ខណៈព្រឹត្តិការណ៍អង្គរសង្ក្រាន្តកាន់តែកៀកមកដល់ ការតុបតែង និងរៀបចំគិតមកទល់ពេលនេះ ក៏ជិតនឹងរួចរាល់ដូចគ្នា ហើយសម្រាប់ការរៀបចំនៅឆ្នាំនេះដែរ ភ្ញៀវទេសចររ រួមនិងប្រជាពលរដ្ឋក្នុងខេត្តសៀមរាប បានបង្ហាញការពេញចិត្ត ដោយពួកគាត់លើកឡើងថា ព្រឹត្តិការណ៍នេះ បានបង្ហាញដល់អ្នកទេសចរគ្រប់ជាតិសាសន៍ចាប់អារម្មណ៍ពីរមណីយដ្ឋានអង្គរកាន់តែខ្លាំង ដែលអតីតព្រះមហាក្សត្រគ្រប់ជំនាន់បានកសាងឡើងទុកសម្រាប់ប្រជាពលរដ្ឋខ្មែរជំនាន់ក្រោយ។
ពួកគាត់បានលើកឡើងទៀតថា ការរៀបចំនៅឆ្នាំនេះ មិនត្រឹមតែធ្វើឱ្យប្រជាពលរដ្ឋសប្បាយរីករាយ និងទាក់ទាញអ្នកទេសចរប៉ុណ្ណោះទេ វាថែមទាំងអាចជួយឱ្យសេដ្ឋកិច្ចប្រជាពលរដ្ឋនៅក្នុងខេត្តកាន់តែល្អប្រសើរ ព្រោះពិធីបុណ្យជាតិនេះ មានលក្ខណៈទ្រង់ទ្រាយធំ និងមានការរៀបចំកន្លែងកំសាន្តច្រើន ទាំងក្នុងតំបន់អង្គរ និងនៅក្នុងក្រុង។ ពួកគាត់ក៏រំពឹងថា សម្រាប់ឆ្នាំនេះខេត្តសៀមរាប នឹងមានអ្នកចូលរួមកាន់តែច្រើនឡើងផងដែរ។
សូមជម្រាបថា អង្គរសង្ក្រាន្តឆ្នាំ២០២៥នេះ ក៏មិនខុសគ្នាពីព្រឹត្តិការណ៍មុនៗដែរ នៅតែរក្សាបានគោលបំណងរបស់ខ្លួន គឺការផ្សព្វផ្សាយអំពីទេសចរណ៍ និងសិល្បៈវប្បធម៌ ក្នុងនោះអង្គរសង្ក្រាន្តបានលើកយកនូវកម្មវិធីកម្សាន្តធំៗចំនួន៣៨កម្មវិធី ដោយក្នុងកម្មវិធីនីមួយៗ មានការសម្ដែងសិល្បៈ ល្បែងប្រជាប្រិយ របស់ខ្មែរជាច្រើនទម្រង់ផ្សេងៗគ្នា៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
