ក្រុមអ្នកផលិតមាតិកា និងមគ្គុទេសក៍ទេសចរណ៍ បានសម្ដែងក្ដីរីករាយ ដែលបានរាជរដ្ឋាភិបាលប្រកាសរៀបចំព្រឹត្ដិការណ៍អង្គរសង្ក្រាន្ដ នៅឆ្នាំ២០២៥នេះ និងបានអំពាវនាវដល់ប្រជាពលរដ្ឋ អ្នកទេសចរជាតិ និងអន្ដរជាតិ ចូលរួមលេងកម្សាន្ដព្រឹត្ដិការណ៍អង្គរសង្ក្រាន្ដ ដើម្បីស្វែងយល់ពីវប្បធម៌ អរិយធម៌ ប្រពៃណីខ្មែរ ឱ្យកាន់តែច្បាស់ ខណៈដែលវប្បធម៌ខ្មែរដ៏សម្បូររបស់ខ្មែរនឹងបង្ហាញជូននៅក្នុងព្រឹត្ដិការណ៍ដ៏ពិសេសមួយនេះ។
ពួកគាត់បានលើកឡើងថា ព្រឹត្ដិការណ៍អង្គរសង្ក្រាន្ដ គឺតែងតែប្លែក និងមានកម្មវិធីកម្សាន្តសប្បាយជាច្រើន ទាំងប្រពៃណី សិល្បៈបុរាណខ្មែរជាដើម នឹងត្រូវបានគាស់កកាយ និងធ្វើឱ្យរស់រវើកឡើងវិញ នៅក្នុងព្រឹត្តិការណ៍នេះ។ ការបង្កើតព្រឹត្ដិការណ៍អង្គរសង្ក្រាន្ដនេះ នឹងនាំមកនូវកំណើនទេសចរ និងផ្ដល់ចំណូលដល់ប្រជាពលរដ្ឋនៅមូលដ្ឋានផងដែរ។
សូមជម្រាប ព្រឹត្ដិការណ៍អង្គរសង្រ្កាន្ត ឆ្នាំ២០២៥នេះ ក្រោមប្រធានបទ ញញឹមសាទរសង្ក្រាន្ដឆ្នាំថ្មី ដែលនឹងប្រព្រឹត្តិទៅចាប់ពីថ្ងៃទី១៤-១៦ ខែមេសា ខាងមុខនេះ។ ព្រឹត្ដិការណ៍នេះដែរ មានគោលបំណង រម្លឹក និងធ្វើឱ្យរស់រវើកឡើងវិញនៃមរតកបេតិកភណ្ឌអរូបី នៅលើទីតាំងនៃមរតកបេតិកភណ្ឌរូបី ដែលធ្វើឱ្យអង្គរមានជីវិត ជាពិសេសនោះគឺផ្តល់ឱកាសឱ្យយុវជន ប្រជាជន ភ្ញៀវទេសចរជាតិ និងអន្តរជាតិបានឈ្វេងយល់ និងទទួលបានបទពិសោធបន្ថែមអំពី ភាពរុងរឿង ល្បីល្បាញ ភាពសម្បូរបែបនៃវប្បធម៌ អរិយធម៌ខ្មែរ ក៏ដូចជាផ្តល់ឱកាសឱ្យពាណិជ្ជករ សហគ្រិន អាជីវករ ផលិតផលពាណិជ្ជកម្មផលិតផល សិប្បកម្ម និងសេវាកម្មនានា ទទួលបានប្រយោជន៍ធុរកិច្ចពីកំណើនទេសចរណ៍៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
