អាកាសយានដ្ឋានអន្តរជាតិសៀមរាបអង្គរ បានធ្វើសមយុទ្ធលើតុ ដែលជាការត្រៀមខ្លួនសម្រាប់សមយុទ្ធទ្រង់ទ្រាយធំ ដែលនឹងធ្វើឡើងនាថ្ងៃទី២៧ ខែកុម្ភៈ ឆ្នាំ២០២៥ខាងមុខ ក្នុងគោលបំណងដើម្បីឆ្លើយតបឱ្យទាន់ពេលវេលានៅពេលមានគ្រោះថ្នាក់កើតឡើងនៅអាកាសយានដ្ឋាន ឬនៅជិតនោះ។
ថ្លែងនៅពិធីបើកសមយុទ្ធលើតុ នាថ្ងៃទី២០ ខែកុម្ភៈ ឆ្នាំ២០២៥ ឯកឧត្តម សេង រ៉ាវុធ អគ្គនាយករង នៃរដ្ឋលេខាធិការដ្ឋានអាកាសចរស៊ីវិល បានលើកឡើងថា ការធ្វើសមយុទ្ធនេះ ជាតម្រូវការចាំបាច់ដែលគ្រប់អាកាសយានដ្ឋានអន្តរជាតិទាំងអស់ត្រូវធ្វើ ដើម្បីវាយតម្លៃថាមានលទ្ធភាពគ្រប់គ្រាន់នៅក្នុងការគ្រប់គ្រងគ្រាមានគ្រោះអាសន្នណាមួយបានកើតឡើង។ សមយុទ្ធនេះធ្វើឡើងក្រោមការរៀបចំដោយរដ្ឋលេខាធិការដ្ឋានអាកាសចរស៊ីវិល សហការជាមួយអាជ្ញាធរខេត្តសៀមរាប និងអង្គភាពស្ថាប័នពាក់ព័ន្ធជាច្រើនទៀត ដើម្បីសាកល្បងផែនការសង្គ្រោះបន្ទាន់ និងវាយតម្លៃសមត្ថភាពប្រតិបត្តិការរបស់ខ្លួន ក្នុងទំនាក់ទំនងក្នុងពេលកើតហេតុជាក់ស្តែង។
ឯកឧត្តម សេង រ៉ាវុធ បញ្ជាក់ថា សមយុទ្ធនេះដែរ ក៏ជាការសាកល្បងនីតិវិធីក្នុងការហៅទំនាក់ទំនងទូរសព្ទ និងហ្វ្រេកង់ប្រើប្រាស់ពេលមានគ្រោះអាសន្ន និងសហការក្នុងការឆ្លើយតបរបស់ភ្នាក់ងារខាងក្នុង និងក្រៅអាកាសយានដ្ឋាន។ សាកល្បងការឆ្លើយតបវេជ្ជសាស្ត្រទាំងភ្នាក់ងារខាងក្នុង និងក្រៅអាកាសយានដ្ឋាន និងសាកល្បងក្នុងការទំនាក់ទំនងទីបញ្ជាការចល័ត និងមជ្ឈមណ្ឌលសហប្រតិបត្តិការគ្រប់គ្រងគ្រោះមហន្តរាយ។
ព័ត៌មានជាតិ ថ្មីៗ
ឯកឧត្តម ប៊ុន រដ្ឋា នាយកអាកាសយានដ្ឋានអន្តរជាតិសៀមរាប-អង្គរ បញ្ជាក់ថា ការធ្វើសមយុទ្ធនេះ ជាផែនការគ្រប់គ្រងគ្រោះអាសន្ន វាបានកំណត់យ៉ាងច្បាស់នូវតួនាទីរបស់អ្នកពាក់ព័ន្ធទាំងអស់ ទាំងក្នុង និងក្រៅអាកាសយានដ្ឋាន។ បន្ថែមពីនេះទៀត ផែនការនេះបានធ្វើការទំនាក់ទំនង យល់ដឹង និងរៀបចំជាស្រេច ក្នុងបំណងដើម្បីឆ្លើយតបយ៉ាងមានប្រសិទ្ធភាពក្នុងគ្រោះអាសន្នណាមួយដែលកើតមាន។ សមយុទ្ធនេះក៏ជាការរៀបចំកម្លាំងមនុស្ស សម្ភារៈបរិក្ខារ មធ្យោបាយនានា និងធនធានដទៃទៀតដែលមាន ដើម្បីប្រើប្រាស់ក្នុងអំឡុងពេលធ្វើអន្តរាគមន៍ និងប្រតិបត្តិការស្ដារស្ថានភាពឱ្យប្រសើរឡើងវិញ។
សូមជម្រាបថា សម្រាប់សមយុទ្ធលើតុនេះដែរ រៀបចំឡើងក្រោមកិច្ចសហការរវាងរដ្ឋលេខាធិការដ្ឋានអាកាសចរណ៍ស៊ីវិល រដ្ឋបាលខេត្តសៀមរាប និងក្រុមហ៊ុន YACA ក្រុមហ៊ុន AIAI និងក្រុមហ៊ុន CATS ហើយក៏មានការចូលរួមពី លោក សំកុល សុចិត្រា អភិបាលរងខេត្ត តំណាង ឯកឧត្តម ប្រាក់ សោភ័ណ អភិបាលខេត្តសៀមរាប រួមនឹងវត្តមានថ្នាក់ដឹកនាំមន្ទីរអង្គភាព និងអ្នកពាក់ព័ន្ធជាច្រើនរូបទៀត៕
អត្ថបទ៖ លោក ជា ស្រស់, រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
