នៅព្រឹកថ្ងៃទី១៥ ខែមិថុនា ឆ្នាំ២០១៩នេះ នៅសាលាខេត្តសៀមរាប បានរៀបចំពិធីបើកសិក្ខាសាលា ស្តីពី «មូលដ្ឋានគ្រឹះនៃមនុស្សល្អ» ក្រោមអធិបតីភាពឯកឧត្តម ទៀ សីហា អភិបាលនៃគណៈអភិបាលខេត្ត លោកជំទាវ យឹម ចំរើន រដ្ឋមលេខាធិការក្រសួងកិច្ចការនារី និងឯកឧត្តម វី សំណាង អភិបាលនៃគណៈអភិបាលខេត្តកំពង់ស្ពឺ និងអ្នកពាក់ព័ន្ធ ហើយអង្គសិក្ខាសាលានេះមានរយៈពេល២ថ្ងៃ ដោយចាប់ផ្តើមពីថ្ងៃទី ១៥-១៦ ខែមិថុនា ឆ្នាំ២០១៩ ។
មានប្រសាសន៏ឪកាសនោះ ឯកឧត្តម ទៀ សីហា អភិបាលខេត្តសៀមរាប បានលើកឡើងថា អង្គសិក្ខាសាលាស្តីអំពី «មូលដ្ឋានគ្រិះនៃមនុស្សល្អ» នាពេលនេះ គឺជាទិវាជួបជុំមូលធនធានមនុស្សខ្មែរ ដែលបង្កើតឡើងដោយខ្មែរ និងដើម្បីខ្មែរ ដែលជាជំហានប្រវត្តិសាស្ត្រថ្មីមួយបង្ហាញ ពីភាពរឹងមាំ និងភាពជាម្ចាស់ ការ របស់ខ្មែរយើង ក្នុងការរួមគ្នាកសាងធនធានមនុស្សល្អនៅកម្ពុជាយើងឱ្យកាន់តែល្អប្រសើរ និងមានគុណធម៌ ខ្ពស់ ហើយនឹងរួមគ្នាដឹកនាំកម្ពុជាឆ្ពោះទៅរកអារិយប្រទេសសារជាថ្មី។ ហើយសិក្ខាសាលានេះ គឺពិតជាបានចូលរួមថែរក្សាសមិទ្ធផលនានារបស់រាជរដ្ឋាភិបាល ឱ្យកាន់តែរឹងមាំ គង់វង្ស និងសុខដុមរមនានៅកម្ពុជា។
ឯកឧត្តម ក៏បានបន្តថា ស្ថិតក្នុងបរិបទសកលភាវូនីយកម្ម នៃការរីកចម្រើនវិទ្យាសាស្ត្រ បចេ្ចកវិទ្យា និងការប្រកួតប្រជែងសេដ្ឋកិច្ចចំណេះដឹង សេដ្ឋកិច្ចទិន្នន័យ ហើយនឹងសេដ្ឋកិច្ចមូលធនមនុស្ស កម្ពុជាយើង គឺពិតជាមានភាពចាំបាច់ណាស់ក្នុងការអភិវឌ្ឍធនពលរដ្ឋម្នាក់ៗ ឱ្យក្លាយជាពលរដ្ឋល្អពិតប្រាកដ មានមូលដ្ឋានគ្រិះរឹងមាំ ដើម្បីរួមគ្នាកសាងមូលដ្ឋានគ្រឹះប្រទេសជាតិយើងឱ្យកាន់តែមានភាពរឹងមាំ រីកចម្រើនរុង រឿងនាពេលអនាគត៕
អត្ថបទ និងរូបភាព ៖ អ៊ិន សីហរិទ្ធ , ស៊ាន សុផាត
កែសម្រួល ៖ អ៊ុន ណារាជ្យ