នៅព្រឹកថ្ងៃទី១២ ខែមិថុនា ឆ្នាំ២០១៩នេះ សន្និសីទកំពូលសារព័ត៌មានអាស៊ីលើកទី១៦ ឆ្នាំ២០១៩ ដែលបានប្រារព្ធធ្វើឡើងនៅខេត្តសៀមរាប បានប្រកាសបើកជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានការចូលរួមពីសំណាក់ ឯកឧត្ដម លោកជំទាវ លោក លោកស្រី ជាសមាជិកព្រឹទ្ធសភា រដ្ឋសភា ឥស្សរជនជាន់ខ្ពស់រាជរដ្ឋាភិបាល សមាជិករាជរដ្ឋាភិបាល ថ្នាក់ដឹកនាំនិងតំណាងក្រសួងស្ថាប័នរដ្ឋ ឯកអគ្គរដ្ឋទូត អគ្គរាជទូតបរទេសចំនួន១១ប្រចាំនៅកម្ពុជា រដ្ឋមន្ត្រី អនុរដ្ឋមន្ត្រីក្រសួងព័ត៌មាននៃប្រទេសក្នុងតំបន់ចំនួន៦ ប្រធាននិងសមាជិកក្រុមប្រឹក្សាខេត្តសៀមរាប អភិបាលនិងអភិបាលរងខេត្តសៀមរាប មេបញ្ជាការ មេបញ្ជាការរង ស្នងការ ស្នងការរង និងថ្នាក់ដឹកនាំមន្ទីរ អង្គភាពនានាក្នុងខេត្តសៀមរាប ថ្នាក់ដឹកនាំមន្ទីរព័ត៌មានរាជធានី ខេត្តទាំង២៥ គណៈប្រតិភូជាអន្តរជាតិ អ្នកសារព័ត៌មានជាតិ និងអន្តរជាតិ ចូលរួមប្រមាណ៥០០នាក់ មកពីបណ្ដាប្រទេសចំនួន៤២ នៅក្នុងតំបន់អាស៊ី-ប៉ាស៊ីហ្វិក ។
ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា សន្និសីទកំពូលសារព័ត៌មានអាស៊ី ជាព្រឹត្តិការណ៍អន្តរជាតិនាំមុខគេមួយក្នុងវិស័យសោតទស្សន៍ ដែលផ្ដល់កាលានុវត្តភាពដល់រដ្ឋមន្ត្រីទទួលបន្ទុកព័ត៌មាន ប្រតិបត្តិករសោតទស្សន៍ និង បុគ្គលិកបម្រើការងារឲ្យប្រព័ន្ធផ្សព្វផ្សាយ ថ្នាក់ដឹកនាំសកលវិទ្យាល័យ អ្នកសារព័ត៌មាន អ្នកជំនាញ និង អ្នកតាក់តែងគោលនយោបាយនៅជុំវិញពិភពលោក ដើម្បីជួបជុំ និង ពិភាក្សាអំពីការអភិវឌ្ឍគុណភាពនៃប្រព័ន្ធផ្សព្វផ្សាយ និង ដើម្បីដោះស្រាយបញ្ហាប្រឈម ក្នុងអំឡុងពេលនៃបដិវត្តបច្ចេកវិទ្យាទំនើប ។
លោក Fayyaz Sheheryay ប្រធានវិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ីប៉ាស៊ីហ្វិក មានប្រសាសន៍ថា បច្ចេកវិទ្យាឌីជីថល និងទិន្នន័យធំៗតាមប្រទេសនិមួយៗ ទីផ្សារនិមួយៗ និងសង្គមនិមួយៗ កំពុងជួយសម្រួលដល់ការអភិវឌ្ឍសេដ្ឋកិច្ច និងសង្គម បង្កើនគុណភាពនៃអភិបាលកិច្ច និងបង្កើនកម្រិតនៃសេវាសាធារណៈ និងតម្លាភាពហើយតាមការពិសោធន៍ និងភស្តុតាងជាច្រើនបានបញ្ជាក់ថា ឌីជីថលភាវូបនិយកម្ម បានចូលរួមក្នុងការកាត់បន្ថយភាពអត់ការងារធ្វើ ការកែលម្អគុណភាពនៃជីវិត និងការបង្កើនលទ្ធភាពរបស់ប្រជាពលរដ្ឋ ក្នុងការទទួលយកសេវាកម្មសាធារណៈ តែវាអាស្រ័យលើវិសាលភាព នៃការទទួលយក និងការអនុវត្តជាក់ស្ដែង ។
