ជាជំនឿ ឬទម្លាប់ របស់បងប្អូនប្រជាពលរដ្ឋ រស់នៅក្នុងឃុំសំរោង ស្រុកសូទ្រនិគម ខេត្តសៀមរាប ឱ្យតែដល់បុណ្យចូលឆ្នាំថ្មីប្រពៃណីជាតិខ្មែរ គឺប្រជាពលរដ្ឋក្នុងឃុំសំរោងទាំងមូលតែងតែនិមន្តព្រះសង្ឃស្រោចទឹក នៅតាមផ្ទះនិមួយៗព្រមគ្នាតែម្តងដើម្បីឱ្យគ្រោះចង្រៃហូរទៅតាមទឹក និងសុំសេចក្តីសុខ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលឆ្នាំនេះបានធ្វើឡើងនៅរសៀលថ្ងៃទី០៤ ខែមេសា ឆ្នាំ២០២៥នេះ។
លោកយាយ ភី ពលរដ្ឋរស់នៅមូលដ្ឋាននេះ បានឱ្យដឹងថា ព្រះសង្ឃនិមន្តមកសូត្រមន្តស្រោចទឹកដល់ប្រជាពលរដ្ឋនៅតាមបណ្តាភូមិនេះ គឺជាជំនឿមួយ ដែលប្រជាពលរដ្ឋនៅក្នុងឃុំនេះ បានអនុវត្តន៌តាំងពីចាស់ៗជំនាន់មុនមក។ ដោយអ្នកភូមិមានជំនឿថា ការនិមន្តព្រះសង្ឃឱ្យមកស្រោចទឹកនេះ ជាការរំដោះគ្រោះ និងរឿងអាក្រក់ៗ ដែលកំពុងកើតមានឱ្យហូរទៅតាមទឹក និងសុំសេចក្តីសុខសប្បាយសម្រាប់ក្រុមគ្រួសារ ក្នុងឆ្នាំថ្មីដែលបានឈានចូលមកដល់។
លោកយាយបន្តថា ពីមុនការស្រោចទឹកប្រោះព្រំនេះ ធ្វើតែនៅក្នុងភូមិចំណុះជើងវត្តប៉ុណ្ណោះ ប៉ុន្តែនៅរយៈពេល៣ឆ្នាំចុងក្រោយនេះ ដោយមានការគោរព មានជំនឿ និងមានការសំណូម និងនិមន្តពីពុទ្ធបរិស័ទផងនោះ ព្រះគ្រូចៅអធិការវត្តសំរោង បានដឹកនាំព្រះសង្ឃបន្តនិមន្តស្រោចទឹកប្រោះព្រំឱ្យប្រជាពលរដ្ឋរហូតទៅដល់៥ឃុំ ក្នុងស្រុកសូទ្រនិគម ហើយឱ្យតែវេលានេះ បើមិនបាននិមន្តព្រះសង្ឃឱ្យមកស្រោចទឹកទេ គឺប្រជាពលរដ្ឋនៅមិនសុខ មិនអស់ចិត្ត មិនស្រឡះក្នុងខ្លួនឡើយ ដែលនេះហើយ គឺជាជំនឿ និងគោរព។
ពលរដ្ឋផ្សេងទៀត ក៏បានបង្ហាញថា មូលហេតុដែលពយកគាត់តែងតែជឿ គោរព និងធ្វើពិធីនេះ គឺដោយសារតែពួកគាត់ធ្វើទៅតែងតែជួបនូវសេចក្តីសុខចម្រើន ដោយនៅក្នុងពិធីនេះ មិនត្រឹមតែស្រោចទឹកឱ្យតែមនុស្សប៉ុណ្ណោះទេ សូម្បីតែសម្ភារប្រើប្រាស់ដូចជា ម៉ូតូ ឡាន ក៏បានឱ្យព្រះសង្ឃប្រោះព្រំឱ្យដែរ ដើម្បីឱ្យពេលធ្វើដំណើរទៅណាជួបតែសុវត្ថិភាព។ លោកចង់ឱ្យកូនចៅជំនាន់បន្តធ្វើពិធីនេះបន្តទៅមុនទៀត ព្រោះវាជាជំនឿ ឬទម្លាប់ ដែលបានធ្វើឱ្យអ្នកភូមិបានសេចក្តីសុខ។
ព្រះតេជគុណ ជឿត គឹមអាង ព្រះគ្រូសូត្រស្តាំវត្តសំរោង មានសង្ឃដីកាថា ជារៀងរាល់ឆ្នាំព្រះសង្ឃ តែងនិមន្តទៅស្រោចទឹកឱ្យពុទ្ធបរិស័ទ ដោយធ្វើឡើងរយៈពេល៧ថ្ងៃ ប៉ុន្តែសម្រាប់ឆ្នាំនេះ គឺធ្វើឡើងចំនួន៥ឃុំ ចាប់ពីថ្ងៃទី១ ខែមេសា រហូតទៅដល់ថ្ងៃស្រង់ព្រះ នៃពិធីបុណ្យចូលឆ្នាំថ្មីប្រពៃណីខ្មែរ។ ក្នុង១ថ្ងៃព្រះសង្ឃនិមន្តទៅស្រោចទឹកប្រោះព្រំឱ្យប្រជាពលរដ្ឋជាច្រើននាក់។ ហើយនៅតាមភូមិនិមួយៗព្រះនិមន្តចាប់ពីម៉ោង២ទៅ ហើយប្រជាពលរដ្ឋបានដងទឹកដាក់ផ្ការៀបចំរួចជាស្រាចរងចាំព្រះសង្ឃនិមន្តទៅដល់៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
