មន្ត្រីជាន់ខ្ពស់សហរដ្ឋអាមេរិក បានអះអាងថា សហរដ្ឋអាមេរិក បានប្ដេជ្ញាចិត្តយ៉ាងមុតមាំក្នុងការធ្វើជាដៃគូសន្ទនាជាមួយបណ្ដាប្រទេសអាស៊ាន ទាំងកិច្ចការពារតំបន់អាស៊ាន ទាំងកិច្ចការជួយលើកស្ទួយតំបន់អាស៊ានឱ្យក្រោកឈរបានរឹងមាំ។
ក្នុងឱកាសដឹកនាំគណប្រតិភូសហរដ្ឋអាមេរិក ចូលរួមប្រជុំកិច្ចសន្ទនាអាស៊ាន-អាមេរិក លើកទី៣៧ នៅខេត្តសៀមរាប នាថ្ងៃទី២២ ខែមេសានេះ មន្ត្រីជាន់ខ្ពស់សហរដ្ឋអាមេរិក លោក សៀន អូនៀល (Sean O’Neill) បានថ្លែងកោតសរសើរចំពោះរដ្ឋាភិបាលកម្ពុជា ដែលជាដៃគូនៃកិច្ចសន្ទនាគ្រប់ជ្រុងជ្រោយ ហើយក៏មានកិច្ចសហប្រតិបត្តិការជាមួយគ្នាយ៉ាងប្រសើរ តាមរយៈដៃគូសន្ទនាគ្រប់ជ្រុងជ្រោយនេះ។ ដូច្នេះក្នុងនាមតំណាងឱ្យផ្នែករដ្ឋបាលនៃកិច្ចសន្ទនារវាងបណ្ដាប្រទេសអាស៊ាន និងសហរដ្ឋអាមេរិក លោកបានផ្ដោតការយកចិត្តទុកដាក់រួមគ្នាក្នុងការសន្ទនាទៅលើចំណុចសំខាន់ៗជាច្រើន ដែលរំពឹងថាការសន្ទនាទាំងនេះនឹងចេញជាលទ្ធផលយ៉ាងល្អ។
លោកបន្តថា សហរដ្ឋអាមេរិក បានប្ដេជ្ញាចិត្តយ៉ាងមុតមាំក្នុងការធ្វើជាដៃគូសន្ទនាជាមួយបណ្ដាប្រទេសអាស៊ាន ទាំងកិច្ចការពារតំបន់អាស៊ាន ព្រមទាំងជួយលើកស្ទួយតំបន់អាស៊ានឱ្យក្រោកឈរបានរឹងមាំ។ ទាំងអាស៊ាន និងអាមេរិក នឹងអាចទទួលបាននូវវិបុលភាព ស្ថិរភាពតាមរយៈកិច្ចសន្ទនានានា សម្រាប់ពង្រឹងផ្នែករដ្ឋបាលនៃបណ្ដាប្រទេសនីមួយៗ ដែលជាការលើកកម្ពស់ដល់ផ្នែកសន្តិសុខ សុវត្ថិភាព ដល់ពលរដ្ឋអាមេរិកដែលកំពុងធ្វើការនៅតាមបណ្ដាប្រទេសក្នុងតំបន់ផង។
សូមជម្រាបថា កិច្ចសន្ទនាអាស៊ាន-អាមេរិក លើកទី៣៧នេះ កម្ពុជាទទួលបានសិទ្ធិធ្វើជាម្ចាស់ផ្ទះ ដោយខាងភាគីអាស៊ានមាន ឯកឧត្តម គង់ ភោគ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ជាសហប្រធាន និងខាងសហរដ្ឋអាមេរិក មានលោក សៀន អូនៀល ជាសហប្រធានដឹកនាំកិច្ចប្រជុំ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
