ក្នុងឱកាសអញ្ជើញប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានក្រុងស្រុក នៃខេត្តសៀមរាប នាព្រឹកថ្ងៃទី០៧ ខែមីនា ឆ្នាំ២០២៥នេះ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះមូលដ្ឋានខេត្តសៀមរាប បានជំរុញដល់ក្រុមការងាររាជរដ្ឋាភិបាលចុះមូលដ្ឋានខេត្ត ត្រូវបន្តខិតខំបង្កើនសកម្មភាពការងារ ដើម្បីបង្កើតនូវសមិទ្ធផលថ្មីៗជូនប្រជាពលរដ្ឋនៅមូលដ្ឋាន ស្របតាមគោលនយោបាយរបស់រាជរដ្ឋាភិបាល។
ឯកឧត្តម នាយឧត្តមសេនីយ៍ ទៀ សីហា មានប្រសាសន៍ថា កន្លងមកក្រុមការងារបានរួមចំណែកជំរុញការងារកំណែទម្រង់វិមជ្ឈការ និងវិសហមជ្ឈការមានវឌ្ឍនភាពគួរឲ្យកត់សម្គាល់ និងសម្រេចបានសមិទ្ធផលនានាជាច្រើន ដែលធ្វើឱ្យរដ្ឋបាលថ្នាក់ក្រោមជាតិមានឱកាសពង្រឹងក្របខ័ណ្ឌស្ថាប័ន លើកកម្ពស់សមត្ថភាពធនធានមនុស្សអនុវត្តការងារប្រកបដោយគុណភាព និងប្រសិទ្ធភាពក្នុងការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបទៅនឹងតម្រូវការ និងដោះស្រាយបញ្ហា ប្រឈមនានារបស់ប្រជាពលរដ្ឋបានទាន់ពេលវេលា និងចំគោលដៅ។ សមិទ្ធផលដែលក្រុមការងាររាជរដ្ឋាភិបាល និងរដ្ឋបាលគ្រប់ថ្នាក់សម្រេចបានកន្លងមកនេះ បានឆ្លុះបញ្ចាំងពីកិច្ចខិតខំប្រឹងប្រែង ក្នុងការរួមចំណែកយ៉ាងសកម្មក្នុងការអនុវត្តនូវកម្មវិធីគោលនយោបាយនានា និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។
ឯកឧត្ដម ឧបនាយករដ្ឋមន្ត្រី បញ្ជាក់ថា ឆ្នាំ២០២៥នេះ ជាឆ្នាំទី៣ នៃការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដែលជារបៀបវារៈនយោបាយដ៏សំខាន់សម្រាប់ការអភិវឌ្ឍប្រទេសជាតិ ប្រកបដោយទស្សនវិស័យវែងឆ្ងាយច្បាស់លាស់ សំដៅនាំប្រទេសជាតិ ឆ្ពោះទៅកាន់ការអភិវឌ្ឍរីកចម្រើនលើគ្រប់វិស័យជាបន្តទៀត។ ស្នូលនៃយុទ្ធសាស្ត្របញ្ចកោណដំណាក់កាលទី១ គឺផ្តោតលើការកែទម្រង់ ការពង្រឹងអភិបាលកិច្ចល្អ និងការធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈទំនើប ប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ។
