ថ្លែងក្នុងឱកាសយុទ្ធនាការលើកទី៣ នៃការបរិច្ចាគឈាមដើម្បីជួយសង្គ្រោះជីវិត ដែលរៀបចំធ្វើឡើងនៅមជ្ឈមណ្ឌលផ្តល់ឈាមនៃមន្ទីរពេទ្យបង្អែកខេត្តសៀមរាប នាថ្ងៃទី១៥ ខែ មិថុនា ឆ្នាំ ២០១៩នេះ លោក ឡាយ គឹមសួគ៌ ប្រធានសមាគមសហគ្រិនវ័យក្មេងកម្ពុជា បានឲ្យដឹង នេះជាឆ្នាំទី៣ ហើយ ដែលសមាគមសហគ្រិនវ័យក្មេងកម្ពុជា បើកយុទ្ឋនាការទ្រង់ទ្រាយធំក្នុងការបរិច្ចាកឈាមដើម្បីជួយសង្គ្រោះជីវិតអ្នកជំងឺដែលត្រូវការឈាម ក្រោមប្រធានបទ៖ ផ្តល់ឈាមដើម្បីជីវិតគ្រួសារយើងនិងមនុស្សគ្រប់គ្នា ដែលជាការស្ម័គ្រ ចិត្តចូលរួម ហើយនេះជាសកម្មភាពមួយ ដែលបង្ហាញពីការចេះជួយគ្នាទៅវិញទៅមក ដោយស្ម័គ្រចិត្តរបស់សមាគម ខណៈឆ្នាំទី១ យើងមានអ្នកបរិច្ចាកឈាមមានចំនួនតិច , ឆ្នាំទី២ ទទួលបានឈាមពីអ្នកស្ម័គ្រចិត្ត ៣៦៤ប្លោក និង ឆ្នាំនេះ ចំនួនអ្នកស្ម័គ្រចិត្តបរិច្ចាកឈាម ដែលមានចំនួនរហូតដល់ប្រមាណ១.៥០០នាក់។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត បានលើកឡើងថា ពីមួយឆ្នាំទៅមួយឆ្នាំ អត្រាអ្នកជំងឺដែលបានមកសម្រាកព្យាបាលក្នុងមន្ទីរពេទ្យ មួយចំនួនត្រូវការឈាមសង្គ្រោះបន្ទាន់ ដូចជាគ្រោះថ្នាក់ចរាចរណ៍ , ស្ត្រីឆ្លង ទន្លេ , ហូរឈាមដោយសារធ្លាយក្រពះ , ក្រិនថ្លើម , ជំងឺមហា រីកគ្រាប់ឈាម , ជំងឺតម្រងនោម , ជំងឺវះកាត់សរីរាង្គផ្សេងៗនិងជំងឺជាច្រើនទៀត ដែលធ្វើឱ្យមន្ទីរពេទ្យជួបបញ្ហាប្រឈមចំពោះកង្វះខាតឈាមសម្រាប់ជួយសង្គ្រោះអ្នកជំងឺទាំងនោះ ។
ព័ត៌មានជាតិ ថ្មីៗ
លោកវេជ្ជបណ្ឌិត ក្រុស សារ៉ាត់ មានប្រសាសន៍ទៀតថា ជាក់ស្តែងតម្រូវការឈាមប្រើប្រាស់ជាមធ្យមពី៤៥០ ទៅ ៥០០ប្លោកក្នុងមួយខែ ក្នុងនោះឈាមចំនួន៤៥ភាគរយ ត្រូវបានផ្តល់ដោយក្រុមគ្រួសារអ្នកជំងឺ ដូច្នេះនៅខ្វះពី៥០ទៅ៥៥ ភាគរយទៀត ត្រូវការជំនួយពីអ្នកស្ម័គ្រចិត្តបរិច្ចាកឈាម ដូច្នេះ តាមរយៈនេះ សូមអំពាវនាវដល់សាធារណៈជន និងសប្បុរសជនទាំងអស់ មេត្តាផ្តល់នូវកិច្ចសហការគាំទ្រដល់មន្ទីរពេទ្យបង្អែកខេត្តទាំងផ្នែកសម្ភារៈបរិក្ខាផ្សេងៗ ពិសេសផ្តល់ការគៀងគររកអ្នកស្ម័គ្រចិត្តបរិច្ចាកឈាម បន្តជានិរន្តរ៍ដើម្បីឱ្យមន្ទីរពេទ្យនេះក្លាយជាមន្ទីរពេទ្យមួយជួយសង្គ្រោះជីវិតមនុស្សគ្រប់ជ្រុងជ្រោយ។
មានប្រសាសន៍ក្នុងឱកាសនោះដែរ លោក ពិន ប្រាកដ អភិបាលរងខេត្តសៀមរាប បានចាត់ទុកសកម្មភាពនៃការបរិច្ចាគឈាមនេះ ពិតជាមានអត្ថប្រយោជន៍ខ្លាំងណាស់ គឺជួយដល់សង្គម ជួយអ្នកជំងឺដែលខ្វះឈាម បង្ហាញពីសាមគ្គីភាព និងចូលរួមការងារសង្គមដើម្បីប្រទេសជាតិ ម្យ៉ាងវិញទៀតក៏ជាការរួមចំណែកយ៉ាងសំខាន់ ក្នុងការជួយសង្គ្រោះជីវិតជនរងគ្រោះ ដែលកំពុងសម្រាកព្យាបាលនៅក្នុងមន្ទីរពេទ្យ ជាអំពើមនុស្សធម៌ ក្នុងនាមជាពលរដ្ឋម្នាក់ដែលឆ្លើយតបទៅនឹងតម្រូវការក្នុងសង្គមយ៉ាងពិតប្រាកដ។
លោក អភិបាលរងខេត្ត មានប្រសាសន៍ទៀតថា សកម្មភាពនេះគឺពិតជាបានរួមចំណែកយ៉ាងច្រើនដល់សេដ្ឋកិច្ចគ្រួសារ របស់ប្រជាពលរដ្ឋយើង ដើម្បីចូលរួមកាត់បន្ថយភាពក្រីក្រ ស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា និងជាកាយវិការប្រកបដោយមនុស្សធម៌ដ៍មានតម្លៃបំផុត ដែលប្រជាពលរដ្ឋគ្រប់រូបគួរចូលរួមទាំងអស់គ្នា និង ជាការរួមចំណែកយ៉ាងធំធេងដល់ការងារមនុស្សធម៌ ការជួយសង្គ្រោះមនុស្សដែលនៅវ័យកុមារ ដែលជាទំពាំងស្នងឫស្សីឱ្យមានសុខភាពល្អ មានបញ្ញាញាណ និងសតិរឹងមាំសម្រាប់សង្គមជាតិនាពេលអនាគត ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