មានប្រសាសន៍បើកសន្និសីទកំពូលសារព័ត៌មានអាស៊ីនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្ដែងនូវការកោតសរសើរចំពោះវិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ីប៉ាស៊ីហ្វិក ដែលបានខិតខំជំរុញការអភិវឌ្ឍប្រព័ន្ធផ្សព្វផ្សាយព័ត៌មានអាស៊ី ឲ្យដើរទាន់ការរីកចម្រើននៃបច្ចេកវិទ្យាទំនើបនាបច្ចុប្បន្ន និង បានលើកកម្ពស់ប្រព័ន្ធផ្សព្វផ្សាយព័ត៌មាន ឲ្យកាន់តែមានសក្ដានុពល ព្រមទាំងជំរុញការអភិវឌ្ឍទីក្រុងប្រព័ន្ធផ្សព្វផ្សាយ ឌីជីថល ឆ្លើយតបទៅនឹងការប្រកួតប្រជែងទីផ្សារលើវិស័យសារព័ត៌មាន រវាងសារព័ត៌មានប្រពៃណី ជាមួយសារព័ត៌មានឌីជីថល ក៏ដូចជាការប្រកួតប្រជែងជាមួយបណ្ដាញទំនាក់ទំនងសង្គម ដែលកំពុងពេញនិយមនាពេលបច្ចុប្បន្ន និង សម្ដែងនូវការកោតសរសើរចំពោះថ្នាក់ដឹកនាំ និង មន្ត្រីគ្រប់លំដាប់ថ្នាក់នៃក្រសួងព័ត៌មាន ដែលបានសហការជាមួយវិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ីប៉ាស៊ីហ្វិក ដើម្បីរៀបចំសន្និសីទដ៏មានសារៈសំខាន់នេះ ។
សម្ដេចតេជោ ហ៊ុន សែន មានប្រសាសន៍ទៀតថា កម្ពុជា ពិតមានកិត្តិយសដ៏ឧត្ដុង្គឧត្ដម ក្នុងការធ្វើជាម្ចាស់ផ្ទះរៀបចំសន្និសីទកំពូលសារព័ត៌មានអាស៊ីលើកទី១៦នេះ ដើម្បីផ្លាស់ប្ដូរមតិស្ដីពីវិទ្យាសាស្ត្រ និងការវិវត្តបច្ចេកវិទ្យាទំនើបនាបច្ចុប្បន្ន សម្រាប់យុទ្ធសាស្ត្រអភិវឌ្ឍវិស័យព័ត៌មាន ព្រមទាំងចក្ខុវិស័យរយៈពេលវែងទៅអនាគត ដើម្បីប្រែក្លាយបច្ចេកវិទ្យាឌីជីថល ភ្ជាប់ជាមួយបដិវត្តឧស្សាហកម្មទី៤ ក្នុងគោលដៅជំរុញការធ្វើឌីជីថលូបនីយកម្ម ប្រព័ន្ធផ្សព្វផ្សាយទៅក្នុងទីផ្សារឲ្យកាន់តែមានសក្ដានុពលថែមទៀត ព្រមទាំងបានប្រែក្លាយឌីជីថល ឆ្ពោះទៅកាន់បដិវត្តឧស្សាហកម្មទី៤ ជាមួយនឹងការបង្កើតឡើងនូវកាលានុវត្តភាព និង អត្ថប្រយោជន៍ ដូចជាទី១. បច្ចេកវិទ្យាឌីជីថល បានជំនួសការប្រើប្រាស់បច្ចេកវិទ្យាអាណាឡូក ប្រកបដោយមានសក្ដានុពល , ទី២. បច្ចេកវិទ្យាឌីជីថល បានរួមបញ្ចូលគ្នារវាងវិស័យទូរគមនាគមន៍និងប្រព័ន្ធផ្សព្វផ្សាយ ហើយបង្កើតបាននូវសក្ដានុពលលើប្រព័ន្ធផ្សព្វផ្សាយព័ត៌មានឌីជីថល និង បណ្ដាញទំនាក់ទំនងជាសកល តាមប្រព័ន្ធអនឡាញ និង បណ្ដាញទំនាក់ទំនងសង្គមផ្សេងៗទៀត និង ទី៣. បច្ចេកវិទ្យាឌីជីថល បានធ្វើឲ្យការគ្រប់គ្រងប្រទេស ក្លាយទៅជារដ្ឋាភិបាលឌីជីថល ក្នុងការបង្កើនសកម្មភាពសេដ្ឋកិច្ចឌីជីថល ការលើកកម្ពស់គុណភាព ប្រសិទ្ធភាពនៃសេវាសាធារណៈ ប្រកបដោយគណនេយ្យភាព តម្លាភាព និង ការតភ្ជាប់បណ្ដាញទំនាក់ទំនងផ្ទៃក្នុង និង សកលលោកទាំងមូល ។
សូមបញ្ជាក់ថា នេះជាលើកទីមួយហើយសម្រាប់ប្រទេសកម្ពុជា ក្នុងការរៀបចំប្រារព្ធសន្និសីទកំពូលសារព័ត៌មានអាស៊ីលើកទី១៦នេះ ខណៈពេលដែលកាលពីលើកទី១៥ បានប្រារព្ធឡើងនៅប្រទេសឥណ្ឌា ហើយសន្និសីទកំពូលសារព័ត៌មានអាស៊ីនេះ បានរៀបចំប្រារព្ធដំបូងនៅឆ្នាំ២០០៤ ទីក្រុងកូឡាឡាំពួរ ប្រទេសម៉ាឡេស៊ី រហូតដល់ឆ្នាំ២០០៨ហើយតែងតែប្រារព្ធធ្វើឡើងជារៀងរាល់ឆ្នាំ ៕
អត្ថបទ ៖ លោក លីវ សាន្ត
រូបថត ៖ លោក យូ វង្ស
