បំពង់ស៊ីម៉ាំងប្រមាណជាង៣០០ និងភ្លើងហ្វាជាច្រើនទៀត ដែលកែច្នៃខុសបច្ចេកទេស ដែលត្រូវបានកម្លាំងសមត្ថកិច្ចខេត្តសៀមរាបបង្ក្រាប និងដកហូតកាលពីពេលកន្លងទៅ ត្រូវបានយកមកកិនកម្ទេចចោល នៅព្រឹកថ្ងៃទី០៨ ខែមេសា ឆ្នាំ២០២៥នេះ ដោយមានការចូលរួមពី លោក សំកុល សុចិត្រា អភិបាលរងខេត្តសៀមរាប ថ្នាក់ដឹកនាំ និងកម្លាំងនៃស្នងការដ្ឋាននគរបាលខេត្តសៀមរាប ជាច្រើនរូប។
លោកឧត្តមសេនីយ៍ទោ ហួត សុធី ស្នងការនគរបាលខេត្ត បានឱ្យដឹងថា បំពង់ស៊ីម៉ាំង និងភ្លើងហ្វា ដែលធ្វើការកិនកម្ទេចចោលនេះ គឺបានមកពីប្រតិបត្តិការរបស់កងកម្លាំងយើងរយៈពេលមួយឆ្នាំកន្លងមកនេះ។ ចំពោះឧបករណ៍ទាំងអស់នេះ ត្រូវបានបំពាក់លើយានយន្តដោយខុសបច្ចេកទេស ធ្វើឱ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ ដូចជាបង្កសម្លេងរំខានដល់ប្រជាពលរដ្ឋជាដើម។
លោកឧត្តមសេនីយ៍ទោ ហួត សុធី ឱ្យដឹងទៀតថា ចំពោះការដកហូតឧបករណ៍ខុសបច្ចេកទេសនេះ បានធ្វើឡើងនៅទូទាំង ១៣ក្រុងស្រុក ក្នុងខេត្តសៀមរាប។ យ៉ាងណាក្រោយការបង្ក្រាបបានជាបន្តបន្ទាប់ មួយរយៈចុងក្រោយនេះ កម្លាំងសមត្ថកិច្ចបានសង្កេតឃើញថា ការបំពាក់នូវឧបករណ៍ខុសបច្ចេកទេសលើយានយន្ត គឺមានការថយចុះច្រើន។ ប៉ុន្តែបើទោះជាយ៉ាងនេះក្ដី ដើម្បីឱ្យសណ្ដាប់ធ្នាប់សាធារណៈកាន់តែល្អប្រសើរនោះ កងកម្លាំងនគរបាលនឹងបន្តត្រួតពិនិត្យជាប់ជាប្រចាំបន្ថែមទៀតផងដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
