អាជ្ញាធរខេត្តសៀមរាប បានអំពាវនាវឱ្យប្រជាពលរដ្ឋត្រូវចូលរួមគោរពច្បាប់ចរាចរណ៍ទាំងអស់គ្នានៅគ្រប់ពេលនៃការធ្វើដំណើរ ពិសេសសិស្សានុសិស្សក្រៅពីការសិក្សាប្រចាំថ្ងៃ ក៏ត្រូវឱ្យមានការយល់ដឹងឱ្យបានច្រើនបន្ថែមទៀតផងដែរអំពីសុវត្ថិភាពចរាចរណ៍។
ក្នុងឱកាសបើកវគ្គបណ្ដុះបណ្ដាលស្ដីពីការវាយតម្លៃលក្ខខណ្ឌសុវត្ថិភាពនៃហេដ្ឋារចនាសម្ព័ន្ធនៅតំបន់សាលារៀន ដោយប្រើប្រាស់វិធីសាស្ត្រដាក់ចំណាត់ថ្នាក់ផ្កាយ(SR4S) នៅវិទ្យាល័យ ហ៊ុន សែន ប្រាសាទបាគង នៅថ្ងៃទី២៣ ខែមេសានេះ លោក លី សារី អភិបាលរងខេត្ត និងជាអនុប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប មានប្រសាសន៍ថា វគ្គបណ្ដុះបណ្ដាលនេះ គឺជាការបង្កើនចំណេះដឹងបន្ថែមដល់លោកគ្រូអ្នកគ្រូ និងសិស្សានុសិស្ស អំពីការងារសុវត្ថិភាពចរាចរណ៍ និងការកាត់បន្ថយគ្រោះថ្នាក់ចរាចរណ៍នៅតាមតំបន់សាលារៀន។
លោក លី សារី បានបញ្ជាក់ថា វគ្គបណ្ដុះបណ្ដាលនេះដែរ ក៏ដើម្បីជាការកសាងនូវមូលដ្ឋានគ្រឹះក្នុងការវាយតម្លៃ និងកំណត់ពីហេដ្ឋារចនាសម្ព័ន្ធដែលត្រូវធ្វើការកែលម្អ និងដើម្បីសហការវាយតម្លៃ និងជ្រើសរើសសាលារៀនសម្រាប់ធ្វើការកែលម្អជាទ្រង់ទ្រាយធំដោយផ្អែក លើតម្រូវការសុវត្ថិភាព និងការវាយតម្លៃដោយប្រើប្រាស់វិធីសាស្ត្រដាក់ចំណាត់ផ្កាយ។
ព័ត៌មានជាតិ ថ្មីៗ
លោកអភិបាលរងខេត្ត បញ្ជាក់ទៀតថា ដើម្បីធានាសុវត្ថិភាពចរាចរណ៍ និងកាត់បន្ថយគ្រោះថ្នាក់ចរាចរណ៍ ពិតណាស់ត្រូវឱ្យសិស្សានុសិស្សយល់ដឹងពីវិធានការ វិធីសាស្រ្តដែលអាចជៀសផុតពីគ្រោះថ្នាក់ចរាចរណ៍ ហើយអាចយកចំណេះដឹងទាំងនេះ ទៅណែនាំបន្តដល់ក្រុមគ្រួសារ មិត្តភក្កិ និងសហគមន៍ ឱ្យយល់ និងអនុវត្តន៍ឱ្យបានម៉ឺងម៉ាត់ក្នុងពេលធ្វើដំណើរតាមផ្លូវថ្នល់ ដើម្បីអាចកាត់បន្ថយគ្រោះថ្នាក់ចរាចរឱ្យកាន់តែមានប្រសិទ្ធភាពខ្ពស់។ ក្នុងនោះលោកក៏បានអំពាវនាវអ្នកប្រើប្រាស់យានជំនិះគ្រប់ប្រភេទ ត្រូវចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន មិនត្រូវបើកបរលើសល្បឿនកំណត់ គោរពសិទ្ធិអាទិភាព នៅពេលធ្វើដំណើរមិនថាទីជិត ឬទីឆ្ងាយ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
