កាលពីព្រឹកថ្ងៃទី១៣ ខែមិថុនា ឆ្នាំ២០១៩ម្សិលមិញនេះ នៅសាលប្រជុំធំសាលាខេត្តសៀមរាប បានរៀបចំពិធីប្រកាសចូលកាន់តំណែងក្រុមប្រឹក្សាខេត្តសៀមរាប អាណត្តិទី៣ ក្រោមអធិបតីភាពដ៏ខ្ពង់ខ្ពស់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងារថ្នាក់ជាតិ ចុះជួយមូលដ្ឋានខេត្តសៀមរាប ដោយមានការអញ្ជើញចូលរួមពីសំណាក់ឯកឧត្ដម លោកជំទាវ លោក លោកស្រី ជាមន្ត្រីជាន់ខ្ពស់ក្រសួងការពារជាតិ ក្រសួងមហាផ្ទៃ ប្រធានក្រុមការងារថ្នាក់ជាតិចុះមូលដ្ឋានស្រុកក្រុង ប្រធាននិងសមា ជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ អង្គភាព ស្ថាប័នរដ្ឋក្នុងខេត្ត ប្រធានក្រុមប្រឹក្សានិងគណៈអភិបាលក្រុងស្រុក និង មន្ត្រីអ្នកមុខអ្នកការក្នុងខេត្តជាច្រើនរូប ។
មានប្រសាសន៍ក្នុងឱកាសនោះ សម្តេចពិជ័យសេនា ទៀ បាញ់ បានបញ្ជាក់ថា ព្រឹត្តិការណ៍បោះឆ្នោតជ្រើសរើសក្រុមប្រឹក្សារាជធានី-ខេត្ត-ក្រុង-ស្រុក-ខណ្ឌ កាលពីថ្ងៃទី២៦ ខែឧសភា ឆ្នាំ២០១៩កន្លងទៅនេះ បានឆ្លុះបង្ហាញឲ្យឃើញអំពីដំណើរវិវត្តន៍រីកចម្រើន នៃកំណែទម្រង់រដ្ឋបាលសាធារណៈ និង កម្មវិធីនយោបាយសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ក្នុងការអនុវត្តយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលជាពិសេសនោះគឺកំណែទម្រង់រដ្ឋបាល សាធារណៈ កម្មវិធីនយោបាយសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ រួមបញ្ចូលទាំងគោលនយោ បាយវិមជ្ឈការនិងវិសហមជ្ឈការ ដែលនាំឲ្យមានការធានាបាន នូវការគ្រប់គ្រងមួយប្រកបដោយអភិបាលកិច្ចល្អ ប្រជាធិប តេយ្យ ធានាបានការចូលរួមរបស់ប្រជាជន និងបង្កើនបាននូវការទទួលខុសត្រូវរបស់រដ្ឋបាលថ្នាក់ក្រោមជាតិ ចំពោះប្រជាពលរដ្ឋមូលដ្ឋាន ។
សម្តេចពិជ័យសេនា ទៀ បាញ់ មានប្រសាសន៍ទៀតថា ឆ្នាំ ២០១៩ – ២០២០នេះ រាជរដ្ឋាភិបាលកម្ពុជា ខិតខំជំរុញកំណែទម្រង់វិមជ្ឈការ និង វិសហមជ្ឈការ ឲ្យឈានចូលតំណាក់កាលកាន់តែស៊ីជម្រៅថែមទៀត ដែលក្នុងនោះមានកិច្ចការសំខាន់ៗជាអាទិ ភាពចំនួន៤ គឺ ទី១- ការបង្កើនផ្ទេរមុខងារនិងធនធានឲ្យទៅរដ្ឋបាលថ្នាក់ក្រោមជាតិ , ទី២- ការផ្ទេរមន្ត្រីបុគ្គលិករបស់ក្រសួងមហាផ្ទៃប្រមាណជា៦.០០០នាក់ មកជាមន្ត្រីបុគ្គលិករបស់រដ្ឋបាល ថ្នាក់ក្រោមជាតិ , ទី៣- ការកែសម្រួលរចនាសម្ព័ន្ធនិងប្រព័ន្ធគ្រប់គ្រងរដ្ឋបាលថ្នាក់ក្រុង-ស្រុក និងទី៤- បង្កើនការផ្ទេរធនធានហិរញ្ញវត្ថុសម្រាប់អភិវឌ្ឍមូលដ្ឋានឲ្យបានដល់រដ្ឋបាលឃុំសង្កាត់ ។
សម្តេចពិជ័យសេនា ទៀ បាញ់ មានប្រសាសន៍បន្ថែមទៀតថា ទោះបីឯកឧត្តម លោកជំទាវ ដែលមានសមាសភាពមកពីគណបក្សនយោបាយផ្សេងគ្នាក៏ពិតមែន តែគោលការណ៍ច្បាប់ក្រុមប្រឹក្សា គឺជាតំណាងឲ្យប្រជាពលរដ្ឋ ក្នុងការបម្រើនូវផលប្រយោជន៍ និង សេចក្តីតម្រូវការរបស់ប្រជាពលរដ្ឋ មិនប្រកាន់និន្នាការ គណបក្សនយោបាយឡើយ ដូច្នេះដើម្បីសម្រេចបានភារកិច្ចទាំងនេះ ត្រូវខិតខំពង្រឹងស្មារតី សាមគ្គីឯកភាពផ្ទៃក្នុង ឲ្យបានល្អក្នុងក្រុមប្រឹក្សា គណៈអភិបាល មន្ត្រីរាជការ និង កងកម្លាំងសមត្ថកិច្ច លើកកម្ពស់ការទទួលខុសត្រូវ ភាពម្ចាស់ការ ក្នុងការបំពេញតួនាទីភារកិច្ច សំដៅអភិវឌ្ឍន៍មូលដ្ឋាន ក្នុងការឆ្លើយតបតម្រូវការរបស់ប្រជាពលរដ្ឋ ក្នុងដែនសមត្ថកិច្ច របស់ខ្លួន ព្រមទាំងត្រូវយកចិត្ដទុកដាក់បំពេញភារកិច្ច ដើម្បីការពារ ផលប្រយោជន៍បងប្អូនប្រជាពលរដ្ឋ និង សម្រេចបាននូវសមិទ្ធផលថ្មីៗ ក្នុងរយៈពេល៥ឆ្នាំខាងមុខនេះ ។
សូមបញ្ជាក់ដែរថា សមាជិកក្រុមប្រឹក្សាខេត្តសៀមរាបសម្រាប់ អណត្តិទី៣នេះ មានសមាសភាពចំនួន២៧រូប ដែលមកពីគណបក្សប្រជាជនកម្ពុជាចំនួន២៦រូប និង មកពីគណបក្សរួបរួមជាតិចំនួន១រូប ក្នុងនោះមានស្ត្រីចំនួន០៣រូប និង មាន ជនជាតិខ្មែរឥស្លាមចំនួន០១រូប ដែលមានឯកឧត្តម អ៊ឹង ហឿន ជាប្រធានក្រុមប្រឹក្សាខេត្តសៀមរាប អាណត្តិទី៣ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