ឯកឧត្តមបន្តថា រាជរដ្ឋាភិបាលនឹងជំរុញលើកកម្ពស់ការផ្តល់សេវាសាធារណៈឱ្យមានគុណភាព និងប្រសិទ្ធភាព ពង្រឹង និងកែលម្អស្ថាប័នសាធារណៈនៅគ្រប់ថ្នាក់ឱ្យមានសមត្ថភាព ជាមួយនឹងស្អាតស្អំ ដើម្បីបម្រើផលប្រយោជន៍ប្រជាជន។ ជាមួយគ្នានេះ រាជរដ្ឋាភិបាលបន្តយកចិត្តទុកដាក់ពង្រឹងការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ ដែលជាកំណែទម្រង់ដ៏មានសារៈសំខាន់ក្នុងកម្មវិធីកំណែទម្រង់ប្រព័ន្ធអភិបាលកិច្ច សំដៅលើកកម្ពស់គុណភាព និងប្រសិទ្ធភាពនៃការផ្តល់សេវាសាធារណៈ ឆ្លើយតបទៅនឹងតម្រូវការផ្សេងៗរបស់ប្រជាពលរដ្ឋនៅតាមមូលដ្ឋាននីមួយៗ និងពង្រីកសេវាថែទាំសុខភាពឆ្ពោះទៅរកការគ្របដណ្តប់សុខភាពសកលឱ្យទទួលបានជោគជ័យ។ រាជរដ្ឋាភិបាល ជំរុញការអភិវឌ្ឍសេដ្ឋកិច្ចសង្គមក្នុងខេត្តសៀមរាប តាមរយៈអភិវឌ្ឍហេដ្ឋារចនាសម្ព័នរូបវន្ត និងអរូបវន្ត នៅក្រុងស្រុក ឃុំសង្កាត់ សម្រាប់បម្រើដល់សកម្មភាពសេដ្ឋកិច្ច ការវិនិយោគ ការធ្វើពាណិជ្ជកម្ម និងការប្រកបមុខរបរខ្នាតតូចរបស់ប្រជាពលរដ្ឋ ដោយផ្តោតលើវិស័យកសិកម្ម និងទេសចរណ៍ ដែលជាវិស័យដ៏មាន សក្តានុពលរបស់ខេត្ត សំដៅបង្កើនការងារ និងប្រាក់ចំណូលរបស់ប្រជាពលរដ្ឋ, កាត់បន្ថយភាពក្រីក្រ, ជំរុញកំណើនសេដ្ឋកិច្ច រួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គមប្រកបដោយចីរភាព និងបរិយាបន្ន។
ឯកឧត្តមរដ្ឋមន្ត្រី ក៏បានជំរុញក្រុមការងាររាជរដ្ឋាភិបាលចុះមូលដ្ឋានក្រុងស្រុក ត្រូវសហការគ្នាឱ្យបានជិតស្និទ្ធជាមួយរដ្ឋបាលខេត្ត ក្រុងស្រុក ឃុំសង្កាត់ មន្ទីរអង្គភាពជុំវិញខេត្ត ដើម្បីគាំទ្រអនុវត្តកម្មវិធីគោលនយោបាយរបស់រាជរដ្ឋាភិ បាលដែលបានដាក់ចេញ នៅក្នុងមូលដ្ឋានរបស់ខ្លួន ប្រកបដោយការទទួលខុសត្រូវខ្ពស់ ដើម្បីបម្រើប្រជាពលរដ្ឋប្រកបដោយតម្លាភាព និងគណនេយ្យភាព។ ជាមួយគ្នានេះ ក៏ត្រូវជំរុញលើកកម្ពសសមត្ថភាពស្ថាប័ននៅមូលដ្ឋាន ពង្រឹងការទទួលខុសត្រូវ និងភាពជាម្ចាស់របស់មូលដ្ឋានក្នុងការអនុវត្តកម្មវីធីនយោបាយ យុទ្ធសាស្ត្របញ្ចកោណ។ ឯកឧត្ដមនាយឧត្ដមសេនីយ៍ ក៏ស្នើដល់សមាភាពក្រុមការងាររាជរដ្ឋាភិបាល បន្តអនុវត្តការងារចំនួន ១៣ចំណុច ដើម្បីឱ្យការងារចុះមូលដ្ឋានកាន់តែមានប្រសិទ្ធភាព និងទទួលបានសមិទ្ធផលជាច្រើនបន្ថែមទៀតជូន ប្រជាពលរដ្ឋនៅមូលដ្ឋាន៕
អត្ថបទ និងរូបភាព៖ មន្ត្រីមន្ទីរព័ត៌មានខេត្ត
កែសម្រួល៖ លោក អ៊ុន ណារាជ្យ
