គម្រោងសាងសង់ផ្លូវបេតុងចំនួន ០២ខ្សែ ដែលមានប្រវែងសរុប១.២៨៦ម៉ែត្រ ស្ថិតក្នុងសង្កាត់ស្លក្រាម ក្រុងសៀមរាប
ក្នុងនោះ ផ្លូវបេតុខ្សែទី១ នៅក្នុងភូមិបឹងដូនប៉ា ប្រវែង ៦០០ ម៉ែត្រ មានទទឹង៦ម៉ែត្រ និង ផ្លូវបេតុងខ្សែទី២ តភ្ជាប់ពីផ្លូវក្រាលកៅស៊ូចូលវត្តត្រាំនាគទៅខាងកើត ក្នុងភូមិធ្លកអណ្តូង ប្រវែង៦៨៦ម៉ែត្រ មានទទឹង៧ម៉ែត្រ ក្រោមការប្រើប្រាស់ដោយថវិការបស់រដ្ឋបាលខេត្តសៀមរាប ត្រូវបានប្រកាសជាសាធារណៈបើកដំណើរការការដ្ឋានសាងសង់ កាលពីព្រឹកថ្ងៃទី០៩ ខែមិថុនា ឆ្នាំ២០១៩នេះ ក្រោមអធិបតីភាពឯកឧត្តម ទៀសីហា អភិបាលខេត្តសៀមរាប ដោយមានការចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត គណៈអភិបាលក្រុងសៀមរាប ក្រុមប្រឹក្សាសង្កាត់ស្លក្រាម និង បងប្អូនប្រជាពលរដ្ឋក្នុងសង្កាត់ស្លក្រាមយ៉ាងច្រើនកុះករ ។
ឯកឧត្តម ទៀ សីហា មានប្រសាសន៍ថា ការសាងសង់កែលម្អពីផ្លូវក្រាលដីគ្រួសក្រហម ទៅជាផ្លូវក្រាលបេតុងនេះ គឺជាការបោះជំហ៊ានទៅមុខបន្ថែមទៀត ក្នុងគោលដៅលុបបំបាត់ផ្លូវដីគ្រួសក្រហមនៅក្នុងក្រុងទេសចរណ៍សៀមរាប-អង្គរ ហើយក៏អាចនិយាយបានដែរថា គឺជាជំហ៊ាននៃការអភិវឌ្ឍបន្ថែមទៀតសម្រាប់ក្រុងសៀមរាប លើវិស័យហេដ្ឋារចនា សម្ព័ន្ធផ្លូវថ្នល់ ដែលជាសមិទ្ធផលចាំបាច់ ក្នុងគុណតម្លៃជាសសៃឈាមសេដ្ឋកិច្ច រួមចំណែកយ៉ាងសំខាន់ កាត់បន្ថយការលំបាករបស់ប្រជាពលរដ្ឋ ដែលមិនត្រឹមតែជួយសម្រួលដល់ការធ្វើដំណើរ និងការដឹកជញ្ជូនផ្សេងៗបានងាយស្រួលនិងឆាប់រហ័សប៉ុណ្ណោះទេ ថែមទាំងបានដើរតួនាទីមិនអាចខ្វះបានក្នុងវិស័យសន្តិសុខ ការរៀបរយសណ្តាប់ធ្នាប់សាធារណៈ សុវត្ថិភាពសង្គម និងសុខុមាលភាព ។
ឯកឧត្តម ទៀ សីហា មានប្រសាសន៍ទៀតថា ក្រោមកិច្ចដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងរយៈពេលមួយទស្សវត្សរ៍ចុងក្រោយកន្លងមកនេះ រាជរដ្ឋាភិបាលកម្ពុជាសម្រេចបាននូវជោគជ័យធំៗជាច្រើនជាប្រវត្តិសាស្ត្រ ជា ពិសេសការសម្រេចបាននូវកំណើនសេដ្ឋកិច្ចខ្ពស់ ព្រមទាំងការធ្លាក់ចុះអត្រានៃភាពក្រីក្ររបស់ប្រជាជនតាមរយៈ ការលើកកម្ពស់ផលិតភាព និងការរក្សាកំណើនសេដ្ឋកិច្ចប្រកបដោយចីរភាព ដូច្នេះ តាមរយៈការសាងសង់ផ្លូវបេតុង ចំនួន០២ខ្សែ នាពេលនេះ នឹងរួមចំណែកលើកកម្ពស់ជីវភាព រស់នៅ ជូនបងប្អូនប្រជាពលរដ្ឋបានមួយកម្រិតថែមទៀត ដើម្បីរួមចំណែកក្នុងការអភិវឌ្ឍខេត្តសៀមរាបរបស់យើងឱ្យកាន់តែមានការរីកលូតលាស់ សក្តិសមជាទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ ៕
អត្ថបទ និង រូបថត : សហការី
កែសម្រួលអត្ថបទ : លោក លីវ សាន្ត
