ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលសកម្មភាពមីនកម្ពុជា ហៅកាត់ថា CMAC ឯកឧត្តម ហេង រតនា បានណែនាំដល់បងប្អូនជាមន្ត្រីស៊ីម៉ាក់ដែលបានចូលនិវត្តន៍ ត្រូវធ្វើយ៉ាងណាខិតខំថែរក្សាសុខភាព និងធ្វើជាគំរូល្អដល់ក្រុមគ្រួសារ និងសង្គមជាតិ។
ឯកឧត្តមលើកឡើងបែបនេះ ក្នុងឱកាសដែលឯកឧត្តម អញ្ជើញជួបសំណេះសំណាល និងបើកប្រាក់បំណាច់ការងារជូនដល់មន្ត្រីស៊ីម៉ាក់ដែលបានចូលនិវត្តន៍ ចំនួន១៥៤នាក់ និងបើកប្រាក់ជូនគ្រួសាររបស់មន្ត្រីដែលទទួលមរណៈភាព នាថ្ងៃទី០៣ ខែមេសា ឆ្នាំ២០២៥នេះ នៅសារមន្ទីរតេជោសន្តិភាព ក្នុងស្រុកប្រាសាទបាគង ខេត្តសៀមរាប។
ឯកឧត្តម ហេង រតនា បានលើកឡើងថា ចាប់តាំងបង្កើតអង្គភាពមក មន្ត្រីទាំងអស់របស់ស៊ីម៉ាក់ បានខិតខំបំពេញការងារប្រកបដោយការទទួលខុសត្រូវខ្ពស់ ដើម្បីរំដោះផ្ទៃដីដែលគំរាមកំហែងដោយសារគ្រាប់មីន និងយុទ្ធភណ្ឌមិនទាន់ផ្ទះផ្សេងៗ។ ក្នុងបំពេញភារកិច្ចរបស់ខ្លួនមន្ត្រីស៊ីម៉ាក់បានចាកឆ្ងាយពីផ្ទះសម្បែង ពីក្រុមគ្រួសារ ទៅតាមការចាត់តាំងរបស់អង្គភាពដោយមិនខ្លាចនឿយហត់។ នៅពេលនេះ មន្ត្រីរបស់យើងខ្លះក៏ដល់ពេលចូលនិវត្តន៍ ហើយការចូលនិវត្តន៍ រាជរដ្ឋាភិបាលទាំងអាណត្តិមុនៗដែលមានសម្ដេចតេជោ ហ៊ុន សែន ជានាយករដ្ឋមន្ត្រី និងអាណត្តិទី៧ ដែលមាន សម្តេចធិបតី ហ៊ុន ម៉ាណែត ជានាយករដ្ឋមន្ត្រី តែងតែបានយកចិត្តទុកខ្លាំងចំពោះសុខទុក្ខកងកម្លាំងគ្រប់ប្រភេទ ជាពិសេសកម្លាំងរបស់ស៊ីម៉ាក់ផ្ទាល់តែម្ដង។
ឯកឧត្តមក៏បានផ្ដាំផ្ញើដល់មន្រ្តីចូលនិវត្តន៍ដែលទទួលបានរបបប្រាក់ឧបត្ថម្ភអតីតភាពបម្រើការងារនាឱកាសនេះ សូមប្រើប្រាស់ថវិកាឱ្យត្រូវគោលដៅ និងបង្កើតមុខរបរសមរម្យណាមួយដើម្បីបន្តផ្គត់ផ្គង់ជីវភាពគ្រួសារ និងក្រោយពីបញ្ចប់បេសកកម្មជាមួយអង្គភាព ហើយរស់នៅក្នុងសង្គមត្រូវធ្វើជាគំរូល្អប្រកបដោយសេចក្ដីថ្លៃថ្នូរ និងយកចិត្តទុកដាក់ថែទាំសុខភាពឱ្យបានល្អ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
