ជនជាតិចិន០៧នាក់ ក្នុងចំណោមជនសង្ស័យ១៤នាក់ ត្រូវសមត្ថកិច្ចនៃស្នងការដ្ឋាននគរបាលខេត្តសៀមរាប កសាងសំណុំរឿងបញ្ជូនទៅកាន់តុលាការហើយ បន្ទាប់ពីស្រាវជ្រាវឃើញថាមានជាប់ពាក់ព័ន្ធនឹងករណី បើកទីតាំងភ្នាល់ល្បែងស៊ីសងខុសច្បាប់តាមប្រព័ន្ធអ៊ីនធើណេត ស្ថិតនៅក្នុងក្រុងសៀមរាប។
នេះបើតាមការឲ្យដឹងពី លោកវរៈសេនីយ៍ឯក តូច សុគន្ធ ប្រធានការិយាល័យអនុវត្តនីតិវិធី នៃស្នងការដ្ឋាននគរបាលខេត្តសៀមរាប នៅព្រឹកថ្ងៃទី១៧ ខែមិថុនា ឆ្នាំ២០១៩នេះ។
យោងតាមមន្ត្រីនគរបាលការិយាល័យអនុវត្តនីតិវិធី នៃស្នងការដ្ឋាននគរបាលខេត្តសៀមរាប បានឲ្យដឹងថា នៅថ្ងៃទី១៥ ខែមិថុនា ឆ្នាំ២០១៩ សមត្ថកិច្ច នៃស្នងការដ្ឋាននគរបាលខេត្តសៀមរាប បានធ្វើការចុះបង្ក្រាប ទីតាំងភ្នាល់ល្បែងស៊ីសងខុសច្បាប់ តាមប្រព័ន្ធអ៊ីនធើណេត ២កន្លែង ស្ថិតនៅក្នុងក្រុងសៀមរាប ទីតាំងទី១ នៅក្នុងសណ្ឋាគារ ដឹវ័ន ហ្គាដិន បូទិច ស្ថិតនៅក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប ក្នុងនោះឃាត់ខ្លួនបុរសជនជាតិចិនចំនួន៧នាក់ ដែលកំពុងប្រព្រឹត្តបទល្មើសជាក់ស្តែងរួមទាំងវត្ថុតាងមួយចំនួន រួមមាន៖ កំព្យូទ័រយួរដែចំនួន០៨គ្រឿង ទូរស័ព្ទដៃចំនួន១៥គ្រឿង និងសម្ភារៈមួយចំនួនទៀត។ បន្ទាប់ពីធ្វើការសាកសួរជនសង្ស័យទាំង០៧នាក់រួចហើយ នៅរសៀលថ្ងៃដដែលនោះ សមត្ថកិច្ចជំនាញបានបន្តនីតិវិធី ចុះទៅដល់ទីតាំងទី២ នៅចំណុចខុនដូមួយកន្លែនទៀត នៅក្នុងបុរីភើហ្វិកស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប ហើយបាននាំខ្លួនបុរសជនជាតិចិនចំនួន០៦នាក់ និងស្ត្រីខ្មែរម្នាក់បន្ថែមទៀត ។
លោកវរៈសេនីយ៍ឯក តូច សុគន្ធ បានបញ្ជាក់ថា ជនសង្ស័យជនជាតិចិនចំនួន០៧នាក់ ដែលសមត្ថកិច្ចចុះបង្ក្រាបនៅទីតាំងទី១ នៅក្នុងសណ្ឋាគារ ដឹវ័ន ហ្គាដិន បូទិច ត្រូវបានកសាងសំណុំរឿង នឹងបានបញ្ជូនទៅតុលាការ កាលពីរសៀលថ្ងៃទី១៦ ខែមិថុនា ឆ្នាំ២០១៩រួចរាល់ហើយ ដោយឡែក ជនសង្ស័យជនជាតិចិនចំនួន០៦នាក់ និងស្ត្រីខ្មែរម្នាក់ ដែលសមត្ថកិច្ចចុះបង្ក្រាបនៅទីតាំងទី២ នៅក្នុងបុរីភើហ្វិក ត្រូវបានដោះលែង ដោយសាររកមិនឃើញថាពួកគាត់ជាប់ពាក់ព័ន្ធនឹងករណីនេះ។
សូមជម្រាបថា ប្រតិបត្តិការចុះបង្ក្រាបទីតាំងភ្នាល់ល្បែងស៊ីសងខុសច្បាប់ តាមប្រព័ន្ធអ៊ីនធើណេត កាលពីថ្ងៃទី១៥ ខែមិថុនា ឆ្នាំ២០១៩ នេះ ដឹកនាំ និងសម្របសម្រួលនិតិវិធី ដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាប។
អត្ថបទ និង រូបថត៖ លោក ថាច់ ពិសុទ្ធ លោក ជា ស្រស់ និងលោក ខេង ឧត្តម
កែសម្រួលអត្ថបទ ៖ លោក សេង ផល្លី
