អគ្គនាយកដ្ឋានវិទ្យុ និងទូរទស្សន៍មជ្ឈិមចិន បានសហការជាមួយក្រសួងវប្បធម៌ និងវិចិត្រសិល្បៈកម្ពុជា និងរដ្ឋបាលខេត្តសៀមរាប រៀបចំព្រឹត្តិការណ៍អបអរខួប១០ឆ្នាំ នៃដំណើរភាពយន្តចល័តកម្ពុជា-ចិន នៅខាងមុខប្រាសាទអង្គរវត្ត នាល្ងាចថ្ងៃទី១៨ ខែមេសា ឆ្នាំ២០២៥នេះ ដើម្បីឱ្យប្រជាជនកម្ពុជា មានឱកាសបានស្វែងយល់កាន់តែទូលំទូលាយ អំពីវប្បធម៌ ប្រពៃណី ប្រវត្តិសាស្រ្ត និងសង្គមបច្ចុប្បន្នរបស់ប្រទេសទាំងពីរ។
លោក ឌី រ៉ាដូ អភិបាលរងខេត្តសៀមរាប មានប្រសាសន៍ថា ឆ្នាំ២០២៥ គឺជាឆ្នាំទេសចរណ៍កម្ពុជា-ចិន តាមរយៈនៃការរៀបចំព្រឹត្តិការណ៍នេះ បាននាំមកនូវកាលានុវត្តភាពថ្មីសម្រាប់ការអភិវឌ្ឍវិស័យទេសចរណ៍ប្រទេសទាំងពីរ ពិសេសខេត្តសៀមរាប ដែលបានផ្ដល់នូវវេទិកាកាន់តែទូលំទូលាយសម្រាប់ការបង្កើន ការយល់ដឹងគ្នាទៅវិញទៅមក និងមិត្តភាពរវាងប្រជាជនប្រទេសទាំងពីរ។ លោកសង្ឃឹមថា ព្រឹត្តការណ៍ចាក់បញ្ចាំងភាពយន្តចល័តលើកនេះ នឹងក្លាយជាចំណុចលេចធ្លោមួយនៃឆ្នាំទេសចរណ៍កម្ពុជា-ចិន។ តាមរយៈការផ្សព្វផ្សាយនៃភាពយន្ត ភ្ញៀវទេសចរកាន់តែច្រើននឹងមកកាន់ខេត្តសៀមរាប និងប្រទេសកម្ពុជា ដើម្បីទទួលយកបទពិសោធពីទំនៀមទម្លាប់ ពិសេសបេតិកភណ្ឌវប្បធម៌ដ៏សម្បូរបែបនៅខេត្តសៀមរាប។
លោក អាន ស៊ាវយូ (An Xiaoyu) ប្រធានមជ្ឈមណ្ឌលកម្មវិធីភាសាអាស៊ីអាហ្វ្រិក នៃអគ្គនាយកដ្ឋានវិទ្យុ និងទូរទស្សន៍មជ្ឈិមចិន បានឱ្យដឹងថា កាលពី១០ឆ្នាំមុន យើងបានចាប់ដំណើរការនូវការចាក់បញ្ចាំងភាពយន្តសប្បុរសធម៌ ដោយមានចិត្តបរិសុទ្ធ និងស្មោះស្ម័គ្រ ដែលបានធ្វើឱ្យប្រជាជនកម្ពុជានៅតំបន់ដាច់ស្រយាលអាចមើលភាពយន្តនៅមាត់ទ្វារផ្ទះរបស់ពួកគេ។ ការបញ្ចាំងភាពយន្តនេះ ទទួលបានការគាំទ្រយ៉ាងខ្លាំងពីក្រសួងវប្បធម៌ និងវិចិត្រសិល្បៈ និងនាយកដ្ឋានភាពយន្តកម្ពុជា។ រយៈពេល១០ឆ្នាំ យើងបានធ្វើដំណើរទៅចាក់បញ្ចាំងភាពយន្តឆ្នើមរបស់ប្រទេសចិន និងកម្ពុជាជាង ៣០០លើក នៅខេត្ត និងទីក្រុងចំនួន២៥ ដែលទទួលបានការគាំទ្រយ៉ាងខ្លាំងពីប្រជាជននៅគ្រប់តំបន់។
លោក អាន ស៊ាវយូ បន្ដថា រយៈពេល១០ឆ្នាំកន្លងមកនេះ ព្រឹត្តិការណ៍ដំណើរភាពយន្តចល័តកម្ពុជា-ចិន បានក្លាយជានាមបណ្ណនៃការផ្លាស់ប្ដូរវប្បធម៌រវាងប្រទេសកម្ពុជា និងប្រទេសចិន។ ភាពយន្តចល័តកម្ពុជា-ចិន មិនត្រឹមតែធ្វើឱ្យប្រជាជនកម្ពុជា ឈ្វេងយល់ពីកម្លាំងទាក់ទាញនៃវប្បធម៌ចម្រុះរបស់ប្រទេសចិនប៉ុណ្ណោះទេ ប៉ុន្តែថែមទាំងធ្វើឱ្យយើងឈ្វេងយល់កាន់តែស៊ីជម្រៅអំពីវប្បធម៌ និងទំនៀមទម្លាប់ប្រពៃណីរបស់កម្ពុជាផងដែរ ខណៈដែលអំឡុងពេលដំណើរការចាក់បញ្ចាំងភាពយន្តបានទៅដល់ទីក្រុង ភូមិ សាលារៀន រោងចក្រ និងជំរំយោធារបស់ប្រទេសកម្ពុជា។
ឯកឧត្ដម ហាប់ ទូច រដ្ឋលេខាធិការប្រចាំការក្រសួងវប្បធម៌ និងវិចិត្រសិល្បៈកម្ពុជា បានថ្លែងថា កម្ពុជាពិតជាមានមោទនភាពចំពោះកិច្ចសហប្រតិបត្តិការក្នុងការរៀបចំព្រឹត្តិការណ៍ដំណើរ ភាពយន្តចល័តកម្ពុជា-ចិន ក្នុងរយៈពេល១០ឆ្នាំកន្លងទៅនេះ ដោយទទួលបានលទ្ធផលជាផ្លែផ្កាគួរជាទីមោទនៈ ក្នុងការរួមចំណែកលើកកម្ពស់ទំនាក់ទំនងមិត្តភាពរវាងប្រជាជន និងប្រជាជននៃប្រទេសទាំងពីរ។ កម្ពុជា និងចិន គឺជាប្រទេសដែលមានវប្បធម៌អរិយធម៌ដ៏ចំណាស់ និងសម្បូរបែប ហើយក៏មានទំនាក់ទំនងជាមួយគ្នាតាំងពីយូរលង់មកហើយ ដែលចំណងមិត្តភាពជាប្រពៃណីនេះ បានក្លាយជាមរតកដ៏មានតម្លៃ សម្រាប់ប្រជាជនប្រទេសទាំងពីរ។ វិស័យវប្បធម៌ក៏ត្រូវបានលើកកម្ពស់ ដែលរួមចំណែកដ៏សំខាន់ ជាស្ពានតភ្ជាប់ទំនាក់ទំនងរវាងប្រជាជន និងប្រជាជនប្រទេសទាំងពីរ ដែលជាមូលដ្ឋានគ្រឹះក្នុងការកសាងសហគមន៍វាសនារួម កម្ពុជា-ចិន ក្នុងយុគសម័យថ្មី៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
