នៅថ្ងៃទី២២ ខែមេសានេះ វត្តអារញ្ញសាគរ ក្រុងសៀមរាប បានរៀបចំពិធីបុណ្យពូនភ្នំខ្សាច់ រាប់បាត្រព្រះសង្ឃ៥០អង្គ ដើម្បីបំពេញបុណ្យកុសល និងរំដោះកម្មពៀរ ឧទ្ទិសកុសលជូនដល់ញាតិកាគ្រប់សន្តាន ហើយពិធីនេះធ្វើឡើងទៅតាមលំអានចាស់បុរាណបន្សល់ទុកមក ដែលជាកិច្ចឆ្លងឆ្នាំចាស់ផ្លាស់ឆ្នាំថ្មី។
ព្រះតេជគុណ វិភត្តិមុនីញាណ ហ៊ាក់ គឹមហ៊ត់ វិសារទោ ព្រះគ្រូចៅអធិការវត្ត មានថេរដីកាថា ពិធីពូនភ្នំខ្សាច់ ឆ្លងឆ្នាំចាស់ផ្លាស់ឆ្នាំថ្មី រៀបចំឡើងរយៈពេល ២ថ្ងៃ គឺទី២១-២២ ខែមេសា ដោយក្នុងពេលរាត្រីមានកំសាន្តជាច្រើនដូចជា វាយបុក ការរាំសប្បាយ សិល្បៈល្ខោនបាសាក់ ដើម្បីបង្កើនភាពរីករាយ និងចូលរួមថែរក្សាលើកស្ទួយវិស័យល្ខោនបាសាក់ដែលជាសម្បត្តិវប្បធម៌ដ៏ចំណាស់របស់ខ្មែរយើង។
ព័ត៌មានជាតិ ថ្មីៗ
ព្រះគ្រូចៅអធិការបន្ថែមថា ពិធីបុណ្យនេះដែរ ក៏ជាការបង្កើនសាមគ្គីធម៌រក្សាទំនាក់ទំនងរវាងសង្ឃ និងពុទ្ធបរិស័ទ ជាពិសេសជាសារមួយបង្ហាញដល់យុវជនខ្មែរជំនាន់ក្រោយឱ្យគោរពស្រឡាញ់ និងរួមគ្នាថែរក្សាអភិក្សវប្បធម៌ប្រពៃណីទំនៀមទំលាប់ដែលដូនតាខ្មែរបានបន្សល់ទុកមក ឱ្យស្ថិតនៅគង់វង្ស និងឱ្យកូនចៅជំនាន់ក្រោយ ចេះស្គាល់បុណ្យបាប គុណទោស ចេះគោរព និងសម្ដែងនូវការដឹងគុណដល់មាតាបិតា បុព្វការីជន និងចាស់ព្រឹទ្ធាចារ្យ ចៀសវាងនូវការបាត់បង់ដោយការប្រមាថ មិនដឹងគុណ៕
អត្ថបទ និងរូបភាព៖ យូ វង្ស
កែសម្រួល៖ លោក អ៊ុន ណារាជ្យ
