ប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប ហៅកាត់ថា គ.ក.ស.ក បានជំរុញដល់ក្រុមការងារ ត្រូវបន្តខិតខំអនុវត្តទៅតាមសមត្ថកិច្ចជំនាញរបស់ខ្លួន ជាពិសេសបន្តតាមដានករណីផ្ដល់បណ្ណក្រីក្រ ជាមួយមន្ទីរផែនការខេត្ត និងចុះពិនិត្យតាមដានកុមារដែលបានបោះបង់ការសិក្សាឱ្យបានចូលរៀនទៀងទាត់វិញ។
ថ្លែងក្នុងកិច្ចប្រជុំសាមញ្ញលើកទី៩ ប្រចាំខែមីនា និងប្រចាំត្រីមាសទី១ ឆ្នាំ២០២៥ របស់គណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត នៅព្រឹកថ្ងៃទី២០ ខែមីនា ឆ្នាំ២០២៥នេះ លោកជំទាវ ស៊ិន ណម ប្រធាន គ.ក.ស.ក មានប្រសាសន៍ថា កិច្ចប្រជុំពេលនេះ គឺដើម្បីធ្វើការពិនិត្យលើការងារសម្រាប់ខែមីនា ក្នុងការងារលើកកម្ពស់ការយល់ដឹង និងការប្រើប្រាស់បទដ្ឋានគតិយុត្តជាតិ និងអន្តរជាតិដែលមានស្រាប់ សំដៅការពារកុមារពីការរំលោភបំពាន និងកេងប្រវ័ញ្ចផ្លូវភេទនៅខេត្តសៀមរាប ដែលអនុវត្តក្នុងពេលកន្លងមក។ ជាមួយគ្នានេះដែរ ក៏សូមឱ្យគ្រប់អ្នកពាក់ព័ន្ធទាំងអស់ ត្រូវបន្តកិច្ចសហការជាមួយសមត្ថកិច្ច អាជ្ញាធរក្រុងស្រុក ឃុំសង្កាត់ ក្នុងការអនុវត្តឱ្យទទួលបានលទ្ធផលល្អប្រសើរឡើង។
លោកជំទាវ ស៊ិន ណម ក៏បានបញ្ជាក់ផងដែរថា រាល់បទពិសោធ និងលទ្ធផលដែល គ.ក.ស.ក ទទួលបានកន្លងមក នឹងក្លាយជាប្រទីពសម្រាប់គណៈកម្មាធិការពិគ្រោះយោបល់កិច្ចការស្រ្តី និងកុមារក្រុងស្រុក យកទៅអនុវត្ត និងសូមសំណូមពរដល់សមាជិកទាំងអស់ បន្តយកចិត្តទុកដាក់អប់រំ និងផ្សព្វផ្សាយអំពីច្បាប់ទាក់ទងទៅនឹងស្ត្រី និងកុមារ និងបង្កើននូវកិច្ចទំនាក់ទំនងល្អនៅក្នុងមូលដ្ឋានបន្ថែមទៀត៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
