នាព្រឹកថ្ងៃទី១៤ ខែមិថុនា ឆ្នាំ២០១៩នេះ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និង ជាតំណាងឯកឧត្តម ទៀ សីហា ប្រធានគណៈកម្មាធិការសាខា និងសហការី បាននាំយកអំណោយសង្គ្រោះបន្ទាន់ ទៅចែកជូនដល់គ្រួសាររងគ្រោះដោយខ្យល់កន្ត្រាក់ចំនួន ១៤គ្រួសារ មកពីឃុំចំនួនពីរ ក្នុងស្រុកវ៉ារិន ក្នុងនោះនៅឃុំវ៉ារិន ចំនួន១គ្រួសារ និង នៅឃុំស្រែណូយ ចំនួន១៣គ្រួសារ ។
អំណោយមនុស្សធម៌ដែលបានផ្ដល់ជូននាឱកាសនោះ ចំពោះគ្រួសាររលំផ្ទះ ក្នុងមួយគ្រួសារ ទទួលបានមុង១ , ភួយ១ , សារុង១ , ក្រមា១ , ស័ង្កសី ១៦សន្លឹក , មី១កេស , ត្រីខ១យួរ , អង្ករ២៥ គីឡូ ក្រាម និងថវិកា១សែន៥ម៉ឺនរៀល ហើយចំពោះគ្រួសារប៉ះពាល់ធ្ងន់ ក្នុងមួយគ្រួសារទទួលបានមុង១ , ភួយ១ , សារុង១ , ក្រមា១, ស័ង្កសី ១០សន្លឹក , មី១កេស , ត្រីខ១យួរ , អង្ករ២៥គីឡូក្រាម និងថវិកា១០ ម៉ឺនរៀល ហើយក្នុងឱកាសនោះដែរ ក្រុមប្រតិភូ បានបន្ថែមនូវថវិកា មួយចំនួន ដល់គ្រួសាររលំផ្ទះ និង ចាស់ជរាផងដែរ ។
មានប្រសាសន៍សំណេះសំណាលក្នុងឱកាសនេះ លោកជំទាវ ទាង អេង ទៀសីហា សម្ដែងនូវការសោកស្តាយជាពន់ពេក ចំពោះបងប្អូនដែលបានរងគ្រោះនូវឧបទ្ទេវហេតុ ដោយខ្យល់កន្ត្រាក់ ដែលបណ្ដាលឲ្យរលំផ្ទះ និង របើកដំបូលធ្ងន់ធ្ងរ ក្នុងនាមកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និង ក្នុងនាមឯកឧត្តម ទៀ សីហា ប្រធានគណៈ កម្មាធិការសាខាកាកបាទក្រហមកម្ពុជាខេត្ត ក៏មិនបានទុកឲ្យបងប្អូនប្រជាពលរដ្ឋរងការលំបាកក្នុងគ្រោះមហន្តរាយណាមួយដែលបានកើតឡើង ក្នុងមូលដ្ឋានរបស់ប្រជាពលរដ្ឋឡើយ ដូចពាក្យស្លោកលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល ហើយសម្ដេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ព្រមទាំងថ្នាក់ដឹកនាំគ្រប់លំដាប់ថ្នាក់ មិនទុកឲ្យបងប្អូនប្រជាពលរដ្ឋដែលរងគ្រោះនៅកណ្ដោចកណ្ដែង និងស្លាប់ដោយអត់អាហារឡើយ។
លោកជំទាវ ទាង អេង ទៀសីហា មានប្រសាសន៍ទៀតថា ជាសក្ខីភាពនៅថ្ងៃនេះ ដោយទទួលបានព័ត៌មានថា មានប្រជាជនរងគ្រោះធម្មជាតិនៅស្រុកវ៉ារិន ដែលប៉ះពាល់ពីរឃុំ យើងបានបញ្ចុះក្រុមអ្នកស្ម័ត្រចិត្តកាកបាទក្រហមប្រចាំស្រុក ចុះស្រង់នូវផលប៉ះពាល់ភ្លាមៗ ហើយនៅថ្ងៃនេះគណៈកម្មាធិការសាខាកាកបាទក្រហមកម្ពុជាខេត្តសៀមរាប បានរៀបចំនូវអំណោយសង្គ្រោះបន្ទាន់ ដើម្បី យក មក ចែក ជូនបងប្អូនផងដែរ ហើយទោះបីជាអំណោយទាំងនេះ វាមានលក្ខណៈតិចតួចក្ដី វាមិនស្មើទៅនឹងការខូចខាត ការខ្វះខាត របស់បងប្អូនដែលរងគ្រោះក៏ពិតមែន តែជាស្មារតីយកចិត្តទុកដាក់របស់ថ្នាក់ដឹកនាំខេត្ត ក៏ដូចជាថ្នាក់ដឹកនាំគ្រប់លំដាប់ថ្នាក់ ដើម្បីជួយសម្រួល និង សម្រាលដល់ការលំបាករបស់បងប្អូនបានមួយរយៈផងដែរ ដូច្នេះតាមរយៈនេះ សូមអំពាវនាវដល់បងប្អូនទាំងអស់ ធ្វើយ៉ាងណាត្រូវប្រុងប្រយ័ត្ន នៅពេលដែលមានប្រធានស័ក្តណាកើតឡើង សូមឲ្យបងប្អូនរត់រកទីកន្លែងមានសុវត្ថិភាព និង មានភ្លៀង ផ្គររន្ទះ សូមកុំប្រើប្រាស់គ្រឿងអេឡិចត្រូនិចដែលងាយបង្កភាពគ្រោះថ្នាក់ដល់ខ្លួន ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
