នៅថ្ងៃទី ១១ ខែ មិថុនា ឆ្នាំ២០១៩នេះ ឯកឧត្តម ទៀ សីហា អភិបាលនៃគណៈអភិបាលខេត្ត បានអនុញ្ញាតឲ្យក្រុមហ៊ុន មីតស៊ូបីស៊ី ខបភើរ៉េស្សីន ដឹកនាំដោយលោក Yogo Kanda ប្រធានក្រុមហ៊ុន ប្រចាំនៅកម្ពុជា រួមនឹងសការី ចូលជួបសម្តែងការគួរសម និង ពិភាក្សាការងារ អំពីតម្រូវការចាំបាច់ ក៏ដូចជាកង្វះខាតណា មួយរបស់រដ្ឋបាលខេត្តសៀមរាប ក្នុងកិច្ចអភិវឌ្ឍន៍ ខេត្តទេសចរណ៍ឲ្យមានភាពរីកចម្រើនបន្ថែមទៀត ។
មានប្រសាសន៍នោះដែរលោក Yogo Kanda បានធ្វើការបញ្ជាក់អំពីគោលបំណង របស់ក្រុមហ៊ុន មីតស៊ូបីស៊ី ខបភើរ៉េស្សីន មកកាន់រដ្ឋបាលខេត្តសៀមរាប ដើម្បីធ្វើយ៉ាងណាឲ្យបានចូលរួម ក្នុងកិច្ចអភិវឌ្ឍន៍នៅខេត្តសៀមរាប ទៅ លើគម្រោមណាមួយ ដែលខេត្តត្រូវការចាំបាច់ ព្រមទាំងបានធ្វើការបង្ហាញអំពីផលិតផលរបស់ក្រុមហ៊ុន ដែលជាក្រុមហ៊ុន មានភាពល្បីល្បាញនៅលើសកលលោក ក្នុងការបម្រើនូវតម្រូវការរបស់អតិថិជន ពាក់ព័ន្ធទៅលើរថយន្ត ជណ្តើរយន្ត និង វិស័យកាត់ដេរសម្លៀកបំពាក់ និង ផ្នែកអភិវឌ្ឍន៍ផ្សេងៗ ដែលស្ថិតនៅក្រោមការគ្រប់គ្រងរបស់ក្រុមហ៊ុន ។
លោក Yogo Kanda បន្តថា ការចូលជួបសម្តែងការគួរសមនាពេលនេះ ក្នុងគោលបំណងសិក្សា ស្វែងយល់ អំពីតម្រូវការចាំបាច់ ក៏ ដូចកង្វះខាតណាមួយរបស់រដ្ឋបាលខេត្តសៀមរាប ក្នុងកិច្ចអភិវឌ្ឍន៍ខេត្ត ហើយក៏ជាការបង្កើតនូវភាពស្និតស្នាលរវាងវិស័យឯកជន និងរដ្ឋទៀតផង ។ ម្យ៉ាងទៀតក៏ដើម្បីឲ្យទីក្រុងប្រវត្តិសាស្ត្រសៀមរាប ក្លាយជាក្រុងវៃឆ្លាត ប្រកបដោយ សន្តិសុខ សុវត្ថិភាព តាមរយៈការរៀបចំគម្រោង ក្នុងការភ្លើងចរាចរណ៍ ក្នុងការកាត់បន្ថយគ្រោះថ្នាក់ចរាចរណ៍ និង ការ កកស្ទះចរាចរណ៍ក្នុងក្រុងជាដើម ។
លោកបន្តទៀតថា ក្នុងនោះដែរលោកក៏មានចំណាប់អារម្មណ៍ក្នុងវិស័យកសិកម្ម ដោយក្រុមហ៊ុនលោក ជាអ្នកផលិតគ្រឿងយន្តកសិកម្ម ព្រមទាំងការគ្រប់គ្រងកាកសំណល់ (សម្រាម ) និង ទឹកកង្វក់នៅក្នុងក្រុង រួមទាំងការ គ្រប់គ្រងរថយន្តពន្លត់អគ្គិភ័យ ។ ជាពិសេស ចំពោះគម្រោង ក្នុងការពង្រីកក្រុងថ្មី គឺទាមទាដល់ការសិក្សាស្វែងយល់ និង កិច្ចសហប្រតិបត្តិការជាមួយគ្នាជាមួយរដ្ឋាភិបាលជប៉ុន ក៏ដូចក្រុមហ៊ុន ដើម្បីអភិវឌ្ឍន៍ខេត្ត ។
