សៀវភៅផាត់ពណ៌បេតិកភណ្ឌទី៣ រៀបរៀងដោយអាជ្ញាធរជាតិអប្សរា នឹងដាក់ឲ្យសិស្សានុសិស្សអនុវត្តឆាប់ៗនេះហើយ ដែលសៀវភៅផាត់ពណ៌មានបោះពុម្ភឡើងក្នុងគោលបំណង បង្កើនសម្ភារៈសិក្សាបន្ថែមដល់សិស្ស សាលាបឋមសិក្សា ផ្តល់ចំណេះដឹងអំពីវប្បធម៌ទូទៅ អប់រំកុមារ និងយុវវ័យឲ្យស្គាល់អំពីសម្បត្តិវប្បធម៌ ដែលជាបេតិកភណ្ឌ ដ៏មានតម្លៃរបស់ជាតិនិងរបស់ពិភពលោក ជាពិសេសបង្កើនស្មារតីស្រលាញ់ និងជួយថែរក្សាការពារបេតិកភណ្ឌ។
សៀវភៅផាត់ពណ៌បេតិកភណ្ឌទី៣ ដែលមានចំណងជើងថា “ស្វែងយល់អំពីរាជធានីអង្គរ” ចំណាយអស់រយៈពេលប្រមាណ ២ឆ្នាំ តាមរយៈកិច្ចសហប្រតិបត្តិការរវាងអាជ្ញាធរជាតិអប្សរា មជ្ឈមណ្ឌលជាតិយុវជនខេត្តសៀមរាប នៃក្រសួងអប់រំ យុវជននិងកីទ្បា ព្រមទាំងមានការគាំទ្រយ៉ាងសកម្មពីសហព័ន្ធជាតិ នៃសមាគមយូណេស្កូជប៉ុន ហៅកាត់ថា «NFUAJ»។
លោក អ៊ឹម សុខរិទ្ធី ប្រធានក្រុមការងាររៀបចំសៀវភៅផាត់ពណ៌ទី៣ របស់អាជ្ញាធរជាតិអប្សរា បានឲ្យដឹងថា ក្នុងសៀវភៅផាត់ពណ៌នេះ នឹងដាក់ឲ្យសិស្សានុសិស្ស និងយុវជន ដែលស្ថិតនៅក្នុងគម្រោងអប់រំបេតិកភណ្ឌក្នុងតំបន់អង្គរ និងបន្ទាយឆ្មារ ធ្វើការសិក្សា ស្វែងយល់ និងកំសាន្ត។ ចំណុចសំខាន់នៃរូបភាពទាំងនោះ នឹងបង្ហាញអំពីទ្រង់ទ្រាយរបស់រាជធានីអង្គរ ប្រព័ន្ធធារាសាស្ត្រ ព្រះបរមរាជវាំងខ្មែរ ផ្ទះសម្បែង និងរបៀបរស់នៅរបស់ខ្មែរនាសម័យអង្គរ ប្រភេទផ្ទះខ្មែរ តំបន់ការពារបេតិកភណ្ឌទី១ និងទី២ ទេសភាពវប្បធម៌ នៃរមណីយដ្ឋានអង្គរ ដែលជាបេតិកភណ្ឌពិភពលោក ព្រមទាំងមរតកបេតិកភណ្ឌវប្បធម៌អរូបីមួយចំនួនទៀត ដែលទើបបានចាត់ចូលជាបេតិកភណ្ឌអរូបីពិភពលោកកន្លងមកផងដែរ។
គួររំឭកឲ្យដឹងថា សៀវភៅផាត់ពណ៌បេតិកភណ្ឌទី១ បានផលិតក្នុងឆ្នាំ២០០៩ និងទី២ផលិតនៅឆ្នាំ២០១១។ សៀវភៅផាត់ពណ៌ទាំងពីរភាគ ដែលបានដាក់ឲ្យប្រើប្រាស់កន្លងមក ទទួលបានការវាយតម្លៃខ្ពស់ពីលោកស្រីនាយិកា លោកនាយក លោកគ្រូ អ្នកគ្រូ ព្រមទាំសិស្សានុសិស្ស យុវវ័យអំពីខ្លឹមសារ សារៈសំខាន់ អប់រំអំពីវប្បធម៌ ប្រពៃណីទូទៅ ព្រមទាំងរមណីយដ្ឋានបេតិកភណ្ឌពិភពលោកអង្គរ។
សូមជម្រាបដែរថា ការរៀបចំសៀវភៅទី៣នេះក៏ដូចគ្នានឹងភាគទី២ដែរ ពោលគឺតម្រូវឲ្យបង្កើតសៀវភៅសម្រាប់ជាជំនួយដល់លោកគ្រូ អ្នកគ្រូ ធ្វើការណែនាំសិស្សនៅក្នុងថ្នាក់រៀនជាមុនសិន។ នេះគឺក្នុងគោលបំណងឲ្យសិស្សបានដឹងអំពី រចនាសម្ព័ន្ធរបស់រាជធានីអង្គរ រូបរាងរបស់ព្រះបរមរាជវាំង ប្រព័ន្ធធារាសាស្ត្រ គំរូផ្ទះសម្បែងជាមុនសិន មុននឹង ទៅទស្សនាស្វែងយល់អំពីរមណីយដ្ឋានអង្គរ ព្រមទាំងបណ្តុះគំនិតការពារតំបន់បេតិកភណ្ឌ និងគំនិតអភិរក្ស ផ្ទះបុរាណខ្មែរផង។ តាមរយ: សៀវភៅផាត់ពណ៌ ៣ជំនាន់នេះដែរគឺជាសកម្មភាពមួយរបស់អាជ្ញាធរជាតិអប្សរា ក្នុងការចូលរួមបណ្តុះបណ្តាលធនធានមនុស្ស សម្រាប់ក្លាយជាអ្នកបន្តវេនការពារនិងអភិរក្សរមណីយដ្ឋានអង្គរ។ ហើយនេះក៏ជាផ្នែកមួយនៃកម្មវិធីអប់រំបេតិកភណ្ឌដល់សិស្សក្នុងតំបន់អង្គរនិងបន្ទាយឆ្មារ ដែលគម្រោងនេះទទួលបានការអបអរសាទរពីអង្គប្រជុំបច្ចេកទេសលើកទី៣២ នៃ ICC-Angkor កាលពីថ្ងៃទី១១ ខែមិថុនា ឆ្នាំ២០១៩កន្លងទៅនេះ។
អត្ថបទ និងរូបភាព: លោក អ៉ិន សីហរិទ្ធ
កែសម្រួលអត្ថបទ: លោក សេង ផល្លី
