នៅព្រឹកថ្ងៃទី២០ ខែកុម្ភៈ ឆ្នាំ២០២៥នេះ លោក ង៉ូវ សេងកាក់ សមាជិកគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំសហការី ចូលរួមគោរពវិញ្ញណក្ខន្ធ និងនាំយកអំណោយរបស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចូលរួមរំលែកទុក្ខគ្រួសារសព លោកអនុសេនីយ៍ឯក អ៊ុក ផាន្នី ប្រធានអង្គភាពសន្តិសុខ នៃមន្ទីរស្រាវជ្រាវព័ត៌មានសន្តិសុខកងរាជអាវុធហត្ថខេត្តរតនគិរី ដែលបានទទួលមរណភាពដោយសារគ្រោះថ្នាក់ចរាចរណ៍ក្នុងពេលបំពេញបេសកកម្ម កាលពីថ្ងៃទី១៨ ខែកុម្ភៈ ឆ្នាំ២០២៥ នៅស្រុកលំផាត់ ខេត្តរតនគិរី។
ក្នុងឱកាសនោះ លោក ង៉ូវ សេងកាក់ បាននាំយកនូវប្រសាសន៍ផ្ដាំផ្ញើ និងការចូលរួមរំលែកទុក្ខពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំពោះក្រុមគ្រួសារនៃសព ចំពោះមរណភាពរបស់ លោកអនុសេនីយ៍ឯក អ៊ុក ផាន្នី ដែលជាការបាត់បង់នូវមេគ្រួសារ ជាប្ដី ជាឪពុក ដែលជាការបាត់បង់មួយដ៏ធំធេងហើយគ្មាននរណាម្នាក់ចង់ជួបឡើយ។ ការទទួលមរណភាពរបស់លោក ក៏ជាការបាត់បង់នូវធនធានមនុស្សដ៏សំខាន់មួយរូប ដែលកន្លងមក លោកបានចូលរួមក្នុងការងារអភិវឌ្ឍ និងការពារសន្តិសុខសង្គមជាតិ គួរជាទីគោរពស្រលាញ់ផងដែរ។
សូមជម្រាបថា ពិធីបុណ្យសព លោកអនុសេនីយ៍ឯក អ៊ុក ផាន្នី ប្រារព្ធឡើងនៅគេហដ្ឋានលោកផ្ទាល់ ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប។ ក្នុងឱកាសនោះ លោក ង៉ូវ សេងកាក់ បាននាំយកថវិកាចំនួន ៥លានរៀល ជាអំណោយរបស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមនឹង អង្ករ៩០គីឡូក្រាម មី៤កេស ទឹកស៊ីអុីវ២យួរ និងឃីត២កញ្ចប់ ប្រគល់ជូនក្រុមគ្រួសារនៃសពថែមទៀតផង៕
អត្ថបទ និងរូបភាព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
