នៅថ្ងៃទី០៨ ខែមេសា ឆ្នាំ២០២៥នេះ មន្ត្រីជាច្រើនរូប នៃមន្ទីរព័ត៌មានខេត្តសៀមរាប ទទួលបានការបណ្ដុះបណ្ដាលពីវិជ្ជាសង្រ្គោះបឋម និងការអប់រំសុខភាពសហគមន៍ ពីសាខាកាកបាទក្រហមខេត្ត ដើម្បីទុកជាមូលដ្ឋានគ្រឹះ សម្រាប់សង្គ្រោះខ្លួនឯង និងមនុស្សជុំវិញខ្លួន ដែលរងគ្រោះថ្នាក់ដោយចៃដន្យ ដូចជាខ្យល់គរ គ្រោះថ្នាក់ចរាចរណ៍ និងឧប្បទ្ទវហេតុផ្សេងៗជាដើម។
លោក ស៊ុំ សំអន នាយកសាខាកាកបាទក្រហមកម្ពុជាខេត្ត បានឱ្យដឹងថា ក្រៅពីការបណ្ដុះបណ្ដាលពីវិជ្ជាសង្រ្គោះបឋម និងការអប់រំសុខភាព ដល់មន្ត្រីនៃមន្ទីរព័ត៌មាន ក្រុមការងារក៏បានផ្សព្វផ្សាយអំពីប្រវត្តិរបស់កាកបាទក្រហមកម្ពុជា សមាសភាព បដិរូប និងសញ្ញាសម្គាល់របស់ចលនា គោលការណ៍គ្រឹះកាកបាទក្រហមកម្ពុជា-អឌ្ឍចន្ទក្រហម ប្រវត្តិសកម្មភាពកាកបាទក្រហម និងការយល់ដឹងពីវិជ្ជាសង្រ្គោះបឋម គោលការគ្រឹះសង្រ្គោះបឋមផ្សេងៗផងដែរ។
ព័ត៌មានជាតិ ថ្មីៗ
លោក យឿន ចាន់ អនុប្រធានមន្ទីរព័ត៌មានខេត្ត មានប្រសាសន៍ថា ការការបណ្ដុះបណ្ដាលពីវិជ្ជាសង្រ្គោះបឋម និងការអប់រំសុខភាពនេះ ពិតជាមានសារ:សំខាន់ណាស់ក្នុងការចូលរួមចំណែកជួយសង្រ្គោះមនុស្សឱ្យបានទាន់ពេលវេលា។ វិជ្ជាសង្រ្គោះបឋមនេះដែរ ជាចំណេះដឹងមួយដ៏សំខាន់ក្នុងជីវភាពប្រចាំថ្ងៃសម្រាប់មនុស្សគ្រប់គ្នា ក្នុងការជួយសង្គ្រោះខ្លួនឯង និងអ្នកដទៃ នៅពេលដែលមានឧប្បទ្ទវហេតុកើតឡើងគ្រប់ស្ថានភាពដោយចៃដន្យ។
លោកក៏សូមថ្លែងអំណរគុណដល់ ថ្នាក់ដឹកនាំ និងក្រុមការងារសាខាកាកបាទក្រហមខេត្ត ដែលបានចំណាយពេលវេលាដ៏មានតម្លៃ ចុះផ្សព្វផ្សាយពីវិជ្ជាសង្រ្គោះបឋមដល់មន្រ្ដីរាជការនៃមន្ទីរព័ត៌មានខេត្តសៀមរាប នាពេលនេះ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
