នារសៀលថ្ងៃទី១៤ ខែមិថុនា ឆ្នាំ២០១៩នេះ នៅសាលប្រជុំរដ្ឋបាលស្រុកពួក បានរៀបចំពិធីប្រកាសចូលកាន់តំណែងក្រុមប្រឹក្សាស្រុក អាណត្តិទី៣ ក្រោមអធិបតីភាពដ៏ខ្ពង់ខ្ពស់របស់ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាបដោយមានការអញ្ជើញចូលរួមពីសំណាក់ ឯកឧត្ដមសមាជិកក្រុមប្រឹក្សាខេត្ត លោក លោកស្រី ជាប្រធាននិងសមាជិកក្រុមប្រឹក្សាស្រុក , គណៈអភិបាលស្រុក មន្ត្រីអ្នកមុខអ្នកការក្នុងស្រុក និង មេឃុំក្នុងស្រុកពួក ។
តាមការអានអនុក្រឹត្យ ដោយលោក ស្មៀន ប៊ុនធឿន នាយករងរដ្ឋបាលខេត្ត ស្តីពីការទទួលស្គាល់ សមាជិកក្រុមប្រឹក្សាស្រុកពួក អាណត្តិទី៣ ដែលមាន២១អសនៈ មកពីគណបក្សប្រជាជនកម្ពុជា ទាំង២១អាសនៈ ក្នុងនោះលោក ម៉ៅ វិសុទ្ធ ត្រូវបានប្រកាសជាប្រធានក្រុមប្រឹក្សាស្រុកពួក អាណត្តិទី៣ រួមនឹងលោក លោកស្រី ចំនួន ២១រូបទៀត ជាសមាជិកក្រុមប្រឹក្សាស្រុក។
បន្ទាប់ពីគណៈអធិបតីធ្វើការប្រគល់នូវអនុក្រឹត្យ ទទួលស្គាល់សមាជិកក្រុមប្រឹក្សាស្រុក អាណត្តិទី៣ រួចមក ឯកឧត្តម អ៊ឹង ហឿន ប្រធានក្រុមប្រឹក្សាខេត្ត បានសម្ដែងនូវកោតសរសើរ និង វាយតម្លៃខ្ពស់ ចំពោះថ្នាក់ដឹកនាំស្រុកដែលត្រូវបានតំណាងប្រជាពលរដ្ឋ ជាសមាជិកក្រុមប្រឹក្សាឃុំ សង្កាត់ បានផ្តល់នូវសេចក្តីទុកចិត្ត បោះ ឆ្នោតជ្រើសរើស ជាក្រុមប្រឹក្សាស្រុក អាណត្តិទី៣ ដើម្បីបន្តដឹកនាំស្រុក និង បន្តអភិវឌ្ឍន៍ឲ្យមានការីកចម្រើនលើគ្រប់វិស័យបន្ថែមទៀត ។
ឯកឧត្តមប្រធានក្រុមប្រឹក្សាខេត្ត បានផ្តាំផ្ញើដល់ក្រុមប្រឹក្សាស្រុក ត្រូវបន្តអនុវត្តលើការងារដែលនៅសេសសល់ពីអាណត្តិទី២ និងអនុវត្តការងារបន្ថែមក្នុងអាណត្តទី៣នេះជាបន្តទៀត ដើម្បីឲ្យស្រុកមានការអភិវឌ្ឍបន្ថែមទៀត ពិសេសត្រូវសាមគ្គី និងសហការគ្នាឲ្យស្អិតរមួត ដើម្បីឲ្យក្លាយជាធ្លុងមួយរវាងក្រុមប្រឹក្សាស្រុកនិងគណៈអភិបាលស្រុក ក្នុងការបន្តអភិវឌ្ឍស្រុក និង ត្រូវខិតខំដោះស្រាយ សម្របសម្រួលរាល់បញ្ហាប្រឈមរបស់បងប្អូនប្រជាពលរដ្ឋឲ្យអស់លទ្ធភាព និង បញ្ជៀសការប្រើប្រាស់អំពើហិង្សា ជាពិសេសក្រុមប្រឹក្សាស្រុកទាំងអស់ត្រូវអនុវត្តឲ្យបានខ្ជាប់ខ្ជួននូវរដ្ឋធម្មនុញ្ញ ច្បាប់ លិខិតបទដ្ឋានគតិយុត្តនានា ពិសេសបទបញ្ជាផ្ទៃក្នុងដែលខ្លួនបានអនុម័ត ព្រមទាំងរៀបចំកិច្ចប្រជុំសាមញ្ញឲ្យត្រូវទៅតាមច្បាប់កំណត់ និងតាមប្រតិទិនផងដែរ៕
អត្ថបទ និង រូបថត ៖ Facebook រដ្ឋបាលខេត្តសៀមរាប
កែសម្រួលអត្ថបទ ៖ លោក លីវ សាន្ត
