនូវសមិទ្ឋផលជាច្រើនគួរឱ្យកត់សម្គាល់ ដូច្នេះតាមរយៈនេះ សូមឱ្យរក្សានូវជំហរសាមគ្គីភាពជាធ្លុងមួយ រវាងអាជ្ញាធរមូលដ្ឋាន ព្រះសង្ឃ និង ប្រជាពុទ្ឋបរិស័ទ ដើម្បីរួមគ្នាបន្តជ្រោងវិស័យព្រះពុទ្ឋសាសនាឱ្យស្ថិតស្ថេរគង់វង្ស និង រួមសាមគ្គីគ្នាបន្តការអភិវឌ្ឍឱ្យកាន់រីកចម្រើនបន្ថែមទៀត សម្រាប់ទុកជាកេរដំណែលតកូនតចៅរបស់យើងនាពេលអនាគត។
ជាមួយគ្នានេះដែរ សម្តេចព្រះមហាសង្ឃរាជ បានមានព្រះរាជបន្ទូលដាស់តឿនឱ្យប្រជាពុទ្ឋបរិស័ទទាំងអស់ ពិចារណាដោយដើរតាមផ្លូវមជ្ឈឹមាបដិបទា គោរប្រតិបត្តិតាមឱវាទព្រពុទ្ឋជាម្ចាស់ គឺដើរផ្លូវកណ្តាល ពោលគឺនៅត្រង់ណាត្រូវស្អាតត្រង់នោះ ដោយការសម្អាតកាយវាចារចិត្ត និងស្អាតទាំងឥរិយាបទទាំងបួន ដេកដើរឈរអង្គុយ ក៏ត្រូវការដុសខាតសម្អាតឱ្យបានជាប្រចាំផងដែរ ព្រមទាំងការអាស្រ័យនូវគ្រឿងអាហារបរិភោគ រកទទួលទានប្រចាំថ្ងៃ ក៏ត្រូវពិចារណាឱ្យបានសមរម្យតាមការគួរ ដើម្បីថែរក្សាការពារ សេចក្តីសុខសាន្តរបស់សង្គមជាតិ ដោយប្រកាន់យកមាគ៌ាព្រះពុទ្ធ សមនឹងទស្សនៈដែលថា ព្រះពុទ្ធសាសនាជាកម្លាំងដឹកនាំចរិយាធម៌ ក្នុងការលុបបំបាត់អំពើហិង្សាសង្គម ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