មានប្រសាសន៍នោះដែរឯកឧត្តម ទៀ សីហា ក៏បានជម្រាបដល់ក្រុមហ៊ុន អំពីតម្រូវការ និង កង្វះខាតរបស់ខេត្ត គឺ មានច្រើនលើគ្រប់វិស័យ តែកត្តាសំខាន់នោះ គឺ ធនធានមនុស្ស បច្ចេកទេស សម្ភារៈបរិក្ខាជាដើម ។ ហើយឯកឧត្តមក៏បានគូស បញ្ជាក់ថា ខេត្តសៀមរាបជាគោលដៅភ្ញៀវទេសចរណ៍លើពិភពលោក ចូលមកទស្សនាកម្សាន្ត តែចំពោះហេដ្ឋារចនា សម្ព័ន្ធក្នុងវិស័យទេសចរណ៍ នៅមិនទាន់បានបំពេញនូវតម្រូវការភ្ញៀវនៅឡើយ ក្រៅពីទស្សនាប្រាង្គប្រាសាទ និង រមនីយ ដ្ឋានធម្មជាតិ ។ ជាពិសសគម្រោងរបស់ខេត្ត ក្នុងការពង្រីករមនីយដ្ឋានទេសចរណ៍ គឺនៅ រមនីយដ្ឋានធ្មជាតិភ្នំគូលែន និង បឹងទន្លេសាប រួមទាំងធ្វើការពង្រីកក្រុងរណប នៅតាមបណ្តាស្រុកមួយចំនួនទៀតផង ។
ឯកឧត្តម ទៀ សីហា មានប្រសាសន៍បន្តថា ចំពោះការគ្រប់គ្រងកាកសំណល់ (សម្រាម) ដោយមានក្រុមហ៊ុនប្រមូលសម្រាមក្នុងក្រុង តែខេត្តខ្វះខាតនូវក្រុមហ៊ុនកែច្នៃសម្រាម ដោយពុំទាន់មានក្រុមហ៊ុនណាធ្វើជាដៃគូនៅឡើយ ។ ម្យ៉ាងទៀតខេត្ត ក៏ពុំទាន់មានរថយន្តបោសសម្អាតនៅតាមដងផ្លូវនៅឡើយ ដោយប្រើប្រាស់កម្លាំងពលកម្មនៅឡើយ ។ ចំពោះវិស័យ កសិកម្ម ខេត្តក៏ទាមទានូវតម្រូវការចាំបាច់ទាំងសម្ភារៈ និង ការបណ្តុះបណ្តាលបច្ចេកទេស ។ ក្នុងនោះដែរឯកឧត្តមក៏បាន លើកផងដែរ ពីការគ្រប់គ្រង គ្រឿងបំពាក់រយន្តពន្លត់អគ្គិភ័យរបស់ខេត្ត គឺទទួលបានពីបណ្តាប្រទេសជាមិត្ត ដែលបាន ផ្តល់ជូន ក្នុងនោះក៏មានប្រទេសជប៉ុនផងដែរ ។ ម្យ៉ាងទៀតដោយស្ថានភាពផ្លូវ នៅក្នុងក្រុងមានសភាពតូចចង្អៀត ដែល បង្កនូវផលលំបាក់ ក្នុងពេលរថយន្តពន្លត់អគ្គិភ័យចេញទៅធ្វើអន្តរាគមន៍សង្គ្រោះទៀតផង ។
ក្នុងនោះដែរឯកឧត្តមក៏បាន លើកនូវ សំណូមពរមួយចំនួន ដល់ក្រុមហ៊ុនមីតស៊ូបីស៊ី ខបភើរ៉េស្សីន ដើម្បីជាដៃគូរក្នុងកិច្ចអភិវឌ្ឍន៍ខេត្តសៀមរាប ឲ្យ ក្លាយជាក្រុងវៃឆ្លាត មានសោភណ្ឌភាពស្រស់ស្អាតនៅក្នុងតំបន់ទាំងមូលផងដែរ ៕
អត្ថបទ និងរូបភាព ៖ ម៉ី សុខារិទ្ធ
កែសម្រួល ៖ អ៊ុន ណារាជ្យ
