ប្រធានក្រុមប្រឹក្សាខេត្តសៀមរាប ឯកឧត្ដម លី សំរិទ្ធ បានជំរុញដល់អាជ្ញាធរក្រុងស្រុក កម្លាំងមានសមត្ថកិច្ច បន្តយកចិត្តទុកដាក់លើការងារថែរក្សាសន្ដិសុខ សណ្ដាប់ធ្នាប់ក្នុងមូលដ្ឋាន ពិសេសក្នុងឱកាសពិធីបុណ្យចូលឆ្នាំថ្មីប្រពៃណីជាខ្មែរនាពេលខាងមុខ រួមនឹងការក្ដាប់ឱ្យបានលើការទប់ស្កាត់ការទន្ទ្រានដីតំបន់៣។
ក្នុងឱកាសដឹកនាំកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្ត អាណត្តិទី៤ នៅព្រឹកថ្ងៃទី០៣ ខែមេសា ឆ្នាំ២០២៥នេះ ឯកឧត្ដម លី សំរិទ្ធ មានប្រសាសន៍ថា កត្តាសំខាន់ដែលត្រូវយកចិត្តទុកដាក់លើការងារសន្តិសុខ សណ្ដាប់ធ្នាប់សាធារណៈ គឺត្រូវលុបបំបាត់ឱ្យបាននូវក្រុមក្មេងទំនើង ករណីគ្រឿង ព្រមទាំងបង្ក្រាបឱ្យខាងតែបានចំពោះបទល្មើសព្រៃឈើ និងជលផល និងគ្រប់គ្រងឱ្យបាននូវព្រៃលិចទឹកបឹងទន្លេសាប(តំបន់៣) ហើយចំពោះបុគ្គលណានៅតែបំពានរានដីព្រៃលិចទឹកតំបន់បី ត្រូវធ្វើការផ្ដន្ទាទោសទៅតាមច្បាប់។
មានប្រសាសន៍ក្នុងឱកាសនោះដែរ ឯកឧត្ដម ប្រាក់ សោភ័ណ អភិបាលខេត្ត បានវាយតម្លៃខ្ពស់ ចំពោះលទ្ធផលដែលរដ្ឋបាលខេត្ត អនុវត្តបានប្រចាំខែមីនា ព្រមទាំងបានណែនាំដល់រដ្ឋបាលក្រុងស្រុក បន្តអនុវត្តទៅតាមទិសដៅនៃអង្គសន្និបាតរបស់រដ្ឋបាលខេត្ត ដែលបានដាក់ចេញក្នុងឆ្នាំ២០២៥ ឱ្យសម្រេចបានជោគជ័យ។
ក្នុងនាមប្រធានគណៈបញ្ជាការឯកភាពរដ្ឋបាលខេត្ត ឯកឧត្តម បានដាក់នូវបទបញ្ជាដល់អាជ្ញាធរមានសមត្ថកិច្ចទាំងអស់ ធ្វើការត្រួតពិនិត្យនូវគ្រប់យានយន្តកែច្នៃ ដែលតែរំខានដល់អារម្មណ៍ប្រជាពលរដ្ឋ ភ្ញៀវទេសចរ ព្រមទាំងរថយន្តដែលដឹកសំពីងសំពោងលើសចំណុះ និងធ្វើឱ្យប៉ះពាល់អ្នកធ្វើដំណើរតាមដងផ្លូវ និង ប៉ះពាល់ដល់បរិស្ថានតាមដងផ្លូវ ដូចជារថយន្តដឹកខ្សាច់ ដឹកដី និងដឹកអង្កាមជាដើម។ ក្នុងនោះក៏សូមឱ្យអ្នកពាក់ព័ន្ធទាំងអស់ ត្រូវបង្កើនយកចិត្តទុកដាក់ការងារសន្តិសុខ សណ្ដាប់ធ្នាប់សាធារណៈនៅតាមមូលដ្ឋានខ្លួន ក្នុងពេលប្រជាពលរដ្ឋចូលរួមសប្បាយសាទរ បុណ្យចូលឆ្នាំថ្មី ប្រពៃណីខ្មែរខាងមុខ សំខាន់បណ្ដាក្រុងស្រុកដែលមានភ្ញៀវឆ្លងកាត់ ត្រូវធ្វើអនាម័យ សម្អាតនៅតាមដងផ្លូវឱ្យបានស្អាត ក្នុងការទទួលស្វាគមន៍ភ្ញៀវទេសចរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
