យុវជនស្ម័គ្រចិត្តចំនួន ៦២នាក់ ជាសិស្សនៃវិទ្យាល័យអង្គរ ក្រុងសៀមរាប ត្រូវបានបំពាក់កន្សែងជាយុវជនកាកបាទក្រហមកម្ពុជា ដែលពិធីបំពាក់នេះធ្វើឡើងនៅថ្ងៃទី០៧ ខែមេសា ឆ្នាំ២០២៥នេះ ក្រោមវត្តមាន ឯកឧត្តម គុជ លីណា អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្តសៀមរាប ដោយមានការចូលរួមពីថ្នាក់ដឹកនាំសាលា ក្រុមការងារសាខាកាកបាទក្រហមខេត្ត និងសិស្សានុសិស្សជាច្រើនរូប។
ឯកឧត្តម គុជ លីណា មានប្រសាសន៍ថា ការបំពាក់កន្សែងយុវជនកាកបាទក្រហមកម្ពុជាដល់យុវសិស្សទាំង ៦២នាក់នាពេលនេះ គឺបានបង្ហាញពីការយកចិត្តទុកដាក់របស់សាខាកាកបាទក្រហមកម្ពុជាខេត្ត ក្នុងការកសាងធនធានមនុស្សបន្តវេនរបស់សមាគមជាតិកាកបាទក្រហមកម្ពុជា ដែលជាស្ថាប័នមនុស្សធម៌ធំជាងគេនៅកម្ពុជា និងជាជំនួយការឱ្យអាជ្ញាធរសាធារណៈលើវិស័យមនុស្សធម៌។
ឯកឧត្តម គុជ លីណា មានប្រសាសន៍ទៀតថា កាកបាទក្រហមកម្ពុជា បានយកចិត្តទុកដាក់ខ្ពស់លើវិស័យអាទិភាពចំនួន៤ គឺ៖ទី១.វិស័យអាទិភាពការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ, ទី២.សុខភាព និងការថែទាំសុខភាពក្នុងសហគមន៍, ទី៣.ការលើកកម្ពស់គោលការណ៍គ្រឹះ និងតម្លៃមនុស្សធម៌ និងទី៤.ការអភិវឌ្ឍស្ថាប័ន។ ចំពោះយុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេងដែលជាកម្លាំងស្នូលមួយដ៏មានសារៈសំខាន់ និងសកម្មបំផុត ក្នុងការផ្ដល់នូវសេវាកម្មមនុស្សធម៌ ប្រកបដោយការប្ដេជ្ញាចិត្តខ្ពស់ និងការលះបង់ឥតងាករេ ស្របតាមប្រធានបទ “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា” និង “យុវជនជាភ្នាក់ងារនៃការផ្លាស់ប្ដូរឥរិយាបថក្នុងសង្គម”។
ព័ត៌មានជាតិ ថ្មីៗ
ឯកឧត្ដម ក៏បានណែនាំ និងផ្តាំផ្ញើដល់ប្អូនយុវជនកាកបាទក្រហម ដែលបានបំពាក់កន្សែងនាពេលនេះ ត្រូវប្រកាន់ខ្ជាប់នូវស្មារតី សាមគ្គីភាពរវាងគ្នានិងគ្នា រវាងយុវជនកាកបាទក្រហមកម្ពុជានិងយុវជនដ៏ទៃទៀតក្នុងការបំពេញបេសកកម្មមនុស្សធម៌ ចៀសវាងឱ្យបានដាច់ខាតទង្វើទាំងឡាយណាដែលនាំទៅដល់ការបែកបាក់ ប្រេះសាំ សាមគ្គីភាព។ ខិតខំរៀនសូត្រចំណេះវិជ្ជា ដើម្បីក្លាយជាកូនល្អ សិស្សល្អ យុវជនល្អ មិត្តល្អ ពលរដ្ឋល្អ មិនធ្វើអំពើអសីលធម៌ផ្សេងៗ ដែលនាំឱ្យអ្នកមានគុណពិបាកចិត្ត និងមានទុក្ខ។ ទន្ទឹមនេះ ត្រូវអនុវត្តន៍ក្រមសីលធម៌ មិត្តអប់រំមិត្ត មិនបណ្ដោយខ្លួនឱ្យធ្លាក់ចូលក្នុងអំពើមិនល្អ គ្រឿងញៀន ក្មេងទំនើង និងធ្វើជាគំរូក្នុងការអូសទាញមិត្តភក្ដិ ដែលដើរផ្លូវខុសឱ្យងាកមករកផ្លូវត្រូវវិញ៕
អត្ថបទ និងរូបភាព៖ កាកបាទក្រហមខេត្ត
