នៅថ្ងៃទី២១ ខែកុម្ភៈ ឆ្នាំ២០២៥នេះ កង់ចំនួន ១.០១៨គ្រឿង ជាអំណោយរបស់អង្គការនានាមកពីក្រៅប្រទេស ត្រូវបានផ្ដល់ជូនសិស្សានុសិស្សមានជីវភាពខ្វះខាតមកពីតាមបណ្ដាក្រុងស្រុកមួយចំនួនក្នុងខេត្តសៀមរាប តាមរយៈអង្គការសុបិន្ដសហគមន៍កម្ពុជា ដើម្បីឱ្យពួកគាត់ងាយស្រួលក្នុងការធ្វើដំណើរទៅសាលា លើកទឹកចិត្ដឱ្យពួកគាត់បន្ដខិតខំរៀនសូត្រ ដែលពិធីប្រគល់នេះ ធ្វើឡើងនៅសាលាគរុកោសល និងវិក្រឹតការខេត្ត ក្រោមអធិបតីភាព លោកស្រី ម៉ននី រង្សី អភិបាលរងខេត្តសៀមរាប។
លោកស្រី ជេនណី លីប៉ា ប្រធានអង្គការសុបិន្ដកម្ពុជា បានឱ្យដឹងថា កង់ទាំង១.០១៨គ្រឿងនេះ បានពីការចូលរួមរបស់អង្គការអន្ដរជាតិផ្សេងៗដូចជា ឡូតារីក្លឹបសិនតូសា សាំងហ្គាពួជាដើម ក្នុងការចូលរួមចំណែកលើកកម្ពស់វិស័យអប់រំនៅកម្ពុជា។ កន្លងមកពួកគាត់ក៏បានផ្ដល់ជាអណ្ដូងទឹកដល់ប្រជាពលរដ្ឋ ជាពិសេសកម្មវិធីបណ្ដុះបណ្ដាលផ្នែកវិស័យអប់រំផងដែរ។ ក្នុងនាមម្ចាស់ជំនួយ លោកស្រីបានសម្ដែងនូវក្ដីរីករាយ នៅពេលដែលសិស្សានុសិស្សដែលមានជីវភាព មានមធ្យោបាយសម្រាប់ធ្វើដំណើរទៅសាលារៀន ហើយសង្ឃឹមថាមធ្យោធ្វើដំណើរនេះ នឹងធ្វើឱ្យប្អូនងាយស្រួលក្នុងការទៅសិក្សារៀនសូត្រ ព្រោះមានតែការសិក្សាទេ ដែលជួយឱ្យកុមារមានអនាគតល្អ បានចូលរួមបម្រើសង្គមជាតិ។
លោកស្រី ម៉ននី រង្សី អភិបាលរងខេត្ត បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡា ដែលបានរកគ្រប់មធ្យោបាយ កែទម្រង់វិស័យអប់រំ ដើម្បីធានាឱ្យការកសាងនឹងអភិវឌ្ឍន៍ធនធានមនុស្ស ស្របតាមបែបផែនផលិតកម្មទំនើប និងដំណាក់កាល នៃការរីកចម្រើនរបស់ពិភពលោក។ ជាមួយគ្នានោះ ការចូលរួមគាំទ្រពីអង្គការដៃគូអភិវឌ្ឍនានា ដូចជាផ្តល់កម្មវិធីអាហារពេលព្រឹក អាហារូបករណ៍ មធ្យោបាយធ្វើដំណើរ និងសម្ភារៈសិក្សាដល់សិស្សានុសិស្ស ពិតជាបានជួយឱ្យពួកគាត់មានលទ្ធភាពបានចូលរៀនគ្រប់ៗគ្នា កាត់បន្ថយអត្រារបោះបង់ការសិក្សា ជួយសម្រាលបន្ទុកក្នុងគ្រួសារ ក៏ដូចជាបានរួមចំណែកកាត់បន្ថយភាពក្រីក្ររបស់ប្រជាជន ធានាបាននូវគោលការណ៍សមភាព និងសមធម៌ផងដែរ។
ព័ត៌មានជាតិ ថ្មីៗ
លោកស្រីអភិបាលរងខេត្ត មានប្រសាសន៍ថា តាមរយៈការចែកកង់ដល់ប្អូនៗសិស្សានុសិស្សនាពេលនេះ ពិតជាបានសបញ្ជាក់ឱ្យឃើញពីការយកចិត្តទុកដាក់ ក្នុងការជំរុញកុមារឱ្យចូលសាលារៀន ផ្តល់ឱកាសដល់សិស្សានុសិស្សដែលកំពុងជួបការលំបាកមានលទ្ធភាពក្នុងការចូលរៀន។ លោកស្រីក៏សូមថ្លែងអំណរគុណដល់សប្បុរសជនទាំងអស់ ដែលបានផ្តល់កង់ និងរៀបចំឱ្យមានពិធីចែកកង់ដល់សិស្សានុសិស្សនាពេលនេះ និងសូមស្នើឱ្យឱ្យប្អូនៗ ត្រូវខិតខំសិក្សារៀនសូត្រ និងថែរក្សាកង់នេះឱ្យបានល្អ ជាប្រយោជន៍ដល់ការសិក្សារបស់ប្អូន៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
