មន្ត្រីអ្នកជំនាញការនៃគណៈកម្មាធិការអាយស៊ីស៊ី-អង្គរ បានថ្លែងនូវការកោតសរសើរចំពោះអ្នកជំនាញ ដែលកំពុងអនុវត្តគម្រោងជួសជុលប្រាសាទបុរាណខ្មែរនានា នៅក្នុងតំបន់ឧទ្យានអង្គរ។
មានប្រសាសន៍ប្រាប់អ្នកសារព័ត៌មាន នៅក្រោយពេលបញ្ចប់កិច្ចប្រជុំបច្ចេកទេសលើកទី៣២ របស់គណៈកម្មាធិការអន្ដរជាតិសម្របសម្រួល កិច្ចគាំពារ និង អភិវឌ្ឍន៍តំបន់ប្រវត្តិសាស្ត្រអង្គរ ហៅកាត់ថា អាយស៊ីស៊ី-អង្គរ កាលពីរសៀលថ្ងៃទី១២ ខែមិថុនា ឆ្នាំ២០១៩ នៅខេត្តសៀមរាប លោកជំទាវភឿង សកុណា បានលើកឡើងថា បន្ទាប់ពីបានបញ្ចប់ការចុះពិនិត្យនៅតាមបណ្តាការដ្ឋានចំនួន២០ នៅក្នុងតំបន់រមណីយដ្ឋានអង្គរ អ្នកជំនាញរបស់អាយស៊ីស៊ី អង្គរ បានសម្តែងនូវការកោតសរសើរ និងវាយតម្លៃខ្ពស់ចំពោះ អ្នកជំនាញដែលកំពុងអនុវត្តកិច្ចការជួសជុលប្រាសាទបុរាណខ្មែរ។
រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា លោកជំទាវភឿង សកុណា ក៏បានបន្តឲ្យដឹងថា ក្រៅពីការកោតសរសើរ ក្រុមអ្នកជំនាញការរបស់អាយស៊ីស៊ី អង្គរ ក៏បានផ្តល់នូវអនុសាសន៍ថ្មីៗបន្ថែមទៀតសម្រាប់ការអនុវត្តគម្រោងទាំង២០នេះ ដែលមានជាអាទិ៍ដូចជា ប្រាសាទតានៃ ប្រាសាទតាព្រហ្ម ផ្លូវចូលតាមច្រកដៃឆ្នាំង ជាដើម៕
ប៉ុន្តែ ក្នុងនោះអ្នកជំនាញ ICC Angkor ក៏ព្រួយបារម្ភពីផលប៉ះពាល់ប្រាសាទបុរាណរបស់ខ្មែរ ដែលកំណើនភ្ញៀវទេសចរណ៍មានការកើនឡើងជារាងរាល់ឆ្នាំនៅតាមតំបន់ប្រាសាទបុរាណខ្មែរនានា ក្រុមអ្នកជំនាញការអាដហុក(Adhoc) នៃអាយស៊ីស៊ីអង្គរ (ICC-Angkor) បានព្រមានថា វាអាចមានផលមិនល្អប៉ះពាល់ប្រាសាទបុរាណខ្មែរ។ ជាមួយនឹងការព្រមាននេះ ក្រុមអ្នកជំនាញ បានណែនាំឲ្យស្ថាប័នពាក់ព័ន្ធ រៀបចំផែនការលំហូរភ្ញៀវឲ្យបានឆាប់រហ័ស ដើម្បីដោះស្រាយបញ្ហា។
លោកជំទាវ ភឿង សកុណា រដ្ឋមន្ដ្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា បានមានប្រសាសន៍ឲ្យដឹង នៅក្រោយការបញ្ចប់កិច្ចប្រជុំបច្ចេកទេសលើកទី៣២ របស់អាយស៊ីស៊ីអង្គរ ដែលធ្វើឡើងនៅខេត្ដសៀមរាប កាលពីថ្ងៃទី១២ខែមិថុនាឆ្នាំ២០១៩នេះថា ក្រុមអ្នកជំនាញរបស់អាយស៊ីស៊ីអង្គរ មានក្ដីកង្វល់ពីផលប៉ះពាល់នៃប្រាសាទបុរាណ ដោយសារការកើនឡើងនៃភ្ញៀវទេសចរទៅទស្សនារមណីយដ្ឋានអង្គរច្រើន ។ លោកជំទាវបានបន្ដថា ក្តីកង្វល់នេះ ត្រូវបានគណៈកម្មាធិការអាយស៊ីស៊ីអង្គរ បានផ្ដល់អនុសាសន៍ ដល់ក្រសួងវប្បធម៌ និងវិចិត្រសិល្បៈ និងអាជ្ញាធរជាតិអប្សរា ឲ្យធ្វើការជាមួយក្រសួងទេសចរណ៍រៀបចំនូវផែនការមេ ដែលក្រសួងទេសចរណ៍កំពុងធ្វើការរាល់ថ្ងៃ ដោយធ្វើយ៉ាងណា ផ្លាស់ប្ដូរទិន្ន័យ បញ្ហាយុទ្ធសាស្ដ្រ រួមទាំងផែនការទៅថ្ងៃមុខជាដើម។ ស្ថាប័នទាំងពីរនេះ ត្រូវប្រមូលទិន្ន័យទាំងអ្នកទេសចរជាតិ ទាំងអន្ដរជាតិ ទាំងប្រភេទទេសចរជាក្រុម អ្នកទេសចរជាគ្រួសារ អ្នកទេសចរផ្ទាល់ រួចហើយសិក្សាពីសកម្មភាព ពីការទស្សនារបស់ពួកគាត់នៅតាមប្រាសាទនិមួយៗ ដើម្បីងាយស្រួលបែងចែកផ្លូវទស្សនា ។
លោកជំទាវ ភឿង សកុណា ក៏បានលើកឡើងផងដែរ គណៈកម្មាធិការអាយស៊ីស៊ីអង្គរ ក៏បានផ្ដល់អនុសាសន៍ស្ថាប័នជាតិទាំងនេះពីផ្លាស់ប្ដូរតូបលក់ដូរអាជីវករនៅប្រាសាទព្រះភិធូរ ដោយសារនៅតំបន់នោះមានគម្រោងធ្វើផ្លូវថ្មី៕
អត្ថបទ និងរូបភាព៖ លោក ជា ស្រស់
