នៅថ្ងៃទី០៦ ខែមេសា ឆ្នាំ២០២៥ លោកជំទាវ ទុយ ជិ ប្រាក់ សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ ប្រធានគណៈកម្មាធិការសាខា បានដឹកនាំសហការី ប្រគល់ផ្ទះមនុស្សធម៌ទី៩៤ ជូនពលរដ្ឋជាស្ត្រីមេម៉ាយ ឈ្មោះ នៀម ទឿន អាយុ៣៩ឆ្នាំ មានកូន២នាក់ក្នុងបន្ទុក និងផ្ដល់អំណោយជូនប្រជាពលរដ្ឋរងគ្រោះចំនួន ៨០គ្រួសារ រស់នៅក្នុងភូមិតាប្រុក ឃុំលាងដៃ ស្រុកអង្គរធំ។
ក្នុងឱកាសនោះ លោកជំទាវ ទុយ ជិ ប្រាក់ សោភ័ណ បាននាំយកនូវប្រសាសន៍ផ្ដាំផ្ញើ សួរសុខទុក្ខរបស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង ឯកឧត្តម ប្រាក់ សោភ័ណ ប្រធានគណៈកម្មាធិការសាខា ដែលតែងតែមានការយកចិត្តទុកដាក់ខ្ពស់ ចំពោះសុខទុក្ខប្រជាពលរដ្ឋជួបទុក្ខលំបាក ដោយមិនប្រកាន់និន្នាការនយោបាយ ពណ៌សំបុរ សាសនាអ្វីឡើយ។ លោកជំទាវ បន្តថាស្ថិតក្នុងគ្រួសារមានជីវភាពទីទ័លក្រ និងរងគ្រោះដោយ ជាស្ត្រីមេម៉ាយ ដែលតម្រូវឱ្យមានការជួយជ្រោមជ្រែងពីញាតិជិតខាង សហគមន៍ និងអាជ្ញាធរមូលដ្ឋានជួយទំនុកបម្រុង។ តាមរយៈនេះជឿជាក់ថា ដោយក្ដីស្រឡាញ់ និងការអាណិតអាសូរក្រុមគ្រួសារនេះ បងប្អូននឹងបន្តជួយជ្រោមជ្រែងផ្ដល់នូវកម្លាំងចិត្ត និងចូលរួមត្រេកអរ រចំពោះផ្ទះមនុស្សធម៌នេះ ដែលផ្ទះនេះនឹងក្លាយជាជំរកដ៏កក់ក្ដៅសម្រាប់ពួកគាត់ចាប់ពីពេលនេះតទៅ។
សូមជម្រាបថា ផ្ទះមនុស្សធម៌ដែលផ្ដល់ជូនស្ត្រីមេម៉ាយខាង បានការឧបត្ថម្ភរបស់ លោកជំទាវ ហូ សារ៉េត លីវម៉ូវ និងក្រុមគ្រួសារ មានទំហំ៦ គុណ៦ម៉ែត្រ មានបន្ទប់គេង២ បន្ទប់ទឹក១ ដំបូលប្រក់ស័ង្កសីភ្លីក្បឿង ជញ្ជាំងឥដ្ឋ បាតក្រាលការ៉ូ និងចាក់សាបជុំវិញ។ ក្នុងក្រុមការងារក៏បានផ្ដល់ជូន អង្ករ៦០គីឡូក្រាម មី១កេស ត្រីខ១យួរ ទឹកស៊ីអ៊ីវ១យួរ អំបិល១គីឡូក្រាម ឃីត២កញ្ចប់ កន្ទេល២ កង់១គ្រឿង សម្ភារផ្ទះបាយ ឆ្នាំង២ ធុងទឹកជ័រ១គូ ធុងធំ៤៥លីត្រ១ និងថវិកា ៤០ម៉ឺនរៀល។ ដោយឡែកពលរដ្ឋរងគ្រោះ ៨០គ្រួសារ ក្នុង១គ្រួសារទទួលបាន អង្ករ៣០គីឡូក្រាម មី១កេស ត្រីខ១យួរ ទឹកស៊ីអ៊ីវ១យួរ អំបិល១គីឡូក្រាម ឃីត១កញ្ចប់ កន្ទេល១ និងថវិកា ៥ម៉ឺនរៀល៕
អត្ថបទ និងរូបភាព៖ សាខាកាកបាទក្រហម
